Attacked | 'കോട്ടയത്ത് ജാമ്യത്തിലിറങ്ങിയയാള്‍ യുവതിയെ വെട്ടിപ്പരുക്കേല്‍പിച്ചു'; ഗുരുതരമായി പരുക്കേറ്റ 40 കാരി തീവ്രപരിചരണ വിഭാഗത്തില്‍ ചികിത്സയില്‍, പ്രതി ഒളിവില്‍

കോട്ടയം: (www.kvartha.com) വാരിമുട്ടത്ത് ജാമ്യത്തിലിറങ്ങിയയാള്‍ യുവതിയെ വെട്ടിപ്പരുക്കേല്‍പിച്ചതായി പരാതി. ആര്‍പ്പൂക്കര സ്വദേശി വിജിതക്കാണ് (40) വെട്ടേറ്റത്. ഗുരുതരമായി പരുക്കേറ്റ ഇവരെ കോട്ടയം മെഡികല്‍ കോളജ് ആശുപത്രിയില്‍ തീവ്രപരിചരണ വിഭാഗത്തില്‍ പ്രവേശിപ്പിച്ചു.

സംഭവത്തെ കുറിച്ച് പൊലീസ് പറയുന്നത്: ഓടോറിക്ഷ ഡ്രൈവര്‍ അനൂപ് (40) ആണ് യുവതിയെ വെട്ടിയത്. കൃത്യത്തിന് പിന്നാലെ ഇയാള്‍ ഒളിവില്‍ പോയിരിക്കുകയാണ്. രാവിലെ പതിനൊന്നോടെയായിരുന്നു സംഭവം. യുവതിയെ വീട്ടില്‍ക്കയറി വെട്ടുകയായിരുന്നു.

മൂന്ന് വര്‍ഷമായി ഭര്‍ത്താവുമായി പിണങ്ങി വാടകയ്ക്കായിരുന്നു യുവതിയുടെ താമസം. യുവതിയുടെ ഭര്‍ത്താവിനെ അനൂപ് നേരത്തെ ആക്രമിച്ചിരുന്നു. ആ കേസില്‍ പിടിയിലായ പ്രതി രണ്ടു ദിവസം മുന്‍പാണു ജാമ്യത്തില്‍ ഇറങ്ങിയത്.

അതേസമയം, വിജിതയുമായി അനൂപിന് ബന്ധമുണ്ടായിരുന്നെന്ന് പ്രദേശവാസികള്‍ പറയുന്നു. ഇവരെ അനൂപ് ശല്യപ്പെടുത്തിയിരുന്നതായാണ് വിവരം. രാവിലെ യുവതിയെ ആക്രമിച്ചതിന് പിന്നാലെ അനൂപ് സ്ഥലത്തുനിന്നും കടന്നുകളഞ്ഞു. പ്രതിക്കായി തിരച്ചില്‍ ഊര്‍ജിതമാക്കിയെന്ന് പൊലീസ് അറിയിച്ചു.