തേനി മോഡൽ ജയിൽചാട്ടം: കേരളത്തിലെ 3 സെൻട്രൽ ജയിലുകളിൽ സുരക്ഷ ശക്തമാക്കുന്നു, നിർദേശവുമായി ആഭ്യന്തര വകുപ്പ്

-നവോദിത്ത് ബാബു

കണ്ണൂർ: (KVARTHA) തമിഴ്‌നാട്ടിലെ തേനിയിൽ തടവുകാർ കൂട്ടത്തോടെ ജയിൽ ചാടിയ സംഭവത്തിന് പിന്നാലെ കേരളത്തിലെ ജയിലുകളിലും സുരക്ഷ ശക്തമാക്കാൻ സംസ്ഥാന ആഭ്യന്തര വകുപ്പിൻ്റെ നിർദേശം. കണ്ണൂർ, പൂജപ്പുര, വിയ്യൂർ സെൻട്രൽ ജയിലുകളിലാണ് അടിയന്തരമായി സുരക്ഷ ശക്തമാക്കുന്നത്. ഇതനുസരിച്ച് ജയിൽ വകുപ്പിൽ അധിക ജീവനക്കാരെ നിയമിക്കും.

പ്രശ്‌നബാധിത പ്രദേശങ്ങളിൽ പോലീസ് എയ്ഡ്പോസ്റ്റുകൾ 24 മണിക്കൂറും സേവനം ഉറപ്പാക്കും. സന്ദർശകരെ കർശന നിയന്ത്രണങ്ങളോടെ മാത്രമേ ഇനി അന്തേവാസികളെ കാണാൻ അനുവദിക്കുകയുള്ളു. ജയിലിന് അകത്തേക്ക് മൊബൈൽ ഫോൺ, മദ്യം, മറ്റു ലഹരിവസ്തുക്കൾ എന്നിവയെത്തുന്നത് തടയാൻ കർശന പരിശോധനകൾ നടത്തും.

തടവുകാരുടെ താവളങ്ങൾ

സംസ്ഥാനത്തെ ജയിലുകളിൽ വർഷങ്ങളായി ഒരേ സെല്ലിൽ തന്നെ തടവുകാരെ പാർപ്പിക്കുന്നത് സുരക്ഷാ പ്രശ്‌നമുണ്ടാക്കുമെന്ന് നേരത്തെ തന്നെ റിപ്പോർട്ടുണ്ട്. ആറു മാസത്തെ ഇടവേളകളിൽ തടവുകാരെ മറ്റു സെല്ലുകളിലേക്കോ ജയിലുകളിലേക്കോ മാറ്റണമെന്നാണ് നിലവിലെ ജയിൽ ചട്ടം. വർഷങ്ങളായി ഒരേ സെല്ലിൽ തടവുശിക്ഷ അനുഭവിക്കുന്നവർ ഈ തടവറകൾ താവളമാക്കി മാറ്റിയിരിക്കുകയാണെന്ന് ബ്യൂറോ ഓഫ് പോലീസ് റിസർച്ച് ആൻഡ് ഡെവലപ്മെൻ്റ് വിഭാഗം തയ്യാറാക്കിയ റിപ്പോർട്ടിൽ പറയുന്നു. മയക്കുമരുന്ന് വിൽപന, മൊബൈൽ ഫോൺ കടത്തൽ, മദ്യം, ബീഡി എന്നിവ രഹസ്യമായി എത്തിക്കുന്നതും വിതരണം ചെയ്യുന്നതും ഇത്തരം സംഘങ്ങളാണ്.

ജയിലിലെ രഹസ്യ വിവരങ്ങൾ കൈമാറാൻ തടവുകാർക്കിടയിൽ നിന്നുതന്നെ ഇൻഫോർമർമാരെ നിയോഗിക്കുന്നത് ഇത്തരം സംഘങ്ങളുടെ രൂപീകരണം തടയാൻ സഹായിക്കുമെന്ന് ബിപിആർഡി റിപ്പോർട്ട് ചൂണ്ടിക്കാട്ടുന്നു.

