ഒന്നര വയസ്സുകാരൻ്റെ മരണം; ആശുപത്രിക്ക് ഗുരുതര വീഴ്ചയെന്ന് പോസ്റ്റുമോർട്ടം റിപ്പോർട്ട്

പയ്യന്നൂർ: (KVARTHA) ഒന്നര വയസ്സുകാരൻ്റെ മരണത്തിൽ പോസ്റ്റുമോർട്ടം റിപ്പോർട്ട് പുറത്തുവന്നു. കുഞ്ഞിനെ ചികിത്സിച്ച പയ്യന്നൂർ ബേബി മെമ്മോറിയൽ ആശുപത്രിക്കും ഡോക്ടർമാർക്കും ഗുരുതര പിഴവാണ് സംഭവിച്ചതെന്ന് ഇതോടെ വ്യക്തമായി. അനസ്തേഷ്യ നൽകിയതിന് പിന്നാലെ തലച്ചോറിലേക്കുള്ള ഓക്സിജൻ നിലച്ചതാണ് മരണകാരണമെന്ന് റിപ്പോർട്ടിൽ പറയുന്നു. 

കുഞ്ഞിൻ്റെ ചുണ്ടിൽ ഉണ്ടായിരുന്നത് നേരിയ മുറിവ് മാത്രമായിരുന്നെന്നും, മൂന്ന് ദിവസം കൊണ്ട് അത് ഉണങ്ങിയിരുന്നുവെന്നും പോസ്റ്റുമോർട്ടം റിപ്പോർട്ടിൽ വ്യക്തമാക്കിയിട്ടുണ്ട്. ഈ സാഹചര്യത്തിൽ അനസ്തേഷ്യ നൽകേണ്ട യാതൊരു കാര്യവുമുണ്ടായിരുന്നില്ലെന്നും റിപ്പോർട്ട് ചൂണ്ടിക്കാട്ടുന്നു.

മാനേജ്മെൻ്റിൻ്റെ വാദം പൊളിഞ്ഞു

സംഭവത്തിൽ അനസ്തേഷ്യ നൽകിയ ഡോ. അഞ്ജലി പൊതുവാളിനെതിരെ പയ്യന്നൂർ പൊലീസ് കേസെടുത്തിട്ടുണ്ട്. ഒന്നരവയസ്സുകാരനെ ചികിത്സിച്ചതിൽ പിഴവ് പറ്റിയിട്ടില്ലെന്ന ബേബി മെമ്മോറിയൽ ആശുപത്രി മാനേജ്മെൻ്റിൻ്റെ വാദമാണ് പോസ്റ്റുമോർട്ടം റിപ്പോർട്ടിലൂടെ പൊളിഞ്ഞത്. പോസ്റ്റുമോർട്ടം റിപ്പോർട്ടിൻ്റെ അടിസ്ഥാനത്തിൽ പ്ലാസ്റ്റിക് സർജൻ, ശിശുരോഗ വിദഗ്ധ എന്നിവരുടെ പേരിലും വരും ദിവസങ്ങളിൽ പൊലീസ് കേസെടുത്തേക്കും.

ബാലാവകാശ കമ്മീഷൻ്റെ ഇടപെടൽ

അനസ്തേഷ്യ നൽകിയതിന് പിന്നാലെ ഗുരുതരാവസ്ഥയിലായി മരണപ്പെട്ട പയ്യന്നൂർ എരമത്തെ ദേവാൻഷ് ശൗര്യയുടെ വീട്ടിൽ സംസ്ഥാന ബാലാവകാശ സംരക്ഷണ കമ്മീഷൻ ചെയർപേഴ്സണും അംഗങ്ങളും ജൂലൈ 13 തിങ്കളാഴ്ച സന്ദർശനം നടത്തിയിരുന്നു. കുട്ടിയുടെ പിതാവ് സൂരജ്, മാതാവ് വിജിഷ, കുടുംബാംഗങ്ങൾ എന്നിവരോട് കമ്മീഷൻ ചെയർപേഴ്സൺ കെ വി മനോജ് കുമാറും അംഗങ്ങളും വിവരങ്ങൾ ചോദിച്ചറിഞ്ഞു. 

ഗുരുതരമായ കുറ്റകൃത്യം നടന്നിട്ടുണ്ടെന്നും ആശുപത്രിയുടെ ഭാഗത്തുനിന്ന് കുറ്റകരമായ അനാസ്ഥയും അലംഭാവവും ഉണ്ടായിട്ടുണ്ടെന്നുമാണ് കുട്ടിയുടെ രക്ഷിതാക്കളോട് സംസാരിച്ചതിൽ നിന്ന് മനസ്സിലായതെന്ന് ചെയർപേഴ്സൺ വ്യക്തമാക്കി.

അന്വേഷണ ഉദ്യോഗസ്ഥനുമായുള്ള യോഗം ഓൺലൈനായി നടത്തുമെന്നും, അതിൻ്റെ അടിസ്ഥാനത്തിൽ സ്വീകരിക്കേണ്ട നടപടികൾ കമ്മീഷൻ ചർച്ച ചെയ്യുമെന്നും അദ്ദേഹം കൂട്ടിച്ചേർത്തു. കമ്മീഷന് ചെയ്യാൻ പറ്റുന്ന കാര്യങ്ങളൊക്കെ ഇക്കാര്യത്തിൽ ചെയ്യുമെന്നും അദ്ദേഹം ഉറപ്പുനൽകി. കമ്മീഷൻ അംഗങ്ങളായ ബി മോഹൻ കുമാർ, ഡോ. എഫ് വിൽസൺ, സിസിലി ജോസഫ്, കെ കെ ഷാജു എന്നിവരും ചെയർപേഴ്സനൊപ്പം ഉണ്ടായിരുന്നു.

ഈ വാർത്ത നിങ്ങളുടെ സുഹൃത്തുക്കൾക്കും പങ്കുവെക്കുക. പുതിയ അപ്ഡേറ്റുകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Autopsy report confirms BMH negligence in Payyanur toddler's death.

#PayyanurNews #MedicalNegligence #BabyMemorialHospital #KeralaNews #KannurNews #ChildRightsCommission #AmmuNews