തീയ്യ ക്ഷേമസഭയെ രാഷ്ട്രീയ അജണ്ട നടപ്പാക്കാൻ ഉപയോഗിക്കുന്നു: പ്രവർത്തകരുടെ ആരോപണം

പിലാത്തറ: (KVARTHA) സമുദായ ഉന്നമനം മാത്രം ലക്ഷ്യമാക്കി തങ്ങളടക്കമുള്ള തീയ്യ സമുദായ അംഗങ്ങൾ കുഞ്ഞിമംഗലത്ത് രൂപീകരിച്ച തീയ്യ ക്ഷേമസഭയുടെ പ്രവർത്തനങ്ങൾ ചിലർ രാഷ്ട്രീയ ലക്ഷ്യങ്ങൾക്ക് വേണ്ടി ഉപയോഗിക്കുകയാണെന്ന് ഒരു വിഭാഗം പ്രവർത്തകർ പിലാത്തറ പ്രസ് ക്ലബ്ബിൽ വാർത്താസമ്മേളനത്തിൽ ആരോപിച്ചു.

തീയ്യ ക്ഷേമസഭ സമുദായ താൽപര്യത്തെ മാത്രം മുൻനിർത്തി പ്രവർത്തിക്കുന്ന ഒന്നാണെന്നും ഏതെങ്കിലും കക്ഷി രാഷ്ട്രീയ താൽപര്യം സഭയ്ക്ക് ഉണ്ടാകില്ലെന്നുമാണ് ആദ്യ ഘട്ടത്തിൽ സഭ രൂപീകരിക്കാൻ മുന്നിട്ടിറങ്ങിയവർ വ്യക്തമാക്കിയതെന്ന് ഇവർ ചൂണ്ടിക്കാട്ടി.

എന്നാൽ, നേതൃത്വത്തിലുള്ള ചിലർ സമുദായ താൽപര്യത്തിൽ നിന്ന് വ്യതിചലിക്കുകയും രാഷ്ട്രീയ താൽപര്യം ഉയർത്തിപ്പിടിക്കുകയും ചെയ്യുന്ന സ്ഥിതിയാണ് ഇപ്പോഴുള്ളത്. 'ഇത്തരം നീക്കം സമുദായത്തെ വഞ്ചിക്കലാണ്' എന്ന് വിമത വിഭാഗക്കാർ പറഞ്ഞു.

എല്ലാ രാഷ്ട്രീയ പാർട്ടികളിലുംപെട്ട തീയ്യ സമുദായ അംഗങ്ങൾ ഉൾപ്പെട്ടതാണ് തീയ്യ ക്ഷേമസഭ. എന്നാൽ, ഇപ്പോൾ ഇടതുപക്ഷ ജനാധിപത്യ മുന്നണിക്ക് എതിരായ ദുഷ്പ്രചാരണങ്ങൾക്കും തിരഞ്ഞെടുപ്പിൽ തോൽപ്പിക്കാനുമുള്ള ആഹ്വാനവുമാണ് തീയ്യ ക്ഷേമസഭയുടെ ഔദ്യോഗിക വാട്ട്സ്ആപ്പ് ഗ്രൂപ്പിൽ പോലും ചിലർ പ്രചരിക്കുന്നത്. കോൺഗ്രസ് - ബിജെപി സഖ്യത്തിന് വേണ്ടിയാണ് ഭാരവാഹികളിൽ ചിലർ പ്രവർത്തിക്കുന്നതെന്നും വാർത്താസമ്മേളനത്തിൽ പങ്കെടുത്തവർ ആരോപിച്ചു.

തീയ്യ സമുദായത്തിന് പ്രത്യേക സംവരണം, തീയ്യ സമുദായത്തെ സർക്കാർ രേഖകളിലും വരുന്ന സെൻസസ്സിലും സ്വതന്ത്രമായി രേഖപ്പെടുത്തണം തുടങ്ങിയ ആവശ്യങ്ങൾ ഉയർത്തിയായിരുന്നു സംഘടനയുടെ രൂപീകരണം. 

എന്നാൽ, സമുദായ ശ്മശാനം പൊതുസ്വത്താക്കുന്നു, മല്ലിയോട് അമ്പലം സ്വകാര്യസ്വത്താക്കുന്നു തുടങ്ങിയ തെറ്റായ പ്രചാരണങ്ങളിലേക്ക് തീയ്യ ക്ഷേമസഭാ നേതൃത്വത്തിലെ ചിലർ വിഷയങ്ങൾ മാറ്റുകയായിരുന്നു.

'ഇത്തരം പ്രചാരണങ്ങൾ ഒന്നും വസ്തുതാപരമല്ലെന്ന് ഞങ്ങൾ അനുഭവങ്ങളിൽ നിന്ന് മനസ്സിലാക്കിയിരുന്നു. ഇതിനെ എതിർത്തപ്പോൾ ഒറ്റപ്പെടുത്തി നിശ്ശബ്ദരാക്കാനുള്ള ശ്രമമാണ് നേതൃത്വം നടത്തിയത്' എന്നും പ്രവർത്തകർ പറഞ്ഞു. 

രാഷ്ട്രീയ താൽപര്യം വെച്ച് തീയ്യ ക്ഷേമസഭയുടെ നേതാക്കന്മാരിൽ ചിലർ കോൺഗ്രസ്-ബിജെപി സഖ്യത്തിന്റെ സ്ഥാനാർഥികളായതും പല വാർഡുകളിലും സഭയുടെ പേരിൽ രാഷ്ട്രീയ താൽപര്യം മുൻനിർത്തിയുള്ള പ്രചാരണങ്ങൾ നടത്തുന്നതും ഇവരുടെ രാഷ്ട്രീയ ലക്ഷ്യം വ്യക്തമാക്കുന്നുണ്ടെന്നും അവർ ചൂണ്ടിക്കാട്ടി.

സമുദായത്തെ നേതൃത്വത്തിലെ ഒരു വിഭാഗത്തിന്റെ വ്യക്തിരാഷ്ട്രീയ താൽപര്യങ്ങളെ മുൻനിർത്തി ഉപയോഗിക്കുകയാണ്. സമുദായ താൽപര്യത്തിനു പകരം ഇത്തരം ഗൂഢ താൽപര്യങ്ങളാണ് തങ്ങൾ എതിർക്കുന്നത്. 

നിരവധി ആളുകളാണ് ഇവരുടെ പ്രവർത്തനങ്ങളിൽ പ്രതിഷേധിക്കുന്നത്; ഇവരുടെ പ്രതിനിധികളായാണ് ഞങ്ങൾ ഇവിടെ വാർത്താസമ്മേളനത്തിനായി എത്തിയിരിക്കുന്നതെന്നും ഇവർ അറിയിച്ചു.

തീയ്യ ക്ഷേമസഭാ പ്രവർത്തകരായ എം പി വിനോദ് കുമാർ, കുപ്പത്തി കൃഷ്ണൻ, എ ഗോവിന്ദൻ, കെ സുനിത എന്നിവർ വാർത്താസമ്മേളനത്തിൽ പങ്കെടുത്തു.

തീയ്യ ക്ഷേമസഭയിലെ രാഷ്ട്രീയ ആരോപണങ്ങളെക്കുറിച്ചുള്ള ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായം കമൻ്റ് ചെയ്യുക. 

Article Summary: Thiyya Kshema Sabha activists accuse leaders of using the organization for political agenda, specifically against the LDF in alliance with Congress-BJP.

#ThiyyaKshemaSabha #Pilathara #KeralaPolitics #CommunityOrganization #LDF #LocalElection