വേടനെതിരെ എൻഐഎ അന്വേഷണം ആവശ്യപ്പെട്ട് ബിജെപി കൗൺസിലർ; പ്രധാനമന്ത്രിയെ അധിക്ഷേപിച്ചെന്ന് പരാതി

പാലക്കാട്: (KVARTHA) പ്രധാനമന്ത്രി നരേന്ദ്ര മോദിയെ പാട്ടിലൂടെ അധിക്ഷേപിച്ചെന്നാരോപിച്ച് റാപ്പർ വേടനെതിരെ എൻഐഎയ്ക്ക് പരാതി നൽകി ബിജെപി കൗൺസിലർ. പാലക്കാട് നഗരസഭയിലെ ബിജെപി കൗൺസിലറായ മിനി കൃഷ്ണകുമാറാണ് ഈ പരാതി നൽകിയത്. 

മോദിയെ 'കപട ദേശീയവാദി' എന്ന് പരിഹസിച്ച വേടനെതിരെ അന്വേഷണം നടത്തണമെന്ന് പരാതിയിൽ ആവശ്യപ്പെട്ടിട്ടുണ്ട്.
കഴിഞ്ഞ ദിവസം, ഹിന്ദു ഐക്യവേദി നേതാവ് കെ.പി. ശശികലയും വേടനെതിരെ രൂക്ഷ വിമർശനവുമായി രംഗത്തെത്തിയിരുന്നു. വേടന്റെ 'തുണിയില്ലാത്ത ചാട്ടങ്ങൾക്ക്' മുന്നിൽ സമൂഹം അപമാനിക്കപ്പെടുന്നുവെന്നും, 'ആടികളിക്കട കുഞ്ഞുരാമാ' എന്ന് പറഞ്ഞു നടക്കുന്ന സംവിധാനങ്ങൾ അവസാനിപ്പിക്കണമെന്നും ശശികല ആവശ്യപ്പെട്ടു. പട്ടികജാതി-വർഗ്ഗ വിഭാഗങ്ങളുടെ തനതായ കലാരൂപമാണോ റാപ്പ് സംഗീതമെന്നും ശശികല ചോദിച്ചിരുന്നു.

ശശികലയുടെ വിമർശനങ്ങൾക്ക് മറുപടിയുമായി വേടൻ രംഗത്തെത്തി. സംഘ്പരിവാറിന് തങ്ങൾ പറയുന്നതുമാത്രം കേൾക്കണമെന്ന ധാർഷ്ട്യമാണുള്ളതെന്നും, താൻ റാപ്പ് പാടുമെന്നും അവസരം കിട്ടിയാൽ ഗസലും പാടുമെന്നും വേടൻ പറഞ്ഞു. 

ജനാധിപത്യത്തിനൊപ്പം നിന്ന് ജനങ്ങളോട് സംവദിക്കുന്നയാളാണ് താനെന്നും, തന്നെ വിഘടനവാദിയാക്കി ചിത്രീകരിക്കാനാണ് സംഘ്പരിവാർ ശ്രമിക്കുന്നതെന്നും വേടൻ കൂട്ടിച്ചേർത്തു. 

ഇതിന് പിന്നാലെയാണ് ബിജെപി കൗൺസിലർ മിനി കൃഷ്ണകുമാർ എൻഐഎയ്ക്ക് പരാതി നൽകിയത്.

ഈ വാർത്തയെക്കുറിച്ച് നിങ്ങളുടെ അഭിപ്രായമെന്ത്? ഷെയർ ചെയ്യുക. നിങ്ങളുടെ പ്രതികരണം കമൻ്റായി രേഖപ്പെടുത്തുക.

Article Summary: BJP councilor files complaint with NIA against rapper Vedan for allegedly insulting Prime Minister Modi in a song, demanding an investigation.

#RapperVedan, #NarendraModi, #NIA, #BJP, #Complaint, #Palakkad