ശാസ്ത്രീയമായ തരംതിരിക്കൽ

ജയിലിൽ എത്തുന്നവരെ കുറ്റകൃത്യത്തിൻ്റെ സ്വഭാവമനുസരിച്ച് തരംതിരിച്ചാണ് വിവിധ ബ്ലോക്കുകളിലേക്ക് മാറ്റേണ്ടത്. ഗുരുതര കുറ്റകൃത്യം ചെയ്തവരെ ചെറിയ കുറ്റങ്ങൾ ചെയ്ത് അകത്തായവരുമായി ഇടകലർത്തി പാർപ്പിക്കരുത്. യുവാക്കളെയും മുതിർന്ന കുറ്റവാളികളെയും ഒരേ സെല്ലിൽ താമസിപ്പിക്കരുത്. മയക്കുമരുന്ന്, പോക്സോ, സ്ത്രീ പീഡന കേസുകളിൽ ശിക്ഷിക്കപ്പെട്ടവരെ മറ്റുള്ള തടവുകാർക്കൊപ്പം താമസിപ്പിക്കരുത് എന്നിങ്ങനെയുള്ള നിർദേശങ്ങൾ ജയിൽ ചട്ടങ്ങളിലുണ്ട്.

ജയിലുകളിൽ എത്തുന്നവർ കുറ്റകൃത്യങ്ങൾ ചെയ്യാൻ പ്രാപ്‌തരായാണ് പുറത്തിറങ്ങുന്നതെന്ന വിലയിരുത്തൽ ജയിൽ സുരക്ഷാസമിതിയും നേരത്തെ നടത്തിയിരുന്നു. ഗോവിന്ദച്ചാമി കണ്ണൂർ സെൻട്രൽ ജയിലിൽ നിന്നും ചാടിയതോടെയാണ് സർക്കാർ രണ്ടംഗ സമിതിയെ ജയിൽ സുരക്ഷ പഠിക്കാൻ നിയോഗിച്ചത്. എന്നാൽ ഈ റിപ്പോർട്ടിൽ യാതൊരു തുടർ നടപടിയും ഉണ്ടായില്ല.

മതിയായ സുരക്ഷാ ജീവനക്കാരില്ലാത്തതും തടവുകാരെ വർഷങ്ങളായി ഒരേ സെല്ലിൽ പാർപ്പിച്ചതുമാണ് തേനിയിലെ തടവുകാരുടെ രക്ഷപ്പെടലിന് പ്രധാനമായും വഴിയൊരുക്കിയതെന്ന് തമിഴ്നാട് ഡിജിപി കേന്ദ്ര ആഭ്യന്തര വകുപ്പിന് നൽകിയ റിപ്പോർട്ടിൽ ചൂണ്ടിക്കാണിച്ചിട്ടുണ്ട്.

വെറും 800 തടവുകാരെ ഉൾക്കൊള്ളാൻ മാത്രം ശേഷിയുള്ള കണ്ണൂർ ജയിലിൽ ഇപ്പോൾ കഴിയുന്നത് 1,500-ലേറെപ്പേരാണ്. ജയിലുകളിൽ അനുവദനീയമായതിലും കൂടുതൽ തടവുകാരെ പാർപ്പിക്കുന്നത് ഉദ്യോഗസ്ഥർക്ക് നിയന്ത്രിക്കാൻ കഴിയാത്ത സുരക്ഷാ പ്രതിസന്ധികൾ സൃഷ്ടിക്കുന്നുണ്ട്. പോലീസിൻ്റെ 'ഓപ്പറേഷൻ തൂഫാൻ' ശക്തമാക്കിയതോടെ മയക്കുമരുന്ന് കടത്ത് കേസിലെ പ്രതികളുടെ വലിയ പ്രവാഹമാണ് ജയിലുകളിലേക്കുള്ളത്. ഇതു കൂടാതെ കാപ്പ കേസിൽ ശിക്ഷിക്കപ്പെട്ടവരും ധാരാളമായി കണ്ണൂരിലേക്ക് എത്തുന്നുണ്ട്.

സുരക്ഷാ പ്രാധാന്യമുള്ള ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: Security tightened in Kerala central jails following Theni jailbreak; BPRD report highlights issues.

#Kvartha #KeralaJails #KannurCentralJail #PrisonSecurity #BPRDReport #KeralaPolice #TheniJailBreak #MalayalamNews #SobhaNews