പരിയാരത്ത് കെഎസ്ആർടിസി ബസും ഓട്ടോറിക്ഷയും കൂട്ടിയിടിച്ച് ഗുരുതരമായി പരുക്കേറ്റ് ചികിത്സയിലായിരുന്ന യുവാവ് മരിച്ചു

പരിയാരം: (KVARTHA) കണ്ണൂർ-കാസർകോട് ദേശീയപാതയിൽ ഏമ്പേറ്റ് ജംഗ്ഷനിൽ കെഎസ്ആർടിസി ബസും സ്വകാര്യ ഓട്ടോറിക്ഷയും കൂട്ടിയിടിച്ച് ഗുരുതരമായി പരുക്കേറ്റ് ചികിത്സയിലായിരുന്ന യുവാവ് മരിച്ചു. പരിയാരം ഇരിങ്ങൽ സ്വദേശിയും നാഷണൽ പെർമിറ്റ് ലോറി ഡ്രൈവറുമായ ടി വി സുധീഷ് (35) ആണ് മരിച്ചത്. സുധീഷ് അവിവാഹിതനാണ്.

ശനിയാഴ്ച രാത്രി 8.10 ഓടെയാണ് അപകടം നടന്നത്. പരിയാരം ഏമ്പേറ്റ് ജംഗ്ഷനിലായിരുന്നു സംഭവം. ചിതപ്പിലെ പൊയിലിൽ നിന്നും മെഡിക്കൽ കോളേജ് ഭാഗത്തേക്ക് കെ എൽ-58-എ 9991 നമ്പർ സ്വകാര്യ ഓട്ടോറിക്ഷയിൽ സുധീഷും സുഹൃത്തുക്കളായ അമ്മാനപ്പാറയിലെ ടി അമൽ, പൊയിൽ സ്വദേശി ടി അക്ഷയ്, ഇരിങ്ങലിലെ കെ ജനീഷ് എന്നിവരും പോകവെയാണ് അപകടം സംഭവിച്ചത്. പയ്യന്നൂർ ഭാഗത്തുനിന്നും വന്ന കെ എൽ-15 എ-1984 നമ്പർ കെഎസ്ആർടിസി സൂപ്പർ ഡീലക്സ് ബസ് ഓട്ടോറിക്ഷയെ ഇടിക്കുകയായിരുന്നു.

അപകടത്തിൽ പരുക്കേറ്റ നാലുപേരെയും ഉടൻതന്നെ പരിയാരത്തെ കണ്ണൂർ ഗവ. മെഡിക്കൽ കോളേജിൽ പ്രവേശിപ്പിച്ചു. തീവ്രപരിചരണ വിഭാഗത്തിൽ ചികിത്സയിലിരിക്കെ ഞായറാഴ്ച ഉച്ചയ്ക്ക് 1.30 നാണ് സുധീഷ് മരണമടഞ്ഞത്.

പരേതനായ രാഘവൻ, നാരായണി എന്നിവരാണ് സുധീഷിന്റെ മാതാപിതാക്കൾ. വിജയൻ, ഗീത, മനോജ്, സുനിത, സുനേഷ് എന്നിവരാണ് സഹോദരങ്ങൾ. പരിയാരം പോലീസ് ഇൻക്വസ്റ്റ് നടപടികൾ പൂർത്തിയാക്കി. മൃതദേഹം പോസ്റ്റ്‌മോർട്ടത്തിനുശേഷം തിങ്കളാഴ്ച നാട്ടിലെത്തിച്ച് സംസ്കരിക്കും.

ഈ വാർത്ത ഷെയർ ചെയ്യൂ. 

Article Summary: Lorry driver TV Sudheesh (35) dies after KSRTC bus hits auto at Pariyaram; three friends injured.

#Pariyaram #KSRTCAccident #RoadAccident #Kannur #KeralaNews #Tragedy