Custody | ‘സാൻട്രോ രവി’യും കൂട്ടു പ്രതികളും 7 ദിവസം ജുഡീഷ്യൽ കസ്റ്റഡിയിൽ

മംഗ്ളുറു: (www.kvartha.com): കുപ്രസിദ്ധ പെൺവാണിഭ ഇടനിലക്കാരൻ സാൻട്രോ രവി എന്ന കെഎസ് മഞ്ചുനാഥിനേയും (51) രണ്ട് കൂട്ടു പ്രതികളേയും മൈസൂറു അഡി. ജില്ല സെഷൻസ് ജഡ്ജ് (ആറ്) ഗുരുരാജ് ഏഴ് ദിവസം ജുഡീഷ്യൽ കസ്റ്റഡിയിൽ പൊലീസിന് കൈമാറി. കൂടുതൽ ചോദ്യം ചെയ്യാനും തെളിവെടുപ്പിനുമായി പ്രതികളെ വിട്ടു കിട്ടാൻ പൊലീസ് ആവശ്യപ്പെട്ടിരുന്നു.
  
കർണാടകയിൽ പ്രതിപക്ഷ പ്രതിഷേധം ശക്തമാവുന്നതിനിടെ വ്യാഴാഴ്ചയാണ് ഗുജറാതിലെ അഹമ്മദാബാദിൽ നിന്ന് കർണാടക പൊലീസ് സംഘം രവിയേയും കൂട്ടാളികളായ രാംജി(45), സതീഷ് കുമാർ (35) എന്നിവരെയും കസ്റ്റഡിയിലെടുത്തത്. അർധരാത്രി ബംഗളൂറു ദേവനഹള്ളി കെമ്പെഗൗഡ രാജ്യാന്തര വിമാനത്താവളത്തിൽ കൊണ്ടുവന്ന് അറസ്റ്റ് രേഖപ്പെടുത്തിയത്.

മാധ്യമങ്ങളുടെ കണ്ണിൽപ്പെടാതിരിക്കാൻ പ്രധാന കവാടം ഒഴിവാക്കി മറ്റൊരു ഗേറ്റിലൂടെ പുറത്തെത്തിച്ച് പുലർചെ റോഡ് മാർഗം മൈസൂറിലേക്ക് തിരിക്കുകയായിരുന്നു. മൈസൂറു സിറ്റി പൊലീസ് കമീഷണർ ഓഫീസിൽ വെള്ളിയാഴ്ച വൈകുന്നേരം മാധ്യമങ്ങളെ കണ്ടാണ് എഡിജിപി അലോക് കുമാർ അറസ്റ്റ് വിവരം പ്രഖ്യാപിച്ചത്.
  
അന്ന് രാത്രി മുഴുവൻ കമീഷണർ ഓഫീസിൽ തങ്ങിയാണ് അലോക് കുമാർ ശനിയാഴ്ച പുലർചെ ചാമുണ്ഡേശ്വരി ക്ഷേത്ര ദർശനം കഴിഞ്ഞ് ബംഗളൂരുവിലേക്ക് പോയത്. ബിജെപി മന്ത്രിമാരും നേതാക്കളുമായി അടുത്ത ബന്ധം പുലർത്തുന്നതായി ആരോപണമുള്ള രവിയുടെ ചോദ്യം ചെയ്യലും മറ്റു നടപടികളും എഡിജിപിയുടെ നേരിട്ടുള്ള നേതൃത്വത്തിലാണ് നടന്നത്.

അലോക് കുമാർ സാൻട്രോ രവിയെ ചോദ്യം ചെയ്ത വിജയനഗർ പൊലീസ് സ്റ്റേഷനും പരിസരവും ഏതോ അതിവിശിഷ്ട വ്യക്തിയുടെ സാന്നിധ്യം സൂചിപ്പിച്ച് കനത്ത പൊലീസ് സുരക്ഷയിലായിരുന്നു. ചുറ്റിലും ബാരിക്കേഡുകൾ സ്ഥാപിച്ച് പൊലീസുകാരെ കാവൽ നിറുത്തി.