ഉമ്മൻ ചാണ്ടി സ്മൃതിഫലകം ചവറ്റുകുട്ടയിൽ; റിയാസ് ഫലകം സ്ഥാപിച്ചു, കണ്ണൂരിൽ കോൺഗ്രസ് പ്രക്ഷോഭത്തിൽ

കണ്ണൂർ: (KVARTHA) മുൻ മുഖ്യമന്ത്രി ഉമ്മൻ ചാണ്ടിയുടെ പേരുണ്ടായിരുന്ന ശിലാഫലകം നീക്കം ചെയ്ത് ചവറ്റുകുട്ടയിൽ തള്ളുകയും, പകരം ടൂറിസം വകുപ്പ് മന്ത്രി മുഹമ്മദ് റിയാസിന്റെ പേരിലുള്ള പുതിയ ഫലകം സ്ഥാപിക്കുകയും ചെയ്തതിൽ കണ്ണൂരിൽ വൻ പ്രതിഷേധം.

പയ്യാമ്പലത്തെ കുട്ടികളുടെ പാർക്കും സീ-പാത്ത് വേയും ഉമ്മൻ ചാണ്ടി മുഖ്യമന്ത്രിയായിരുന്നപ്പോൾ ഉദ്ഘാടനം ചെയ്തതായിരുന്നു. ഈ പദ്ധതിയുടെ 2015 മെയ് 15-ലെ ഉദ്ഘാടന ശിലാഫലകമാണ് ഇപ്പോൾ മാറ്റിയത്.

ഡി.ടി.പി.സി. അധികൃതരുടെ ഈ നടപടി 'അൽപത്തരത്തിന്റെ അങ്ങേയറ്റ'മാണെന്ന് ഡി.സി.സി. പ്രസിഡന്റ് അഡ്വ. മാർട്ടിൻ ജോർജ് ആരോപിച്ചു. ഉമ്മൻ ചാണ്ടിയുടെ പേരുള്ള ഫലകം കുപ്പത്തൊട്ടിയിൽ തള്ളി, അതിന്മേൽ ചൂലെടുത്ത് വെച്ച നിലയിലാണ് കണ്ടതെന്നും അദ്ദേഹം കൂട്ടിച്ചേർത്തു. ആരുടെ നിർദ്ദേശപ്രകാരമാണ് ഇത് ചെയ്തതെന്ന് വ്യക്തമാക്കണമെന്നും മാർട്ടിൻ ജോർജ് ആവശ്യപ്പെട്ടു.

മുൻ മുഖ്യമന്ത്രിയുടെ ശിലാഫലകം കോൺഗ്രസ് പ്രവർത്തകർ പാർക്കിന്റെ കവാടത്തിൽ വീണ്ടും സ്ഥാപിച്ചിട്ടുണ്ട്. ഇത് നശിപ്പിക്കാനോ എടുത്തുമാറ്റാനോ ശ്രമിച്ചാൽ അവിടെത്തന്നെ പുനഃസ്ഥാപിക്കുമെന്നും കോൺഗ്രസ് മുന്നറിയിപ്പ് നൽകി. ബോധപൂർവമായ ഈ നടപടിക്ക് പിന്നിൽ ഏത് വിവരദോഷിയായ ഉദ്യോഗസ്ഥനാണെന്ന് അന്വേഷിക്കണമെന്നും അദ്ദേഹം ആവശ്യപ്പെട്ടു. 

മുഹമ്മദ് റിയാസ് പുതിയതായി എന്തെങ്കിലും ഉദ്ഘാടനം ചെയ്തിട്ടുണ്ടെങ്കിൽ ഫലകം സ്ഥാപിക്കാൻ വേറെയും സ്ഥലങ്ങളുണ്ടായിട്ടും ഉമ്മൻ ചാണ്ടിയുടെ ഫലകം അടർത്തി മാറ്റിയത് ദുരുദ്ദേശപരമാണെന്ന് കോൺഗ്രസ് നേതൃത്വം കുറ്റപ്പെടുത്തി.

ഉമ്മൻ ചാണ്ടി മുഖ്യമന്ത്രിയും എ.പി. അനിൽകുമാർ ടൂറിസം മന്ത്രിയുമായിരുന്ന കാലത്ത് കണ്ണൂരിലെ ടൂറിസം മേഖലയിൽ നിരവധി വികസന പദ്ധതികൾ നടപ്പാക്കിയിട്ടുണ്ട്. അവയെല്ലാം മറച്ചുവെച്ച് റിയാസാണ് വികസനം കൊണ്ടുവന്നതെന്ന് വരുത്തിത്തീർക്കാനുള്ള പ്രഹസനമാണിതെന്നും കോൺഗ്രസ് പറഞ്ഞു. 

മുഖ്യമന്ത്രിമാരും മന്ത്രിമാരും മാറുമ്പോൾ ശിലാഫലകങ്ങൾ മാറ്റുകയാണെങ്കിൽ ഒമ്പത് വർഷം മുമ്പുള്ള ഒരു ഫലകവും കേരളത്തിൽ കാണാൻ സാധിക്കില്ലല്ലോ എന്നും അവർ ചോദിച്ചു. വികസന പദ്ധതികൾ ആവിഷ്കരിച്ച ജനനേതാക്കളുടെ ഓർമ്മ നിലനിർത്താനാണ് ശിലാഫലകങ്ങൾ സ്ഥാപിക്കുന്നത്. 

അതിനെ നിരാകരിക്കുന്ന ഈ നടപടി ആദരണീയനായ മുൻമുഖ്യമന്ത്രിയെ അവഹേളിക്കുന്നതിന് തുല്യമാണെന്നും അഡ്വ. മാർട്ടിൻ ജോർജ് പറഞ്ഞു. സംഭവത്തിൽ അന്വേഷണം നടത്തി കുറ്റക്കാർക്കെതിരെ നടപടിയെടുക്കണമെന്ന് അദ്ദേഹം ആവശ്യപ്പെട്ടു.

കെ. പ്രമോദ്, റിജിൽ മാക്കുറ്റി, ബൈജു വർഗ്ഗീസ്, ടി. ജയകൃഷ്ണൻ, പി. മുഹമ്മദ് ഷമ്മാസ്, കായക്കൽ രാഹുൽ, എം.കെ. വരുൺ, ഫർഹാൻ മുണ്ടേരി, ഷിബിൽ കെ.കെ, പി.എ. ഹരി, റിജിൻ ബാബു തുടങ്ങിയ നേതാക്കൾ പ്രതിഷേധത്തിൽ പങ്കെടുത്തു.

ഉമ്മൻ ചാണ്ടിയുടെ സ്മരണ നിലനിർത്താനുള്ള ഈ പോരാട്ടത്തിന് നിങ്ങളുടെ പിന്തുണ അറിയിക്കുക.

Article Summary: Oommen Chandy's plaque removed, sparking Congress protests.

#Kannur #OommenChandy #CongressProtest #KeralaPolitics #PlaqueRow #MinisterRias