റിയാദ്: (KVARTHA) ഗസ്സയിലെ വെടിനിർത്തൽ ചർച്ചകൾക്കായി അമേരിക്കൻ വിദേശകാര്യ സെക്രട്ടറി ആന്റണി ബ്ലിങ്കൻ സൗദി അറേബ്യയിൽ എത്തി. ബുധനാഴ്ച രാവിലെ റിയാദിലെത്തിയ അദ്ദേഹത്തെ സൗദി വിദേശകാര്യ ഉപമന്ത്രി എൻജി. വലിദ് ബിൻ അബ്‌ദുൽ കരീം അൽ ഖുറൈജി റിയാദ് കിങ് ഖാലിദ് ഇൻറർനാഷനൽ എയർപ്പോർട്ടിലെത്തി സ്വീകരിച്ചു. സൗദി അറേബ്യ ഈ മേഖലയിലെ പ്രധാന പദവിയിലുള്ള രാജ്യമാണ് എന്നാണ് പര്യടനത്തിനായി റിയാദിലേക്ക് പുറപ്പെടും മുമ്പ് ബ്ലിങ്കൻ മാധ്യമങ്ങളോട് പറഞ്ഞത്. ഗസ്സയിലെ വെടിനിർത്തൽ ചർച്ച ചെയ്യാനുള്ള പശ്ചിമേഷ്യൻ രാജ്യങ്ങളിലെ പര്യടനത്തിന്റെ ഭാഗമായാണ് യു.എസ് സ്റ്റേറ്റ് സെക്രട്ടറി ആൻറണി ബ്ലിങ്കന്റെ ഈ സൗദി സന്ദർശനം. 

തുടർന്ന് ബ്ലിങ്കൻ സൗദി വിദേശകാര്യ മന്ത്രാലയ ആസ്ഥാനത്ത് എത്തി സൗദി വിദേശകാര്യ മന്ത്രി അമീർ ഫൈസൽ ബിൻ ഫർഹാൻ അൽ സഊദുമായി കൂടിക്കാഴ്ച നടത്തി. ഗസ്സയിലെ മനുഷ്യാവസ്ഥ മെച്ചപ്പെടുത്തുകയും ഇസ്രായേൽ-ഫലസ്തീൻ സംഘർഷത്തിന് ശാശ്വതമായ പരിഹാരം കണ്ടെത്തുകയും ചെയ്യുന്നതിനുള്ള സാധ്യതകളെക്കുറിച്ച് ഇരുവരും വിശദമായി ചർച്ച ചെയ്തു. 

ഇസ്രയേലിൽ നിന്നാണ് അമേരിക്കൻ സ്റ്റേറ്റ് സെക്രട്ടറി ആന്റണി ബ്ലിങ്കൻ, ഗസ്സയിൽ വെടിനിർത്തൽ ചർച്ചകൾക്കായി റിയാദിൽ എത്തിയത്. ഇതോടൊപ്പം, പ്രദേശത്ത് സൈനിക ഇടപെടലുകൾ നിയന്ത്രിക്കുകയെന്നതും പ്രധാന ചർച്ചാവിഷയമാണ്. ഗസ്സയിലെ യുദ്ധം ആരംഭിച്ചതിന് ശേഷം, ഇത് ബ്ലിങ്കന്റെ പതിനൊന്നാമത്തെ പടിഞ്ഞാറൻ ഏഷ്യൻ സന്ദർശനമാണ്.

#Gaza #Ceasefire #Blinken #SaudiArabia #MiddleEast #Peace #Diplomacy #US