ഭർത്താവിനെ തലക്കടിച്ചു കൊന്ന് റോഡിലിട്ടു: ചാക്കോച്ചൻ വധക്കേസിൽ ഭാര്യ റോസമ്മ കുറ്റക്കാരിയെന്ന് കോടതി

കണ്ണൂർ: (KVARTHA) ജില്ലയിലെ പെരിങ്ങോം പോലീസ് സ്റ്റേഷൻ പരിധിയിൽ വരുന്ന വയക്കര മുളപ്രയിലെ കുഞ്ഞു മോനെന്ന ചാക്കോച്ചനെ (60) തലക്കടിച്ച് കൊലപ്പെടുത്തിയ കേസിൽ ഭാര്യ റോസമ്മ കുറ്റക്കാരിയെന്ന് കോടതി കണ്ടെത്തി. 

തളിപ്പറമ്പ് അഡീഷണൽ സെഷൻസ് ജഡ്ജ് കെ. എൻ പ്രശാന്താണ് കേസിൽ വിധി പ്രഖ്യാപിച്ചത്. പ്രതി കുറ്റക്കാരിയെന്ന് കണ്ടെത്തിയതിനെ തുടർന്ന് ശിക്ഷാവിധി ശനിയാഴ്ച ഉണ്ടാകുമെന്നാണ് അറിയിച്ചിരിക്കുന്നത്. താൻ കുറ്റം ചെയ്തിട്ടില്ലെന്നും രോഗിയാണെന്നും റോസമ്മ കോടതിയെ അറിയിച്ചു. തുടർന്ന് പ്രതിയെ കണ്ണൂർ വനിതാ ജയിലിലേക്ക് റിമാൻഡ് ചെയ്തതായി അധികൃതർ വ്യക്തമാക്കി.

സ്വത്തിനെ ചൊല്ലിയുണ്ടായ കുടുംബവഴക്കിനെ തുടർന്നാണ് റോസമ്മ ഭർത്താവായ ചാക്കോച്ചനെ ഇരുമ്പ് പൈപ്പു കൊണ്ട് തലക്കടിച്ച് കൊലപ്പെടുത്തിയതെന്നാണ് പ്രോസിക്യൂഷൻ കേസ്. കൊലപാതകത്തിനു ശേഷം മൃതദേഹം റോഡിൽ ഉപേക്ഷിക്കുകയായിരുന്നു എന്നും പ്രോസിക്യൂഷൻ ആരോപിക്കുന്നു.

2013 ജൂലായ് ആറ് പുലർച്ചെയാണ് റോഡിൽ ചാക്കോച്ചന്റെ മൃതദേഹം കണ്ടെത്തിയ നിലയിൽ പെരിങ്ങോം പോലീസ് കേസ് രജിസ്റ്റർ ചെയ്തത്. വീട്ടിൽവെച്ച് ചാക്കോച്ചനെ കൊലപ്പെടുത്തിയ പ്രതി, ഏകദേശം 30 മീറ്ററോളം അകലെയുള്ള റോഡിലാണ് മൃതദേഹം കൊണ്ടിട്ടതെന്നാണ് അന്വേഷണ സംഘം വ്യക്തമാക്കിയത്. കൊല്ലപ്പെട്ട ചാക്കോച്ചൻ പയ്യന്നൂരിലെ ഒരു മെഡിക്കൽ ഷോപ്പിൽ ജീവനക്കാരനായിരുന്നു.

തളിപ്പറമ്പ് അഡീഷണൽ സെഷൻസ് കോടതി പ്രവർത്തനം ആരംഭിച്ചതിനു ശേഷം വിധി പറയുന്ന ആദ്യ കൊലക്കേസാണിത് എന്ന പ്രത്യേകതയുമുണ്ട്.

ഈ വാർത്തയെക്കുറിച്ച് നിങ്ങൾക്കെന്താണ് പറയാനുള്ളത്? 1. നിങ്ങളുടെ പ്രതികരണം കമൻ്റ് ചെയ്യുക. 

Article Summary: Kannur court finds wife Rosamma guilty of murdering husband Chackochan.

 #Kannur #ChackochanMurderCase #Rosamma #CourtVerdict #KeralaCrime #Taliparamba