റോഡിലൂടെ പോയപ്പോള്‍ നായ കുരച്ചു; പ്രകോപിതനായ യുവാവ് സഹോദരനൊപ്പം വന്ന് വടിവാള്‍ കൊണ്ട് നായയെ തുരുതുരാ വെട്ടി; തടയാന്‍ ചെന്ന ഉടമയ്ക്കും മര്‍ദനം; വീട്ടുപകരണങ്ങളും നശിപ്പിച്ചു; സംഭവത്തിനുശേഷം സ്ഥലംവിട്ട യുവാക്കളെ പോലീസ് തെരയുന്നു

തിരുവല്ല: (www.kvvartha.com 22.10.2019) റോഡിലൂടെ പോയപ്പോള്‍ നായ കുരച്ചു. പ്രകോപിതനായ യുവാവ് സഹോദരനൊപ്പം വന്ന് വടിവാള്‍ കൊണ്ട് നായയെ തുരുതുരാ വെട്ടി. തടയാന്‍ ചെന്ന ഉടമയ്ക്കും മര്‍ദനം. വീട്ടുപകരണങ്ങളും നശിപ്പിച്ചു.സംഭവത്തിനുശേഷം സ്ഥലംവിട്ട യുവാക്കളെ പോലീസ് തെരയുന്നു. ശനിയാഴ്ച വൈകിട്ട് നാലു മണിയോടെയാണ് സംഭവം.

സംഭവത്തില്‍ വളര്‍ത്തുനായയെ വടിവാള്‍കൊണ്ടു വെട്ടിയതിനും വീട് ആക്രമിച്ചതിനും സഹോദരങ്ങള്‍ക്കെതിരെ പോലീസ് കേസെടുത്തു. നന്നൂര്‍ പല്ലവിയില്‍ അജിത് (40), സഹോദരന്‍ അനില്‍ (35) എന്നിവര്‍ക്കെതിരെയാണ് തിരുവല്ല പോലീസ് കേസെടുത്തത്. മൃഗാവകാശ സമിതിയായ എസ്പിസിഎയും (സൊസൈറ്റി ഫോര്‍ ദ് പ്രിവന്‍ഷന്‍ ഓഫ് ക്രുവല്‍റ്റി ടു അനിമല്‍സ്) സംഭവത്തില്‍ കേസെടുത്തിട്ടുണ്ട്.


സംഭവം ഇങ്ങനെയാണ്;

അജിത് റോഡിലൂടെ പോയപ്പോള്‍ ഐശ്വര്യ ഭവനില്‍ സന്തോഷ് കുമാറിന്റെ വളര്‍ത്തു നായ കുരച്ചതാണ് പ്രശ്‌നങ്ങള്‍ക്ക് തുടക്കം. കുര നിര്‍ത്താത്തതിനെ തുടര്‍ന്ന് പ്രകോപിതനായ സന്തോഷ് കാര്‍പോര്‍ച്ചില്‍ കയറി നായയെ അടിച്ചു. തടയാനെത്തിയ സന്തോഷ് കുമാറിനെയും മര്‍ദിച്ചു. തുടര്‍ന്ന് വീട്ടിലേക്ക് മടങ്ങിപ്പോയ അജിത് സഹോദരന്‍ അനിലുമായെത്തി വീണ്ടും ആക്രമണം നടത്തി.

നായയുടെ ശരീരത്തില്‍ അഞ്ച് വെട്ടുകള്‍ ഉണ്ട്. മുറിവേറ്റ നായയെ വീട്ടുകാര്‍ മൃഗാശുപത്രിയില്‍ എത്തിച്ച് ചികിത്സിച്ചു. സന്തോഷ് കുമാറിന്റെ കാര്‍, ടിവി, വീട്ടുപകരണങ്ങള്‍ എന്നിവ നശിപ്പിച്ചതായും പരാതിയുണ്ട്. സംഭവത്തിനുശേഷം ഒളിവില്‍ പോയ പ്രതികള്‍ക്കായി തിരച്ചില്‍ തുടരുകയാണെന്ന് സിഐ കെ ബൈജു കുമാര്‍ പറഞ്ഞു. ഉടന്‍തന്നെ പ്രതികളെ അറസ്റ്റ് ചെയ്യുമെന്ന് സിഐ പറഞ്ഞു.

അജിത്തിനെ കാണുമ്പോള്‍ നായ കുരയ്ക്കുന്നത് പതിവായിരുന്നു. ഇതിന്റെ പ്രകോപനമാണ് വീടു കയറിയുള്ള ആക്രമണത്തില്‍ കലാശിച്ചത്.