പി വി അൻവർ എത്തുന്നു; രാഷ്ട്രീയ ശ്രദ്ധ കണ്ണൂരിലേക്ക്: തൃണമൂൽ കോൺഗ്രസ് കൺവെൻഷനും പൊതുയോഗവും ഒക്ടോബർ 25-ന്

കണ്ണൂർ: (KVARTHA) ഓൾ ഇന്ത്യാ തൃണമൂൽ കോൺഗ്രസ് കണ്ണൂർ ജില്ലാ പ്രവർത്തക കൺവെൻഷൻ ഒക്ടോബർ 25 ശനിയാഴ്ച ഉച്ചയ്ക്ക് ഒരു മണിക്ക് കണ്ണൂർ ജവഹർ ലൈബ്രറി ഹാളിൽ നടക്കുമെന്ന് ഭാരവാഹികൾ കണ്ണൂർ പ്രസ് ക്ലബ്ബിൽ വാർത്താസമ്മേളനത്തിൽ അറിയിച്ചു.

സംസ്ഥാന കോ-ഓർഡിനേറ്റർ പ്രസീത അഴീക്കോട് അധ്യക്ഷയാകും. സംസ്ഥാന ചീഫ് കോർഡിനേറ്റർമാരായ അഡ്വ. വി എസ് മനോജ് കുമാർ, സജി മഞ്ഞകടമ്പിൽ, ഹംസ പറക്കാട്ട്, സംസ്ഥാന യൂത്ത് പ്രസിഡന്റ് സഹീത് റൂമി തുടങ്ങിയവർ കൺവെൻഷനിൽ സംസാരിക്കും.

അന്നേ ദിവസം വൈകിട്ട് അഞ്ചു മണിക്ക് കണ്ണൂർ സ്റ്റേഡിയം കോർണറിൽ പാർട്ടി നയവിശദീകരണ പൊതുയോഗം നടത്തും. സംസ്ഥാന കൺവീനർ പി വി അൻവർ പൊതുയോഗം ഉദ്ഘാടനം ചെയ്യും.

തദ്ദേശ സ്വയംഭരണ തെരഞ്ഞെടുപ്പിൽ സംസ്ഥാനത്തെ മുഴുവൻ ജില്ലകളിലും പാർട്ടി സ്ഥാനാർത്ഥികൾ മത്സരിക്കുമെന്ന് സംസ്ഥാന കോ-ഓർഡിനേറ്റർ നിസാർ മേത്തർ പറഞ്ഞു. കൺവെൻഷനിൽ ജില്ലയിലെ വിവിധ ഭാഗങ്ങളിൽ നിന്നായി 250 പേർ പങ്കെടുക്കും.

തൃണമൂൽ കോൺഗ്രസ് താഴെത്തട്ടിൽ സംഘടനാ സംവിധാനം രൂപീകരിച്ചു വരികയാണെന്നും ജില്ലാ കമ്മിറ്റികൾ ഉടൻ നിലവിൽ വരുമെന്നും നിസാർ മേത്തർ അറിയിച്ചു. 

സംസ്ഥാന കോ-ഓർഡിനേറ്റർ പ്രസീത അഴീക്കോട്, കണ്ണൂർ ജില്ലാ യൂത്ത് പ്രസിഡന്റ് റമീസ് കെ ഹമീദ്, പി വി സുമേഷ്, വിജയൻ മേക്കര എന്നിവരും വാർത്താസമ്മേളനത്തിൽ പങ്കെടുത്തു.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവയ്ക്കുക. 

Article Summary: Trinamool Congress workers convention and public meeting in Kannur on Oct 25; PV Anwar to inaugurate.

#TrinamoolCongress #Keralanews #Kannur #PVAnwar #PoliticalNews #TMC