ഡോക്ടർമാർക്ക് നേരെ അതിക്രമം; കാസർകോട് ജനറൽ ആശുപത്രിയിൽ പ്രതിഷേധ ധർണയും ഒപി ബഹിഷ്‌കരണവും

കാസർകോട്: (KVARTHA) ജനറൽ ആശുപത്രിയിൽ ഡ്യൂട്ടിയിലുണ്ടായിരുന്ന വനിതാ കാഷ്വാലിറ്റി മെഡിക്കൽ ഓഫീസറെയും അവിടെ ചികിത്സ തേടിയെത്തിയ രോഗിയെയും ആക്രമിച്ചതിൽ പ്രതിഷേധിച്ച് ആശുപത്രി ജീവനക്കാർ പ്രതിഷേധ ധർണ നടത്തി. സ്റ്റാഫ് കൗൺസിലിൻ്റെയും കെ ജി എം ഒ എ യുടെയും നേതൃത്വത്തിലായിരുന്നു ധർണ. 

ഇതിന് പുറമെ, വനിതാ ഡോക്ടർക്കെതിരെ നടന്ന അതിക്രമത്തിൽ പ്രതിഷേധിച്ച് മെഡിക്കൽ സർവീസ് സെന്റർ അസോസിയേഷൻ്റെ നേതൃത്വത്തിൽ വെള്ളിയാഴ്ച രാവിലെ 9 മുതൽ 10 വരെ ഡോക്ടർമാർ ഒപി ബഹിഷ്‌കരിച്ചു.

വ്യാഴാഴ്ച ഉച്ചയോടെയാണ് അതിക്രമം നടന്നത്. ബന്ധുക്കൾ തമ്മിലുണ്ടായ വാക്കേറ്റവും അടിപിടിയും ആശുപത്രിയിലെ തീവ്രപരിചരണ വിഭാഗത്തിൽ എത്തിയതിന് പിന്നാലെയാണ് സംഭവം. ചികിത്സയ്ക്കെത്തിയ രോഗിയുടെ ബന്ധുക്കളാണ് വനിതാ ഡോക്ടറുടെ ദേഹത്തേക്ക് തെറിച്ചുവീഴുകയും തുടർന്ന് ഡോക്ടറോട് വാക്കേറ്റത്തിലേർപ്പെടുകയും ഭീഷണിപ്പെടുത്തുകയും ചെയ്തതെന്ന് പരാതിയിൽ പറയുന്നു. ഉടൻ തന്നെ ആശുപത്രി ജീവനക്കാരും സുരക്ഷാ ജീവനക്കാരും ഇടപെട്ട് ഡോക്ടറെ സുരക്ഷിത സ്ഥാനത്തേക്ക് മാറ്റുകയായിരുന്നു.

പോലീസ് നടപടിയിൽ ശക്തമായ പ്രതിഷേധം

പോലീസിൽ ഏൽപ്പിച്ച പ്രതിയെ വിട്ടയച്ചതിൽ യോഗം ശക്തമായ പ്രതിഷേധം രേഖപ്പെടുത്തി. പ്രതിയെ ഉടൻ അറസ്റ്റ് ചെയ്യണമെന്നും, അല്ലെങ്കിൽ ജോലിയിൽ നിന്ന് വിട്ട് നിൽക്കുന്നതുൾപ്പെടെയുള്ള ശക്തമായ സമരങ്ങളിലേക്ക് കൂടുതൽ പോകേണ്ടി വരുമെന്നും ജീവനക്കാർ മുന്നറിയിപ്പ് നൽകി. ആശുപത്രിയിലെ പോലീസ് എയ്ഡ് പോസ്റ്റ് ശക്തിപ്പെടുത്തണമെന്നും യോഗം ആവശ്യപ്പെട്ടു.

ഐ എം എ (ഇന്ത്യൻ മെഡിക്കൽ അസോസിയേഷൻ) കാസർകോട് ബ്രാഞ്ച് പ്രസിഡൻ്റ് ഡോ. രേഖ റൈ ധർണ ഉദ്ഘാടനം ചെയ്തു. സ്റ്റാഫ് കൗൺസിൽ പ്രസിഡൻ്റ് ഡോ. അരുൺ റാം അധ്യക്ഷത വഹിച്ചു. സുപ്രണ്ടൻ്റ് ഇൻ ചാർജ് ഡോ. സുനിൽ ചന്ദ്രൻ മുഖ്യപ്രഭാഷണം നടത്തി. 

