അജോ കുറ്റിക്കൻ

ഇടുക്കി: (KVARTHA) പഴയ രൂപ നോട്ടുകൾക്ക് അഞ്ച് ലക്ഷം രൂപ വരെ വിലയുണ്ടെന്ന വ്യാജേന സോഷ്യൽ മീഡിയയിൽ വ്യാപകമായ പരസ്യം നൽകി വലിയ തട്ടിപ്പ് നടത്താൻ ശ്രമം. അടുത്ത കാലത്തായി ഇത്തരം പരസ്യങ്ങൾ സാമൂഹ്യ മാധ്യമങ്ങളിൽ പെരുകി വരികയാണ്. ഇതിന് പിന്നിൽ ഉത്തരേന്ത്യൻ ലോബിയാണ് പ്രവർത്തിക്കുന്നതെന്നാണ് സൂചന.
1980 മുതൽ 1990 വരെ റിസർവ് ബാങ്ക് പുറത്തിറക്കിയ ചില പ്രത്യേക സീരിയലുകളിലുള്ള നോട്ടുകൾ ഉയർന്ന വിലയ്ക്ക് വാങ്ങാമെന്ന് വാഗ്ദാനം ചെയ്താണ് ഈ സംഘങ്ങൾ ആളുകളെ കെണിയിൽ വീഴ്ത്തുന്നത്. ഈ ആകർഷകമായ പരസ്യങ്ങളിൽ വീണുപോകുന്നവരിൽ നിന്ന് വിവിധ കാരണങ്ങൾ പറഞ്ഞ് 5000 രൂപ മുതൽ 25,000 രൂപ വരെ തട്ടിയെടുക്കുന്നു.
രജിസ്ട്രേഷൻ ഫീസ്, റിസർവ് ബാങ്ക് അനുമതിക്കുള്ള ചാർജ്, കറൻസി ട്രാൻസ്ഫർ സർവീസ് ചാർജ്, ജിഎസ്ടി, ഇൻഷുറൻസ് ഫീസ് എന്നിങ്ങനെ വിവിധ തലക്കെട്ടുകളിലാണ് ഇവർ പണം ആവശ്യപ്പെടുന്നത്. ഇരകളുടെ വിശ്വാസം നേടിയെടുക്കാൻ റിസർവ് ബാങ്കിൻ്റെ പേരിൽ വ്യാജമായി നിർമ്മിച്ച സർട്ടിഫിക്കറ്റുകളും ഇവർ ഇമെയിൽ വഴി അയച്ചു കൊടുക്കും. ഇത് വിശ്വസിച്ച് പണം നൽകുന്നതോടെ ഇരകൾ തട്ടിപ്പ് സംഘം നൽകുന്ന ബാങ്ക് അക്കൗണ്ടിലേക്ക് പണം നിക്ഷേപിക്കും.
എന്നാൽ പണം നൽകി കഴിഞ്ഞാൽ തട്ടിപ്പ് സംഘം ഉപയോഗിച്ചിരുന്ന ബാങ്ക് അക്കൗണ്ടും ഫോൺ നമ്പറുകളും പെട്ടെന്ന് പ്രവർത്തനരഹിതമാകും. ഇതോടെ തട്ടിപ്പിനിരയായവർക്ക് പണം നഷ്ടപ്പെടുകയും പരാതിപ്പെടാൻ പോലും സാധിക്കാത്ത അവസ്ഥയുമുണ്ടാകും.
അതേസമയം, പഴയ നോട്ടുകൾക്ക് ലക്ഷങ്ങൾ ലഭിക്കുമെന്ന് വിശ്വസിപ്പിച്ച് വലിയ തോതിലുള്ള തട്ടിപ്പുകളാണ് നടന്നുകൊണ്ടിരിക്കുന്നതെന്നും ഇത് സംബന്ധിച്ച് റിസർവ് ബാങ്ക് നേരത്തെ തന്നെ മുന്നറിയിപ്പ് നൽകിയിട്ടുണ്ടെന്നും തിരുവനന്തപുരം റീജണൽ ഓഫീസ് അറിയിച്ചു. ഇത്തരം വ്യാജ പരസ്യങ്ങളിൽ വിശ്വസിച്ച് പണം നഷ്ടപ്പെടുത്തരുതെന്നും വ്യക്തമാക്കി.

പഴയ രൂപയുടെ പേരിലുള്ള തട്ടിപ്പുകളെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.

Summary: A North Indian gang is attempting large-scale fraud by falsely advertising that old currency notes are worth up to five lakh rupees on social media. They are swindling money from people under various pretexts, and the Reserve Bank has issued a warning about such scams.

#OldCurrencyFraud, #RBIWarning, #OnlineScam, #NorthIndianGang, #SocialMediaFraud, #KeralaNews