ഭാര്യയ്ക്കും മക്കള്‍ക്കുമൊപ്പം ബൈക്കില്‍ യാത്ര ചെയ്യുകയായിരുന്ന യുവാവിനെ അക്രമികള്‍ വെടിവെച്ചുകൊന്നു; ആഭരണങ്ങള്‍ കവര്‍ന്നശേഷം രക്ഷപ്പെട്ടു

ഗാസിയാബാദ്: (www.kvartha.com 04.07.2017) ഭാര്യയ്ക്കും മക്കള്‍ക്കുമൊപ്പം ബൈക്കില്‍ യാത്ര ചെയ്യുകയായിരുന്ന യുവാവിനെ അക്രമികള്‍ വെടിവെച്ചുകൊന്നശേഷം ആഭരണങ്ങള്‍ കവര്‍ന്ന് രക്ഷപ്പെട്ടു. ഉത്തര്‍പ്രദേശിലെ ഗാസിയാബാദിലെ മോടി നഗറില്‍ തിങ്കളാഴ്ചയാണ് സംഭവം. ഒരു വിവാഹ ചടങ്ങില്‍ പങ്കെടുത്ത ശേഷം ഭാര്യയ്ക്കും രണ്ട് മക്കള്‍ക്കുമൊപ്പം തിരിച്ചുവരികയായിരുന്ന ബ്രിജേഷ് കുമാര്‍(35) ആണ് അക്രമികളുടെ വെടിയേറ്റ് ദാരുണമായി കൊല്ലപ്പെട്ടത്. സ്വകാര്യ കമ്പനിയില്‍ ജോലി ചെയ്യുകയാണ് ബ്രിജേഷ്.

യുവാവിനെയും കുടുംബത്തെയും മറ്റൊരു ബൈക്കില്‍ എത്തിയ അക്രമികള്‍ ഇടിച്ചു വീഴ് ത്തുകയും യുവതിയുടെ ആഭരണങ്ങള്‍ കവര്‍ന്ന ശേഷം ഭാര്യയുടേയും മക്കളുടേയും മുന്നില്‍ വെച്ച് യുവാവിനെ വെടിവച്ച് വീഴ്ത്തുകയുമായിരുന്നു. വയറില്‍ ഗുരുതരമായി പരിക്കേറ്റ യുവാവിനെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.


മോഷണ ശ്രമത്തിനിടെ നടന്ന കൊലപാതകം എന്നതിനപ്പുറം സംഭവത്തില്‍ മറ്റെന്തെങ്കിലും ദുരൂഹതയുണ്ടോ എന്ന കാര്യവും പോലീസ് അന്വേഷിക്കുന്നുണ്ട്. യുവാവിന്റെ ബന്ധുവായ യുവതി അടുത്തിടെ ക്രൂരമായി പീഡിപ്പിക്കപ്പെട്ടിരുന്നു. ഇതില്‍ ആരോപണവിധേയയായ സ്ത്രീ അടുത്തിടെ ജയില്‍ മോചിതയായിരുന്നു. ഇവര്‍ക്ക് ഇതില്‍ എന്തെങ്കിലും പങ്കുണ്ടോ എന്ന കാര്യവും പോലീസ് അന്വേഷിക്കുന്നുണ്ട്.