കണ്ണപുരം സ്ഫോടനത്തിൽ രാഷ്ട്രീയ തർക്കം: പ്രതി അനൂപ് മാലിക്കിന്റെ രാഷ്ട്രീയബന്ധം പരിശോധിക്കണമെന്ന് കെ കെ രാഗേഷ്; ആരോപണം തള്ളി മാർട്ടിൻ ജോർജ്

കണ്ണൂർ: (KVARTHA) കണ്ണപുരം കീഴറയിലെ വാടക വീട്ടിലുണ്ടായ സ്ഫോടനക്കേസിലെ മുഖ്യപ്രതി അനൂപ് മാലിക്കിന്റെ രാഷ്ട്രീയ ബന്ധങ്ങൾ പരിശോധിക്കണമെന്ന് സി.പി.എം. കണ്ണൂർ ജില്ലാ സെക്രട്ടറി കെ.കെ. രാഗേഷ് ആവശ്യപ്പെട്ടു. 

അനൂപ് കോൺഗ്രസുമായി അടുത്ത ബന്ധം പുലർത്തുന്നയാളാണെന്നും അദ്ദേഹം ആരോപിച്ചു. അതേസമയം, രാഗേഷിന്റെ ആരോപണം ശുദ്ധ അസംബന്ധമാണെന്ന് ഡി.സി.സി. അധ്യക്ഷൻ മാർട്ടിൻ ജോർജ് തള്ളി. 

കണ്ണൂർ ചാലാട് സ്വദേശി മുഹമ്മദ് ആഷിം (29) സ്ഫോടനത്തിൽ മരിച്ച സംഭവത്തിൽ പ്രതികരണവുമായി ഇരുപാർട്ടികളുടെയും നേതൃത്വം രംഗത്തെത്തിയതോടെയാണ് വിഷയം രാഷ്ട്രീയ തർക്കങ്ങൾക്ക് വഴിമാറിയത്.

കെ.കെ. രാഗേഷിന്റെ ആരോപണങ്ങൾ

കണ്ണപുരം കീഴറയിൽ സ്ഫോടനം നടന്ന വീട് സന്ദർശിച്ച ശേഷം മാധ്യമങ്ങളോട് സംസാരിക്കുകയായിരുന്നു കെ.കെ. രാഗേഷ്. ഉത്സവകാലമല്ലാത്ത ഈ സമയത്ത് എന്തിനാണ് ഇത്രയും മാരകമായ സ്ഫോടകവസ്തുക്കൾ നിർമ്മിക്കുന്നതെന്ന് ബന്ധപ്പെട്ടവർ പരിശോധിക്കണമെന്നും അദ്ദേഹം ആവശ്യപ്പെട്ടു. 

അനൂപിന്റെ രാഷ്ട്രീയ ബന്ധങ്ങളെക്കുറിച്ച് വിശദമായ അന്വേഷണം നടത്തണമെന്നും രാഗേഷ് കൂട്ടിച്ചേർത്തു.

മാർട്ടിൻ ജോർജിന്റെ മറുപടി

കെ.കെ. രാഗേഷിന്റെ ആരോപണം വസ്തുതാപരമല്ലെന്ന് മാർട്ടിൻ ജോർജ് പറഞ്ഞു. രാഗേഷ് പറയുന്നത് ശുദ്ധ തോന്ന്യാവാസമാണെന്നും തനിക്ക് വേണമെങ്കിൽ സി.പി.എം. എന്നോ ബി.ജെ.പി. എന്നോ പറയാമായിരുന്നെന്നും അദ്ദേഹം കൂട്ടിച്ചേർത്തു. 

അതേസമയം, സംഭവത്തിൽ പോലീസിന്റെ ഭാഗത്ത് വീഴ്ചയുണ്ടായെന്നും കൃത്യമായ അന്വേഷണം വേണമെന്നും മാർട്ടിൻ ജോർജ് ആവശ്യപ്പെട്ടു. പ്രതി മുമ്പും സമാനമായ രീതിയിൽ സ്ഫോടകവസ്തുക്കൾ നിർമ്മിച്ചിട്ടുണ്ടെന്നും, ആരാണ്, എന്തിനാണ് ഇത് ചെയ്തതെന്ന് ഇപ്പോഴും വ്യക്തമല്ലെന്നും അദ്ദേഹം പറഞ്ഞു. 

നാടിന്റെ മുക്കിലും മൂലയിലും ബോംബ് പൊട്ടി സാധാരണക്കാർക്ക് പരിക്കേൽക്കുന്ന സാഹചര്യം നിലവിലുണ്ടെന്നും, അനൂപ് മാലിക് എന്തിനാണ് ബോംബ് നിർമ്മിച്ചതെന്നും അത് ആർക്കാണ് നൽകിയതെന്നും അന്വേഷിക്കണമെന്നും മാർട്ടിൻ ജോർജ് ആവശ്യപ്പെട്ടു.

സ്ഫോടനക്കേസിലെ ഈ രാഷ്ട്രീയ വിവാദത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Kannur blast case turns into political controversy.

#Kannur, #BombBlast, #KeralaPolitics, #Kannapuram, #CPM, #Congress