ജയിൽ ചാടിയ ഗോവിന്ദച്ചാമി പിടിയിൽ: വിയ്യൂരിലേക്ക് മാറ്റാൻ നീക്കം, പിന്നിൽ വൻ ആസൂത്രണം

കണ്ണൂർ: (KVARTHA) സെൻട്രൽ ജയിലിൽ നിന്ന് ചാടിയ പ്രതി ഗോവിന്ദച്ചാമിയെ 14 ദിവസത്തേക്ക് റിമാൻഡ് ചെയ്തു. വെള്ളിയാഴ്ച വൈകീട്ട് കണ്ണൂർ ഒന്നാം ക്ലാസ് മജിസ്‌ട്രേറ്റ് കോടതിയിലാണ് ഇയാളെ ഹാജരാക്കിയത്. ഗോവിന്ദച്ചാമി ചാടിപ്പോയ കണ്ണൂർ പള്ളിക്കുന്നിലെ സെൻട്രൽ ജയിലിൽ തന്നെയാണ് നിലവിൽ ഇയാളെ അടച്ചിരിക്കുന്നത്. 

കൊടുംകുറ്റവാളിയായതിനാൽ സുരക്ഷാ കാരണങ്ങൾ പരിഗണിച്ച് കണ്ണൂർ സെൻട്രൽ ജയിലിൽ നിന്ന് വിയ്യൂരിലെ അതിസുരക്ഷാ ജയിലിലേക്ക് മാറ്റാൻ ധാരണയായിട്ടുണ്ട്. സംസ്ഥാനത്തെ ജയിലുകളിലെ സുരക്ഷാ വിഷയങ്ങൾ സംബന്ധിച്ച് ശനിയാഴ്ച രാവിലെ 11 മണിക്ക് മുഖ്യമന്ത്രി യോഗം വിളിച്ചിട്ടുണ്ട്. ഈ യോഗത്തിനുശേഷമായിരിക്കും അന്തിമ തീരുമാനം.

ഇതിനിടെ, കോടതിയിൽ ഹാജരാക്കുന്നതിന് മുൻപ് ഗോവിന്ദച്ചാമിയെ തെളിവെടുപ്പിനായി കണ്ണൂർ സെൻട്രൽ ജയിലിലെത്തിച്ചിരുന്നു. അതീവ സുരക്ഷയോടെയാണ് ഗോവിന്ദച്ചാമിയെ ജയിലിൽ എത്തിച്ചത്. 

അതീവ സുരക്ഷയുള്ള ജയിലിൽ നിന്ന് എങ്ങനെയാണ് ഇയാൾ പുറത്തെത്തിയതെന്ന് അറിയുന്നതിനാണ് വിശദമായ തെളിവെടുപ്പ് നടത്തിയത്. ഏകദേശം രണ്ട് മണിക്കൂർ നീണ്ട ചോദ്യം ചെയ്യലിന് ശേഷമാണ് കണ്ണൂർ ടൗൺ പോലീസ് ഇയാളെ തെളിവെടുപ്പിനായി കൊണ്ടുവന്നത്.

വെള്ളിയാഴ്ച പുലർച്ചെ 4:30-ഓടെയാണ് ഗോവിന്ദച്ചാമി ജയിൽ ചാടിയത്. മാസങ്ങൾ നീണ്ട ആസൂത്രണത്തിനൊടുവിലാണ് ഇയാൾ ജയിൽ ചാടിയതെന്നാണ് പ്രാഥമിക വിവരം. ഒന്നര മാസത്തോളം സമയമെടുത്താണ് മൂർച്ചയുള്ള ആയുധം ഉപയോഗിച്ച് ജയിലഴികൾ മുറിച്ചത്. 

