പി പി ദിവ്യക്കെതിരായ ബിനാമി കരാർ ആരോപണം; അന്വേഷണം സിൽക്കിലേക്ക് വ്യാപിപ്പിച്ച് വിജിലൻസ്, വിദഗ്ധസംഘമെത്തും

കണ്ണൂർ: (KVARTHA) ജില്ലാ പഞ്ചായത്ത് മുൻ പ്രസിഡൻ്റ് പി പി ദിവ്യയുമായി ബന്ധമുള്ള ബിനാമി കമ്പനിയെന്ന് ആരോപിക്കപ്പെടുന്ന കാർട്ടൺ ഇന്ത്യ അലയൻസിൻ്റെ ഇടപാടുകളിൽ അന്വേഷണം വ്യാപിപ്പിക്കുന്നു. പൊതുമേഖലാ സ്ഥാപനമായ സിൽക്ക് കേന്ദ്രീകരിച്ചാണ് വിജിലൻസ് അന്വേഷണം നടത്തുന്നത്. ഈ ഫയലുകൾ പരിശോധിക്കാൻ ഉടൻ തന്നെ വിജിലൻസിൻ്റെ പ്രത്യേക വിദഗ്ധസംഘം എത്തും.

സിൽക്ക് വഴി ഉപകരാറുകൾ

പൊതുമേഖലാ സ്ഥാപനമായ സിൽക്ക് മുഖേനയാണ് കാർട്ടൺ ഇന്ത്യക്ക് ജില്ലാ പഞ്ചായത്തിൻ്റെ പദ്ധതി കരാറുകൾ ലഭിച്ചത്. ഇതോടെയാണ് സിൽക്കിലേക്കും അന്വേഷണം വ്യാപിപ്പിക്കുന്നത്. ആരോപണം ഉയർന്ന ആദ്യ ഘട്ടത്തിൽ സിൽക്കിനാണ് കരാർ നൽകിയതെന്നായിരുന്നു അധികൃതരുടെ വാദം. എന്നാൽ കാർട്ടൺ ഇന്ത്യക്ക് നേരിട്ട് ഉപകരാർ നൽകിയത് സിൽക്കാണെന്ന് പിന്നീട് വ്യക്തമായി.

സിൽക്കിനു നൽകിയ സർക്കാർ കരാറുകളിൽ ഭൂരിഭാഗവും എങ്ങനെ കാർട്ടൺ ഇന്ത്യയുടെ കൈവശമെത്തിയെന്ന ചോദ്യം കെഎസ്‌യു സംസ്ഥാന പ്രസിഡൻ്റ് മുഹമ്മദ് ശമ്മാസ് ഉയർത്തിയിരുന്നു. അക്കാര്യത്തിൽ സിൽക്ക് അധികൃതരുടെ ഇടപെടലിനെക്കുറിച്ച് വിശദമായ അന്വേഷണത്തിനാണ് വിജിലൻസ് ഒരുങ്ങുന്നത്.

12 കോടിയുടെ 5 പദ്ധതികൾ

സിൽക്കിൽ വിദഗ്ധ സംഘത്തെ ഉൾപ്പെടുത്തി വിശദമായ പരിശോധന നടത്താനാണ് വിജിലൻസ് നീക്കം. ഈ കേസുമായി ബന്ധപ്പെട്ട് കണ്ണൂർ ജില്ലാ പഞ്ചായത്ത് ഓഫീസിൽ വിജിലൻസ് പരിശോധന നടത്തിയിരുന്നു. കാർട്ടൺ ഇന്ത്യ ഏറ്റെടുത്ത് നടപ്പാക്കിയ 12 കോടിയിലധികം രൂപയുടെ അഞ്ച് പദ്ധതികളുമായി ബന്ധപ്പെട്ട രേഖകൾ വിജിലൻസ് സംഘം കസ്റ്റഡിയിലെടുത്തിരുന്നു. ഇതിൻ്റെ അടിസ്ഥാനത്തിലാകും സിൽക്കിലെ പരിശോധനകൾ.

മുൻ കണ്ണൂർ എഡിഎം നവീൻ ബാബുവിൻ്റെ മരണത്തിൽ ആത്മഹത്യാ പ്രേരണ കുറ്റത്തിന് ഒന്നാം പ്രതിയായി ചേർക്കപ്പെട്ടതിന് പിന്നാലെയാണ് പി പി ദിവ്യക്കെതിരെ അഴിമതിയാരോപണങ്ങളും ശക്തമായത്. ഇതോടെ പി പി ദിവ്യയെ പാർട്ടി കണ്ണൂർ ജില്ലാ കമ്മിറ്റി അംഗത്വത്തിൽ നിന്നും ഇരിണാവ് ബ്രാഞ്ചിലേക്ക് സിപിഎം തരംതാഴ്ത്തിയിരുന്നു. കോടതി നടപടികൾ പൂർത്തീകരിച്ചതിനു ശേഷം മാത്രം ഇവരെ നേതൃത്വത്തിലേക്ക് തിരിച്ചു കൊണ്ടുവരുന്നത് ആലോചിക്കാമെന്നാണ് ജില്ലാ നേതൃത്വത്തിൻ്റെ നിലപാട്.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: Vigilance extends probe to SILK over Carton India corruption case linked to PP Divya.

#PPDivya #VigilanceProbe #KannurNews #KeralaPolitics #SILK #NaveenBabuCase #MalayalamNews #SobhaNews