Obituary | മുന്‍ ഇന്‍ഡ്യന്‍ ക്രികറ്റ് താരവും പരിശീലകനുമായിരുന്ന അന്‍ഷുമാന്‍ ഗെയ്ക് വാദ് അന്തരിച്ചു; അനുശോചനവുമായി പ്രധാനമന്ത്രി നരേന്ദ്ര മോദി അടക്കമുള്ള പ്രമുഖര്‍

ന്യൂഡെല്‍ഹി: (KVARTHA) മുന്‍ ഇന്‍ഡ്യന്‍ ക്രികറ്റ് താരവും (Ex Indian Player) പരിശീലകനുമായിരുന്ന (Coach) അന്‍ഷുമാന്‍ ഗെയ്ക് വാദ് (Anshuman Gaekwad-71) അന്തരിച്ചു (Dead) . രക്താര്‍ബുദ ബാധിതനായി (Cancer) ലന്‍ഡനിലെ കിംഗ്‌സ് കോളജ് ഹോസ്പിറ്റലില്‍ കഴിഞ്ഞ ഒരു വര്‍ഷമായി ചികിത്സയിലായിരുന്നു (Treatment) . 

1997 മുതല്‍ 1999 വരെയും 2000ലുമാണ് ഗെയ്ക്വാദ് ഇന്‍ഡ്യന്‍ പരിശീലകനായിരുന്നത്. ഗെയ്ക് വാദ് കോച് ആയിരുന്നപ്പോഴാണ് ഇന്‍ഡ്യ 2000ലെ ചാമ്പ്യന്‍സ് ട്രോഫിയില്‍ റണ്ണേഴ്‌സ് അപ്പായത്. അനില്‍ കുംബ്ലെ ഒരു ടെസ്റ്റ് ഇന്നിംഗ്‌സില്‍ പത്ത് വികറ്റ് വീഴ്ത്തി ചരിത്രനേട്ടം കൈവരിച്ചപ്പോഴും ഇന്‍ഡ്യന്‍ പരിശീലകനായിരുന്നു ഗെയ്ക് വാദ്. 

1975മുതല്‍ 1987 വരെ 12 വര്‍ഷം നീണ്ട കരിയറില്‍ ഇന്‍ഡ്യക്കായി 40 ടെസ്റ്റുകളിലും 15 ഏകദിനങ്ങളിലും കളിച്ചു. രണ്ട് സെഞ്ചുറികള്‍ അടക്കം 2524 റണ്‍സ് നേടിയിട്ടുണ്ട്. 1983ല്‍ ജലന്ധറില്‍ പാകിസ്താനെതിരെ നേടിയ 201 റണ്‍സാണ് ഉയര്‍ന്ന സ്‌കോര്‍. 22 വര്‍ഷം നീണ്ട ഫസ്റ്റ് ക്ലാസ് കരിയറില്‍ 205 ഫസ്റ്റ് ക്ലാസ് മത്സരങ്ങളിലും ഗെയ്ക് വാദ് കളിച്ചിട്ടുണ്ട്.

നേരത്തെ മുന്‍ താരം കപില്‍ ദേവ് അടക്കമുള്ളവരുടെ അഭ്യര്‍ഥന മാനിച്ച് അന്‍ഷുമാന്‍ ഗെയ്ക് വാദിന്റെ ചികിത്സക്കായി ബിസിസിഐ സെക്രടറി ഒരു കോടി രൂപ അനുവദിച്ചിരുന്നു. രണ്ട് കാലയളവില്‍ ഇന്‍ഡ്യന്‍ പരിശീലകനായിരുന്ന അന്‍ഷുമാന്‍ ഗെയ്ക്വാദ് ബിസിസിഐയുടെ ക്രികറ്റ് ഉപദേശക സമിതി അംഗമായും 1990ല്‍ ദേശീയ സെലക്ടറായും ഇന്‍ഡ്യന്‍ ക്രികറ്റേഴ്‌സ് അസോസിയേഷന്‍ പ്രസിഡന്റായും പ്രവര്‍ത്തിച്ചിട്ടുണ്ട്.

സുനില്‍ ഗവാസ്‌കറുടെ ഓപണിംഗ് പങ്കാളിയായി കളിച്ച ഗെയ്ക് വാദ് 1976ല്‍ വെസ്റ്റ് ഇന്‍ഡീസിനെതിരെ സബീന പാര്‍കില്‍ നടന്ന ടെസ്റ്റില്‍ മൈകല്‍ ഹോള്‍ഡിംഗിന്റെ ബൗണ്‍സര്‍ കൊണ്ട് ചെവിയില്‍ നിന്ന് രക്തം വാര്‍ന്നിട്ടും വിന്‍ഡീസ് പേസ് പടയെ ധീരമായി നേരിട്ട് പോരാട്ടവീര്യത്തിന്റെ പര്യായമായിട്ടുണ്ട്.

അന്‍ഷുമാന്‍ ഗെയ്ക് വാദിന്റെ നിര്യാണത്തില്‍ പ്രധാനമന്ത്രി നരേന്ദ്ര മോദി അടക്കമുള്ള പ്രമുഖര്‍ അനുശോചിച്ചു.