മഴയിൽ ബൈക്ക് തെന്നിമറിഞ്ഞ് റോഡിൽ വീണ യുവാവ് ബസ് കയറി മരിച്ചു: കാസർകോട് പെരിയ സ്വദേശിയാണ് അപകടത്തിൽപ്പെട്ടത്

കണ്ണൂർ: (KVARTHA) കൂത്തുപറമ്പിൽ കനത്ത മഴയില്‍ ബൈക്ക് തെന്നിമറിഞ്ഞ് റോഡിൽ വീണ യുവാവ് സ്വകാര്യ ബസ് കയറി ദാരുണമായി മരിച്ചു. കാസർകോട് ജില്ലയിലെ പെരിയ സ്വദേശി വിഷ്ണു (29) ആണ് മരിച്ചത്.

കൂത്തുപറമ്പ് ടൗണിൽ തലശ്ശേരി-വളവുപാറ റോഡിൽ ബംഗ്ലമൊട്ട വളവിന് സമീപമായിരുന്നു അപകടം. ബുധനാഴ്ച വൈകിട്ട് നാലരയോടെയായിരുന്നു സംഭവം.

പാറാലിലെ ആർബിസി ഗ്രൂപ്പ് എന്ന മാർക്കറ്റിങ് ഏജൻസിയിൽ ജോലി ചെയ്യുന്ന വിഷ്ണു കമ്പനിയുടെ വാടക ക്വാർട്ടേഴ്സിലാണ് താമസിച്ചിരുന്നത്. കൂത്തുപറമ്പ് നഗരത്തിലെ ബാർബർ ഷോപ്പിൽ മുടിമുറിച്ച ശേഷം പാറാൽ ഭാഗത്തേക്ക് പോവുകയായിരുന്നു വിഷ്ണു. ചാറ്റൽ മഴയ്ക്കിടെ ബൈക്ക് തെന്നിമറിഞ്ഞാണ് അപകടമുണ്ടായത്.

ബൈക്കിൽ നിന്ന് പിടിവിടാതിരുന്ന വിഷ്ണു ബൈക്ക് കറങ്ങിത്തിരിഞ്ഞപ്പോൾ അതിനൊപ്പം റോഡിന് മധ്യത്തിലേക്ക് പതിക്കുകയും തൊട്ടുപിറകെ വന്ന ബസ്സിൽ അടിയിൽപ്പെടുകയുമായിരുന്നു. 

വീഴ്ചയുടെ ആഘാതത്തിൽ ഹെൽമെറ്റ് ദൂരേക്ക് തെറിച്ചുപോയിരുന്നു. കൂത്തുപറമ്പിൽ നിന്ന് ചെറുവാഞ്ചേരിയിലേക്ക് പോകുന്ന 'വൈശാലി' എന്ന സ്വകാര്യ ബസ്സാണ് അപകടത്തിനിടയാക്കിയത്.

യുവാവിനെ പോലീസും നാട്ടുകാരും ചേർന്ന് ആംബുലൻസിൽ കൂത്തുപറമ്പ് ഗവൺമെന്റ് താലൂക്ക് ആശുപത്രിയിലേക്ക് മാറ്റുന്നതിനിടെ മരണം സംഭവിച്ചു. കൂത്തുപറമ്പ് പോലീസ് ഇൻക്വസ്റ്റ് നടപടികൾ പൂർത്തിയാക്കിയ ശേഷം മൃതദേഹം പോസ്റ്റ്‌മോർട്ടത്തിനായി തലശ്ശേരി ജനറൽ ആശുപത്രി മോർച്ചറിയിലേക്ക് മാറ്റി. 

സ്വകാര്യ ബസ് ഡ്രൈവർക്കെതിരെ കൂത്തുപറമ്പ് പോലീസ് മനഃപൂർവമല്ലാത്ത നരഹത്യയ്ക്ക് കേസെടുത്തിട്ടുണ്ട്.

ഈ ദുരന്തവാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Young man dies after bike skids and is hit by a bus in Koothuparamba.

#Koothuparamba #Kasaragod #AccidentNews #KeralaNews #RoadSafety #BusAccident