ജയിൽ വർക്ക്‌ഷോപ്പിൽ നിന്നാണ് ആയുധമെടുത്തതെന്നും ഇയാൾ മൊഴി നൽകി. മുറിച്ച പാടുകൾ തുണികൊണ്ട് കെട്ടി മറയ്ക്കുകയും ചെയ്തു. മതിൽ ചാടാൻ പാൽപ്പാത്രങ്ങളും ഡ്രമ്മും ഉപയോഗിച്ചു. ഗുരുവായൂരിലെത്തി മോഷണം നടത്തുകയായിരുന്നു തന്റെ ലക്ഷ്യമെന്നും, കവർച്ച ചെയ്യുന്ന പണവുമായി മറ്റ് സംസ്ഥാനങ്ങളിലേക്ക് കടക്കാനായിരുന്നു പദ്ധതിയെന്നും ഗോവിന്ദച്ചാമി പോലീസിന് മൊഴി നൽകി. റെയിൽവേ സ്റ്റേഷൻ എവിടെയാണെന്ന് വ്യക്തമായി അറിയാത്തതുകൊണ്ടാണ് ജയിലിനുള്ളിൽവെച്ച് പുറത്തുള്ള ചിലരുമായി നിരന്തരം ബന്ധപ്പെട്ടതെന്നും ഇയാൾ വെളിപ്പെടുത്തി.

ജയിലിൽ ഗുരുതര സുരക്ഷാ വീഴ്ചയുണ്ടായെന്ന് കണ്ടെത്തിയിട്ടുണ്ട്. ഈ സംഭവത്തിൽ നാല് ഉദ്യോഗസ്ഥരെ സസ്പെൻഡ് ചെയ്തിട്ടുണ്ട്. സെല്ലിന്റെ അഴികൾ മുറിച്ച് ഏഴര മീറ്റർ ഉയരമുള്ള മതിലും ചാടി ഒറ്റക്കയ്യൻ കൊലയാളി രക്ഷപ്പെട്ടിട്ടും അധികൃതർ അറിഞ്ഞത് മണിക്കൂറുകൾ വൈകിയാണ്. 

രാവിലത്തെ പരിശോധനയിൽ തടവുകാരെല്ലാം അഴിക്കുള്ളിൽ ഉണ്ടെന്ന് ഗാർഡ് ഓഫീസർ റിപ്പോർട്ട് നൽകിയിരുന്നു. മതിലിലെ തുണി കണ്ടശേഷമാണ് ജയിൽ ചാടിയെന്ന് മനസ്സിലായത്. വീണ്ടും പരിശോധിച്ചപ്പോഴാണ് ഗോവിന്ദച്ചാമിയാണ് ചാടിയതെന്ന് തിരിച്ചറിഞ്ഞത്.

സൗമ്യ വധക്കേസിലെ പ്രതിയായ ഗോവിന്ദച്ചാമിയുടെ ജയിൽ ചാട്ടം ഒന്നര മാസത്തെ ആസൂത്രണത്തിനൊടുവിലാണെന്ന് പ്രാഥമിക മൊഴി സ്ഥിരീകരിക്കുന്നു. പോലീസ് ചോദ്യം ചെയ്യലിലാണ് ജയിൽ ചാട്ടവുമായി ബന്ധപ്പെട്ട് ഞെട്ടിക്കുന്ന വിവരങ്ങൾ ഗോവിന്ദച്ചാമി വെളിപ്പെടുത്തിയത്. 

ഈ വിവരങ്ങളുടെ അടിസ്ഥാനത്തിൽ ഗോവിന്ദച്ചാമിയെ ജയിൽ ചാടാൻ സഹായിച്ചവരെക്കുറിച്ചും കൂടുതൽ പേർക്ക് സംഭവത്തിൽ പങ്കുണ്ടോ എന്നതിനെക്കുറിച്ചും പോലീസ് വിശദമായ അന്വേഷണം ആരംഭിച്ചു. ജയിൽ അധികൃതരുടെ ഭാഗത്തുനിന്നുണ്ടായ സുരക്ഷാ വീഴ്ചയും പോലീസ് പരിശോധിക്കുന്നുണ്ട്.

ഈ വാർത്തയെക്കുറിച്ച് നിങ്ങളുടെ അഭിപ്രായം എന്താണ്? കമന്റ് ചെയ്യുക! 

Article Summary: Govindachamy remanded, possible transfer to high-security prison.

#Govindachamy, #Jailbreak, #KannurJail, #KeralaNews, #ViyyurPrison, #CrimeNews