Arrested | വീട്ടമ്മയെ ഗ്യാസ് തുറന്ന് വിട്ട് തീകൊളുത്തി കൊന്നെന്ന കേസ്; പൊതുപ്രവര്ത്തകനായ അയല്വാസി പിടിയില്
Nov 26, 2022, 15:03 IST
ADVERTISEMENT
ഇടുക്കി: (www.kvartha.com) ചെറുതോണി നാരകക്കാനത്തെ വീട്ടമ്മയെ ഗ്യാസ് തുറന്ന് വിട്ട് തീകൊളുത്തിക്കൊന്നെന്ന കേസില് പ്രതി പിടിയില്. കുമ്പിടിയമാക്കല് ചിന്നമ്മ ആന്റണിയെ കൊലപ്പെടുത്തിയ കേസില് അയല്വാസിയും പൊതു പ്രവര്ത്തകനുമായ നാരകക്കാനം വെട്ടിയാങ്കല് സജി എന്ന തോമസ് വര്ഗീസ് (54) ആണ് കമ്പത്ത് നിന്ന് പൊലീസ് പിടിയിലായത്.
സംഭവത്തെ കുറിച്ച് പൊലീസ് പറയുന്നത്: കഴിഞ്ഞ ബുധനാഴ്ച വൈകിട്ട് നാലരയോടെയാണ് ചിന്നമ്മ ആന്റണിയെ വീടിനുള്ളില് കത്തിക്കരിഞ്ഞു മരിച്ചനിലയില് കണ്ടെത്തിയത്. സംഭവം നടന്ന സമയത്ത് ചിന്നമ്മ മാത്രമാണ് വീട്ടിലുണ്ടായിരുന്നത്. മകനും മരുമകളും ഇവരുടെ മൂന്ന് മക്കളുമാണ് വീട്ടില് താമസിച്ചിരുന്നത്. കൊച്ചുമകള് സ്കൂള് വിട്ട് വീട്ടിലെത്തിയപ്പോഴാണ് കത്തിക്കരിഞ്ഞ നിലയില് ചിന്നമ്മയുടെ മൃതദേഹം കണ്ടത്. ഗ്യാസ് സിലിന്ഡര് മറിഞ്ഞ് വീണുകിടക്കുന്ന നിലയിലായിരുന്നു. അപകടമാണെന്നാണ് ആദ്യം കരുതിയത്.
പിന്നീട് സംഭവം, മോഷണത്തിനിടെ നടന്ന കുറ്റകൃത്യമെന്ന് പൊലീസ് സ്ഥിരീകരിച്ചിരുന്നു. വീട്ടമ്മ ധരിച്ചിരുന്ന സ്വര്ണാഭരണങ്ങളാണ് മോഷണം പോയത്. വീടിനെയും വീട്ടുകാരെയും കുറിച്ച് വ്യക്തമായ ധാരണയുള്ളവരാണ് സംഭവത്തിന് പിന്നിലെന്നും പൊലീസ് കണ്ടെത്തി. തുടര്ന്ന് നടന്ന അന്വേഷണത്തിലാണ് സജി കുടുങ്ങിയത്.
മോഷണം തടഞ്ഞപ്പോഴാണ് ചിന്നമ്മയെ കൊലപ്പെടുത്തിയതെന്ന് പ്രതി പൊലീസിനോട് സമ്മതിച്ചു. വീട്ടില്നിന്ന് മോഷ്ടിച്ച വളയും മാലയും ഇയാള് പണയം വച്ചു. വെട്ടുകത്തിയുടെ പുറകുവശം കൊണ്ട് തലയ്ക്ക് അടിച്ചുവീഴ്ത്തിയ ശേഷം വെട്ടി, തുടര്ന്ന് വീട്ടമ്മയെ ജീവനോടെ കത്തിച്ചു കൊല്ലുകയായിരുന്നു. മറ്റാരുമില്ലെന്ന് ഉറപ്പുവരുത്തിയ ശേഷമാണ് കുറ്റവാളി വീട്ടിലെത്തി കൃത്യം നടത്തിയത്.
അന്വേഷണത്തിന്റെ ഭാഗമായി ഒട്ടേറെ പ്രദേശവാസികളെയും അതിഥിത്തൊഴിലാളികളെയും കഴിഞ്ഞ രണ്ടു ദിവസത്തിനുള്ളില് ചോദ്യം ചെയ്തിരുന്നു. ഗ്രാമീണമേഖലയില് സിസിടിവി ക്യാമറകള് ഏറെ ഇല്ലാത്തത് അന്വേഷണത്തെ ബാധിച്ചിരുന്നു. മൊബൈല് ലൊകേഷനും ഫോണ് വിളികളും കേന്ദ്രീകരിച്ചായിരുന്നു അന്വേഷണം.
ജില്ലാ പൊലീസ് മേധാവി വി യു കുര്യാക്കോസിന്റെ മേല്നോട്ടത്തില് കട്ടപ്പന ഡിവൈഎസ്പി നിഷാദ്മോന്റെ നേതൃത്വത്തിലുള്ള പ്രത്യേക സംഘത്തിനാണ് അന്വേഷണച്ചുമതലയെന്ന് പൊലീസ് കൂട്ടിച്ചേര്ത്തു.
Keywords: News,Kerala,State,Idukki,Crime,Accused,Top-Headlines,Case, Police,Trending, Idukki: Social Worker arrested in Murder case at Narakakkanam
നിങ്ങളുടെ അഭിപ്രായങ്ങൾ കെവാർത്തയുടെ ഫെയ്സ്ബുക്ക് പേജിൽ പങ്കുവെക്കാം.
അസഭ്യവും അശ്ലീലവും വിദ്വേഷം വളർത്തുന്നതുമായ കമന്റുകൾ പാടില്ല. നിയമവിരുദ്ധമായ
ഇത്തരം പരാമർശങ്ങൾ നടത്തുന്നത് ഐടി ആക്ട് പ്രകാരം കുറ്റകരമാണ്. കർശന
നിയമനടപടികൾ നേരിടേണ്ടിവന്നേക്കാം.
