കണ്ണൂര്‍: (KVARTHA) ഗള്‍ഫില്‍ ജോലി ചെയ്യുന്ന ചാലാട് സ്വദേശിയില്‍ നിന്നും ഷെയര്‍ ട്രേഡിംഗിന്റെ പേരില്‍ 47 ലക്ഷം തട്ടിയെടുത്തുവെന്ന കേസില്‍ രണ്ട് പ്രതികള്‍ പിടിയില്‍. കാസര്‍കോട് ബേക്കല്‍ പൊലീസ് സ്റ്റേഷന്‍ പരിധിയിലെ അബ്ദുല്‍ മജീദ് മൂക്കോട് അഹമ്മദ് (67), കാസര്‍കോട് ടൗണ്‍ പൊലീസ് സ്റ്റേഷന്‍ പരിധിയിലെ അബ്ദുല്‍ സമദാനി എ (35) എന്നിവരെയാണ് സൈബര്‍ ഇന്‍സ്‌പെക്ടര്‍ ബിജു പ്രകാശിന്റെ നേതൃത്വത്തിലുള്ള സംഘം കാസര്‍കോട് വച്ച് അറസ്റ്റ് ചെയ്തത്. 

അബ്ദുല്‍ മജീദിന്റെ അക്കൗണ്ടിലേക്ക് ഷെയര്‍ ട്രേഡിംഗിനെന്ന വ്യാജേന ചാലാട് സ്വദേശിയുടെ അക്കൗണ്ടില്‍ നിന്നും എട്ട് ലക്ഷം രൂപയോളം നിക്ഷേപ തട്ടിപ്പ് നടത്തിയെന്നാണ് പരാതി. അബ്ദുല്‍  സമദാനി ട്രേഡിംഗിന്റെ പേരില്‍ അഞ്ച് ലക്ഷം രൂപയാണ് അക്കൗണ്ടിലേക്ക് മാറ്റിയതെന്നും കണ്ടെത്തി. പ്രതിയുടെ പേരിലേക്ക് വരുന്ന പണത്തിന്റെ തോതനുസരിച്ചുള്ള കമ്മീഷനും ഇതിലൂടെ ലഭിക്കും. 

അബ്ദുല്‍ സമദാനിയുടെ അക്കൗണ്ടിലെത്തിയ തുക ഇരിട്ടി സ്വദേശിയുടെ അക്കൗണ്ടിലേക്ക് മാറ്റിയതായും അന്വേഷണ സംഘം കണ്ടെത്തിയിട്ടുണ്ട്. സംഘത്തിലെ പ്രധാന കണ്ണികള്‍ക്കായുള്ള അന്വേഷണം ഊര്‍ജിതമാക്കിയതായി ഇന്‍സ്‌പെക്ടര്‍ ബിജു പ്രകാശ് പറഞ്ഞു. എ എസ് ഐമാരായ ജ്യോതി, മഹേഷ്, പ്രവീണ എന്നിവരും പ്രതികളെ പിടികൂടിയ സംഘത്തിലുണ്ടായിരുന്നു.

#sharetradingfraud #keralanews #cybercrime #investmentscam #fraudalert #indiannews