സിനിമയെ വെല്ലുന്ന രക്ഷാപ്രവർത്തനം; വാതിൽ ചവിട്ടിപ്പൊളിച്ച് പോലീസ് അകത്തേക്ക്, ഫാനിൽ കുരുക്കിടാൻ ശ്രമിച്ച യുവാവിന് പുനർജന്മം

കോഴിക്കോട്: (KVARTHA) സിനിമക്കഥകളെ വെല്ലുന്ന നാടകീയ മുഹൂർത്തങ്ങൾക്കൊടുവിൽ, ആത്മഹത്യയുടെ വക്കിലെത്തിയ യുവാവിനെ വാതിൽ ചവിട്ടിപ്പൊളിച്ച് അകത്തുകയറി ജീവിതത്തിലേക്ക് തിരികെ കൊണ്ടുവന്ന് നടക്കാവ് പോലീസ്. കണ്ണൂർ കൂത്തുപറമ്പ് പൊലീസ് സ്റ്റേഷൻ പരിധിയിലെ യുവാവിനെയാണ് കോഴിക്കോട് നടക്കാവ് പോലീസ് സ്റ്റേഷനിലെ ഉദ്യോഗസ്ഥർ സാഹസികമായി രക്ഷപ്പെടുത്തിയത്. വെള്ളിയാഴ്ച രാത്രിയായിരുന്നു സംഭവം.

കൂത്തുപറമ്പിൽ നിന്ന് കാണാതായ യുവാവിന്റെ മൊബൈൽ ടവർ ലൊക്കേഷൻ കോഴിക്കോട് നടക്കാവ് സ്റ്റേഷൻ പരിധിയിൽ കാണിക്കുന്നുണ്ടെന്ന വിവരം കൂത്തുപറമ്പ് പോലീസ് കൈമാറിയതാണ് സംഭവങ്ങളുടെ തുടക്കം. എരഞ്ഞിപ്പാലം, ശാസ്ത്രിനഗർ എന്നിവിടങ്ങളിലാണ് ലൊക്കേഷൻ കാണിച്ചിരുന്നത്. ജനങ്ങൾ തിങ്ങിപ്പാർക്കുന്നതും നിരവധി ഹോട്ടലുകളും ഹോസ്റ്റലുകളുമുള്ള ഈ പ്രദേശത്ത് ആളെ കണ്ടെത്തുക എന്നത് വലിയ വെല്ലുവിളിയായിരുന്നു.

വിവരം ലഭിച്ചയുടൻ നടക്കാവ് സ്റ്റേഷനിലെ എഎസ്ഐ പി. സുനീഷ്, സിപിഒ എൻ. നിഷോബ്, ഡ്രൈവർ എം. മുഹമ്മദ് ജിഷാദ് എന്നിവരടങ്ങിയ സംഘം സ്ഥലത്തെത്തി. ജീപ്പ് പോകാൻ കഴിയാത്ത ഇടവഴികളിലൂടെയും മറ്റും അഞ്ച് കിലോമീറ്ററോളം നടന്നാണ് ഇവർ തിരച്ചിൽ നടത്തിയത്. ഇതിനിടെ പോലീസുകാർക്ക് നേരെ തെരുവുനായയുടെ ആക്രമണവും ഉണ്ടായി. ഇതൊന്നും വകവെക്കാതെ ഹോട്ടലുകളിലും വീടുകളിലും യുവാവിന്റെ ഫോട്ടോ കാണിച്ചു പോലീസ് അന്വേഷണം തുടർന്നു.

ആദ്യം പരിശോധിച്ച സ്ഥലങ്ങളിൽ വീണ്ടും നടത്തിയ തിരച്ചിലിലാണ് കോ-ഓപ്പറേറ്റീവ് ആശുപത്രിക്ക് സമീപത്തെ ഒരു ഹോട്ടലിലെ ജീവനക്കാർ യുവാവിനെ തിരിച്ചറിഞ്ഞത്. ഉടൻ തന്നെ പോലീസ് സംഘം ഹോട്ടലിന്റെ മൂന്നാം നിലയിലേക്ക് കുതിച്ചു. മുറിയിൽ തട്ടിവിളിച്ചിട്ടും മറുപടി ലഭിച്ചില്ല. തുടർന്ന് റൂം ബോയിയോട് സ്പെയർ കീ ആവശ്യപ്പെട്ടെങ്കിലും അത് ലഭിച്ചില്ല.

മുറി അകത്തുനിന്ന് കുറ്റിയിട്ട നിലയിലായിരുന്നു. ഒടുവിൽ കീഹോളിലൂടെ നോക്കിയ എഎസ്ഐ കണ്ടത് യുവാവ് കട്ടിലിന് മുകളിൽ കയറിനിന്ന് ഫാനിൽ കസവുമുണ്ട് ഉപയോഗിച്ച് കുരുക്കിടാൻ ശ്രമിക്കുന്നതാണ്. അപകടം മണത്ത പോലീസ് സംഘം ഒട്ടും സമയം കളയാതെ വാതിൽ ചവിട്ടിപ്പൊളിച്ച് അകത്തുകയറുകയായിരുന്നു. പോലീസിന്റെ പെട്ടെന്നുള്ള ഈ നീക്കമാണ് യുവാവിന്റെ ജീവൻ രക്ഷിച്ചത്.

പ്രണയനൈരാശ്യത്തെത്തുടർന്നാണ് യുവാവ് ജീവനൊടുക്കാൻ ശ്രമിച്ചതെന്ന് മുറിയിൽ നിന്ന് കണ്ടെടുത്ത ആത്മഹത്യാക്കുറിപ്പിൽ നിന്ന് വ്യക്തമായി. പോലീസ് ഉദ്യോഗസ്ഥർ യുവാവിനെ ആശ്വസിപ്പിക്കുകയും കൗൺസിലിംഗ് നൽകുകയും ചെയ്തു. തുടർന്ന് വീട്ടുകാരെ വിളിച്ചുവരുത്തി യുവാവിനെ അവർക്കൊപ്പം പറഞ്ഞയച്ചു. കൃത്യസമയത്ത് ഇടപെട്ട് ഒരു ജീവൻ രക്ഷിച്ച പോലീസ് ഉദ്യോഗസ്ഥർക്ക് അഭിനന്ദനപ്രവാഹമാണ് ലഭിക്കുന്നത്.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. പുതിയ അപ്‌ഡേറ്റുകൾ ഉടൻ ലഭിക്കാൻ ഞങ്ങളുടെ ഫേസ്ബുക്ക് പേജ് ഫോളോ ചെയ്യുക. ഈ വാർത്ത ഉപകാരപ്രദമെന്ന് തോന്നിയാൽ സുഹൃത്തുകൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Kerala Police (Nadakkavu Station) dramatically rescued a missing youth from Kannur who attempted suicide in a Kozhikode hotel room by kicking open the door just in time.

#KeralaPolice #NadakkavuPolice #RescueMission #RealLifeHero #KozhikodeNews #SuicidePrevention #GoodSamaritan