കെ ജി എം ഒ എ പ്രസിഡൻ്റ് ഡോ. ഷമീമ തൻവീർ, കെ ജി എം ഒ എ സംസ്ഥാന കമ്മിറ്റി അംഗം ഡോ. ജമാൽ അഹ്മദ് എ, ഡോ. ജനാർദ്ദന നായിക്, നഴ്സിംഗ് സുപ്രണ്ടൻ്റ് ലത, എൻ ജി ഒ യൂണിയൻ പ്രതിനിധി വിനീത് ചാത്തനൂർ, എൻ ജി ഒ അസോസിയേഷൻ നാരായണ ബി തുടങ്ങിയവർ അഭിവാദ്യങ്ങൾ അർപ്പിച്ച് സംസാരിച്ചു. സ്റ്റാഫ് കൗൺസിൽ സെക്രട്ടറി സതീശൻ ടി സ്വാഗതവും കെ ജി എം ഒ എ യൂണിറ്റ് കൺവീനർ ഡോ. അഭിജിത്ത് ദാസ് നന്ദിയും പറഞ്ഞു.

സുരക്ഷ ഉറപ്പാക്കണം

ആശുപത്രിയിൽ ചികിത്സയ്ക്കെത്തുന്നവരെ രക്ഷിക്കാനായി ദിവസവും അഹോരാത്രം സേവനം ചെയ്യുന്ന ഡോക്ടർമാരുടെ സുരക്ഷ ഉറപ്പാക്കാൻ അധികാരികൾ അടിയന്തരമായി ഇടപെടണമെന്ന് പ്രതിഷേധക്കാർ ആവശ്യപ്പെട്ടു. ‘ആശുപത്രികൾ അക്രമഭൂമിയാകരുത്. രോഗിയുടെയും ഡോക്ടറുടെയും സുരക്ഷ ഒരുപോലെ പ്രധാനമാണ്. ആരോഗ്യ രംഗത്തുള്ളവർക്ക് നേരെയുള്ള അതിക്രമങ്ങൾ ആവർത്തിക്കാതിരിക്കാൻ കർശന നടപടി വേണം,’ ഡോക്ടർമാർ ആവശ്യപ്പെട്ടു.

ഈ മാസം ഒന്നു മുതൽ സർക്കാർ ഡോക്ടർമാർ ആശുപത്രിയിൽ സുരക്ഷാ സംവിധാനം ഏർപ്പെടുത്തണമെന്നും കാഷ്വാലിറ്റിയിൽ കൂടുതൽ ഡോക്ടർമാരെ നിയമിക്കണമെന്നും ആവശ്യപ്പെട്ട് കെ ജി എം ഒ എ യുടെ നേതൃത്വത്തിൽ ജീവൻ രക്ഷാ സമരത്തിലാണ്.

പോലീസ് അന്വേഷണം തുടങ്ങി

സംഭവവുമായി ബന്ധപ്പെട്ട് കാസർകോട് പൊലീസ് അന്വേഷണം ആരംഭിച്ചു. ആശുപത്രിയിലെ സിസിടിവി ദൃശ്യങ്ങൾ ശേഖരിച്ചുവെന്നും പ്രതികളെ തിരിച്ചറിഞ്ഞിട്ടുണ്ടെന്നും പൊലീസ് അറിയിച്ചു. സുരക്ഷാ ക്രമീകരണങ്ങൾ ശക്തിപ്പെടുത്താൻ ആവശ്യമായ നടപടികൾ ഉടൻ സ്വീകരിക്കുമെന്നും പൊലീസ് വ്യക്തമാക്കി.

കാസർകോട് ജനറൽ ആശുപത്രിയിലെ ഡോക്ടർമാർക്ക് നേരെയുണ്ടായ അതിക്രമത്തെക്കുറിച്ചുള്ള ഈ വാർത്തയെക്കുറിച്ച് നിങ്ങൾക്കെന്താണ് പറയാനുള്ളത്? കമൻ്റ് ചെയ്യുക. ഷെയർ ചെയ്യുക.

Article Summary: Doctors at Kasaragod General Hospital protested and boycotted OP following an attack on a woman medical officer and a patient.

#KasaragodHospital #DoctorsProtest #HealthcareViolence #MedicalSafety #KGMOHA #OPBoycott