Business rules | സംരംഭകർക്ക് ബിസിനസ് ഇനി എളുപ്പമാകും; പൊല്ലാപ്പാവുന്ന നിയമങ്ങൾ മാറുന്നു; കാതലായ മാറ്റത്തിന് ഒരുങ്ങി കേന്ദ്ര സർകാർ

ന്യൂഡെൽഹി: (www.kvartha.com) കുറ്റകൃത്യങ്ങളുടെ വിഭാഗവുമായി ബന്ധപ്പെട്ട പല ബിസിനസ് നിയമങ്ങളും വലിയ തോതിൽ കേന്ദ്രസർകാർ മാറ്റാൻ പോകുകയാണെന്ന് റിപോർട്. ഇത്തരം നിയമങ്ങൾ ഒഴിവാക്കുന്നതിലൂടെ, അസംഘടിത മേഖലയിൽ പ്രവർത്തിക്കുന്ന നിരവധി വ്യവസായ സംരംഭങ്ങളെ സംഘടിത മേഖലയിലേക്ക് സ്വയം കൊണ്ടുവരാനാവും. അതുവഴി അവർക്ക് വിവിധ തരത്തിലുള്ള സർകാർ ആനുകൂല്യങ്ങളും ജോലി ചെയ്യുന്ന ജീവനക്കാർക്ക് പ്രയോജനവും ലഭിക്കും.
                   
ഇതിനായി പാർലമെന്റിന്റെ ശീതകാല സമ്മേളനത്തിൽ ബിൽ കൊണ്ടുവരാനുള്ള ഒരുക്കത്തിലാണ് സർകാരെന്ന് ജാഗരൺ റിപോർട് ചെയ്തു. ദിവസങ്ങൾക്ക് മുമ്പ് വാണിജ്യ-വ്യവസായ മന്ത്രി പിയൂഷ് ഗോയലും ഇക്കാര്യം സ്ഥിരീകരിച്ചിരുന്നു. നിലവിൽ, വ്യവസായ സംരംഭങ്ങളുടെ നടത്തിപ്പിൽ നൂറുകണക്കിന് നിയമങ്ങൾ പാലിക്കേണ്ടതുണ്ട്, അവഗണിച്ചാൽ ജയിലിൽ പോകേണ്ടിവരും. അതിനാൽ, 100-ലധികം തൊഴിലാളികളുള്ള നിർമാണ യൂണിറ്റുകൾ നടത്തുന്ന സംരംഭകർ, സർകാർ നിയമങ്ങളുമായി ബന്ധപ്പെട്ട കാര്യങ്ങൾ കൈകാര്യം ചെയ്യാൻ പ്രതിവർഷം 10-15 ലക്ഷം രൂപ ചിലവഴിച്ച് ലെയ്‌സണിംഗ് ഓഫീസർമാരെ നിയമിക്കുന്നു.

സ്രോതസുകൾ അനുസരിച്ച്, ബിസിനസ് സംബന്ധമായ എല്ലാ ഫോമുകളും ഡിജിറ്റൽ രൂപത്തിൽ പൂരിപ്പിക്കുന്നത് നിർബന്ധമാക്കിയേക്കാം. കൂടാതെ, അസംസ്കൃത വസ്തുക്കളുടെ തൂക്കത്തിന് ഉപയോഗിക്കുന്ന ഉപകരണങ്ങൾ എല്ലാ വർഷവും സാക്ഷ്യപ്പെടുത്തേണ്ടതുണ്ട്. മാനുഫാക്ചറിംഗ് യൂണിറ്റിൽ നിന്ന് സ്റ്റാറ്റിസ്റ്റിക്സ് വകുപ്പ് നിരവധി കണക്കുകൾ തേടുകയും അത് നൽകുന്നതിൽ വീഴ്ച വരുത്തിയാൽ നടപടികൾ സ്വീകരിക്കുകയും ചെയ്യുന്നു. ഫോം സ്വമേധയാ പൂരിപ്പിക്കുമ്പോൾ എന്തെങ്കിലും വിവരങ്ങൾ ഒഴിവാക്കിയാൽ, അതും കുറ്റമായി കണക്കാക്കും. അളവിലും തൂക്കത്തിലും നേരിയ വ്യത്യാസം വന്നാൽ അത് കുറ്റമായി കണക്കാക്കും. ഈ വ്യവസ്ഥകൾ സർകാർ എടുത്തുകളയാൻ പോകുന്നുവെന്നാണ് വിവരം.