'പുണ്യജലം' തളിച്ച് പീഡനം: വസ്ത്രം മാറ്റാൻ ആവശ്യപ്പെട്ടു, കയറിപ്പിടിച്ചു: ദുരനുഭവം വെളിപ്പെടുത്തി നടി
 

ക്വാലലംപൂർ: (KVARTHA) മലേഷ്യയിൽ നിന്നുള്ള ഇന്ത്യൻ വംശജയായ നടിയും മോഡലുമായ ലിഷാല്ലിനി കണാരൻ തനിക്ക് ക്ഷേത്ര പൂജാരിയിൽ നിന്നും നേരിടേണ്ടി വന്ന ലൈംഗികാതിക്രമം വെളിപ്പെടുത്തി. 

2021-ലെ മിസ് ഗ്രാൻഡ് മലേഷ്യയായിരുന്ന ലിഷാല്ലിനി തന്റെ ഇൻസ്റ്റാഗ്രാം പോസ്റ്റിലൂടെയാണ് ഈ ഞെട്ടിക്കുന്ന അനുഭവം പങ്കുവെച്ചത്. ‘ഇന്ത്യയിൽ നിന്നുള്ള പുണ്യജലമാണ്’ എന്ന് പറഞ്ഞ് ശരീരത്തിൽ വെള്ളം തളിച്ചതിന് ശേഷം പൂജാരി തന്നെ കയറിപ്പിടിച്ചെന്നാണ് ലിഷാല്ലിനി ആരോപിക്കുന്നത്.

സംഭവത്തെക്കുറിച്ച് ലിഷാല്ലിനി പറയുന്നത് ഇങ്ങനെ:

‘സാധാരണയായി ഞാൻ അമ്മയ്‌ക്കൊപ്പമാണ് ക്ഷേത്രത്തിൽ പോകാറുള്ളത്. എന്നാൽ കഴിഞ്ഞ ജൂൺ 21-ന് ഞാൻ ഒറ്റയ്ക്ക് പോയപ്പോഴാണ് ക്ഷേത്ര പൂജാരിയിൽനിന്ന് ഈ മോശം അനുഭവം ഉണ്ടായത്. ഇന്ത്യയിൽ നിന്ന് പ്രത്യേകമായി പൂജിച്ച ജലം നൽകാമെന്ന് പറഞ്ഞ് എന്നെ ഒരു മുറിയിലേക്ക് കൂട്ടിക്കൊണ്ടുപോയി. 

തുടർന്ന്, ആ ജലം എന്റെ ശരീരത്തിൽ തുടർച്ചയായി തളിച്ചതിന് ശേഷം വസ്ത്രം മാറ്റാൻ ആവശ്യപ്പെട്ടു. ഞാൻ അത് നിഷേധിച്ചപ്പോൾ 'ഇതൊക്കെ നിനക്ക് വേണ്ടിയാണ് ചെയ്യുന്നത്' എന്ന് പറഞ്ഞ് അയാൾ എന്റെ വസ്ത്രത്തിനുള്ളിൽ കൈയ്യിട്ട് മാറിടത്തിൽ സ്പർശിച്ചു. 

View this post on Instagram

A post shared by Lishalliny Kanaran (@lishallinykanaran)

പെട്ടെന്ന് ഞെട്ടിപ്പോയ എനിക്ക് സ്വബോധം വീണ്ടെടുക്കാൻ കുറച്ച് സമയം വേണ്ടിവന്നു. സ്വബോധം വീണ്ടെടുത്തപ്പോൾ ഞാൻ അവിടെനിന്ന് ഓടി രക്ഷപ്പെടുകയായിരുന്നു.’ – നടി ഇൻസ്റ്റാഗ്രാം പോസ്റ്റിൽ കുറിച്ചു.

ഈ സംഭവത്തിനുശേഷം ദിവസങ്ങളോളം താൻ ഞെട്ടി എഴുന്നേറ്റെന്നും, ഇന്നും ആ ദുരനുഭവത്തിൽ നിന്ന് പൂർണ്ണമായി മോചിതയായിട്ടില്ലെന്നും ലിഷാല്ലിനി പറയുന്നു. സംഭവം നടന്ന സമയത്ത് അമ്മ ഇന്ത്യയിലായിരുന്നു. 

അമ്മ തിരിച്ചെത്തിയതിന് ശേഷം വീട്ടുകാരെ കാര്യങ്ങൾ അറിയിച്ച് പരാതി നൽകിയെങ്കിലും, ഇത് പുറത്തറിഞ്ഞാൽ തങ്ങൾക്ക് തന്നെയാണ് പ്രശ്നമെന്ന് പറഞ്ഞ് പോലീസ് കേസ് ഒഴിവാക്കാനാണ് ശ്രമിച്ചതെന്നും നടി ആരോപിക്കുന്നു.

പിന്നീട് പോലീസുമായി ക്ഷേത്രത്തിലെത്തിയെങ്കിലും, അപ്പോഴേക്കും സമാനമായ മറ്റൊരു സംഭവത്തിൽ പ്രതിയായ പൂജാരിയെ ക്ഷേത്രത്തിൽ നിന്ന് പുറത്താക്കിയിരുന്നു. ക്ഷേത്ര ഭാരവാഹികൾ ഈ വിഷയം പുറത്തറിയാതിരിക്കാൻ ശ്രമിച്ചതുകൊണ്ട് അയാൾക്ക് യാതൊരു ശിക്ഷയും നൽകാതെ പറഞ്ഞുവിടുകയായിരുന്നെന്നും ലിഷാല്ലിനി പറയുന്നു.

അതേസമയം, കുറ്റാരോപിതനായ പൂജാരി ക്ഷേത്രത്തിൽ താൽക്കാലികമായി ജോലി ചെയ്തിരുന്ന ഇന്ത്യക്കാരനാണെന്ന് പോലീസ് അറിയിച്ചു. സ്ഥിരം പൂജാരി തിരിച്ചെത്തിയപ്പോൾ അയാൾ പോയെന്നും പോലീസ് വ്യക്തമാക്കി. 

'പുണ്യതീർത്ഥം' എന്ന് പറഞ്ഞ് ജലം തളിച്ച ശേഷം ലൈംഗികമായി പീഡിപ്പിക്കുന്ന രീതിയാണ് അയാൾ എല്ലാവരുടെയും അടുത്ത് പ്രയോഗിച്ചിരുന്നതെന്നും പോലീസ് കൂട്ടിച്ചേർത്തു. ഈ സംഭവത്തിൽ വിശദമായ അന്വേഷണം നടത്തണമെന്ന ആവശ്യം വിവിധ കോണുകളിൽ നിന്ന് ഉയർന്നിട്ടുണ്ട്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുകയും മറ്റുള്ളവരിലേക്ക് എത്തിക്കുകയും ചെയ്യുക.

Article Summary: Actress Lishallini Kanaran reveals harassment by temple priest in Malaysia.

#LishalliniKanaran #MalaysiaNews #TempleHarassment #Actress #SocialJustice #WomensSafety