കുടുംബവഴക്ക്, ഭീഷണി: ബേക്കൽ കോട്ടയിൽ നാടകീയ രംഗങ്ങൾ! മൂന്നു മക്കളുമായി എത്തിയ പിതാവിനെ പോലീസ് രക്ഷപ്പെടുത്തി

ബേക്കൽ: (KVARTHA) കുടുംബ പ്രശ്‌നത്തെത്തുടർന്ന് മൂന്നു മക്കളുമായി ബേക്കൽ കോട്ടയിലെത്തിയ ആരോഗ്യവകുപ്പ് ഉദ്യോഗസ്ഥൻ ഇസ്രായേലിലുള്ള ഭാര്യക്ക് വീഡിയോ കോൾ ചെയ്ത് ആത്മഹത്യാ ഭീഷണി മുഴക്കി. തുടർന്ന് പോലീസ് നടത്തിയ സമയോചിതമായ ഇടപെടലിൽ ഇദ്ദേഹത്തെയും കുട്ടികളെയും രക്ഷപ്പെടുത്തി. ബേക്കൽ കോട്ടയ്ക്ക് സമീപമുള്ള കടലിൽ ചാടി മരിക്കുമെന്ന് ഭീഷണി മുഴക്കിയെന്നാണു പോലീസ് നൽകുന്ന വിവരം.

പോലീസിന്റെയും ടൂറിസം പോലീസിന്റെയും സംയുക്തമായ രക്ഷാപ്രവർത്തനമാണ് നാല് ജീവനുകൾ രക്ഷിക്കാൻ കാരണമായത്. തളിപ്പറമ്പ് കുടിയാൻമല സ്വദേശിയാണ് കുടുംബ പ്രശ്‌നങ്ങളെ തുടർന്ന് മൂന്നു മക്കളെയും കൂട്ടി ബേക്കൽ കോട്ടയിലെത്തിയത്. 

ഇവിടെ നിന്നാണ് ഇസ്രായേലിൽ ജോലി ചെയ്യുന്ന ഭാര്യയ്ക്ക് വീഡിയോ കോൾ ചെയ്തത്. ഭീഷണി മുഴക്കിയതിനെ തുടർന്ന് ഭാര്യ ഉടൻ തന്നെ കുടിയാൻമല പോലീസിനെ വിവരം അറിയിക്കുകയായിരുന്നു.

വിവരം ലഭിച്ച ഉടൻ തന്നെ കുടിയാൻമല പോലീസ് ബേക്കൽ പോലീസിലേക്ക് സന്ദേശം കൈമാറി. ബേക്കൽ ടൂറിസം പോലീസ് ഉടൻ തന്നെ തിരച്ചിൽ ആരംഭിച്ചു. മൊബൈൽ ടവർ ലൊക്കേഷൻ പരിശോധിച്ച് നടത്തിയ അന്വേഷണത്തിൽ ഇവർ ബേക്കൽ കോട്ട റെഡ് മൂൺ ബീച്ച് ഭാഗത്താണ് ഉള്ളതെന്ന് പോലീസിന് വിവരം ലഭിച്ചു.

തുടർന്ന്, റെഡ് മൂൺ ബീച്ചിന് സമീപം വെച്ച് ആരോഗ്യവകുപ്പ് ഉദ്യോഗസ്ഥനെയും കുട്ടികളെയും കണ്ടെത്തുകയായിരുന്നു. പോലീസ് ഇവരെ സ്റ്റേഷനിലേക്ക് കൂട്ടിക്കൊണ്ടുപോയി. 11, 9 വയസ്സുള്ള രണ്ട് ആൺമക്കളും ആറ് വയസ്സുള്ള മകളുമാണ് പിതാവിനൊപ്പം ബേക്കൽ കോട്ടയിലെത്തിയത്. 

സ്കൂൾ വിദ്യാർത്ഥികളായ കുട്ടികളെ കോട്ട കാണിക്കാമെന്ന് പറഞ്ഞാണ് ക്ലാസിൽ വിടാതെ കൂട്ടിക്കൊണ്ടുവന്നതെന്നാണ് പോലീസ് നൽകുന്ന വിവരം. ചൊവ്വാഴ്ച ഉച്ചയോടെയാണ് ഇവർ ബേക്കലിലെത്തിയത്. 

പോലീസ് നൽകിയ വിവരമനുസരിച്ച്, ഇൻസ്‌പെക്ടർ എം.വി. ശ്രീദാസിന്റെ നിർദ്ദേശപ്രകാരം ടൂറിസം പോലീസ് എ.എസ്.ഐ എം.എം. സുനിൽകുമാർ, ബേക്കൽ സ്റ്റേഷനിലെ പോലീസ് ഉദ്യോഗസ്ഥരായ വിജേഷ്, റെജിൻ എന്നിവരാണ് രക്ഷാപ്രവർത്തനത്തിൽ പങ്കെടുത്തത്. 

ഉദ്യോഗസ്ഥനും കുട്ടികളും എത്തിയ കാർ കോട്ടയുടെ പരിസരത്ത് നിന്ന് കണ്ടെത്തിയിരുന്നതായും പോലീസ് അറിയിച്ചു. വിവരം അറിഞ്ഞ് സ്ഥലത്തെത്തിയ ബന്ധുക്കൾക്കൊപ്പം ഇവരെ പിന്നീട് പറഞ്ഞയച്ചതായി പോലീസ് കാസർകോട് വാർത്തയോട് പറഞ്ഞു.

ഈ വാർത്തയെക്കുറിച്ച് നിങ്ങളുടെ അഭിപ്രായം പങ്കുവെയ്ക്കൂ, നിങ്ങളുടെ സുഹൃത്തുക്കൾക്കും ഇത് ഷെയർ ചെയ്യൂ.

Article Summary: Police rescue a health official and his three children from a death attempt at Bekal Fort.

#BekalFort #KeralaPolice #DeathPrevention #Kasargod #Bekal #KeralaNews