സഞ്ചാരികൾക്ക് പുത്തൻ അനുഭവം നൽകാൻ മുണ്ടേരിക്കടവ് പക്ഷിസങ്കേതം ഒരുങ്ങുന്നു; ഇക്കോ ടൂറിസം പദ്ധതിക്ക് തുടക്കം

കണ്ണൂർ: (KVARTHA) ദേശാടന പക്ഷികളുടെ പറുദീസയായ മുണ്ടേരിക്കടവ് പക്ഷിസങ്കേതത്തിൽ എത്തുന്ന പക്ഷിനിരീക്ഷകർക്കും സഞ്ചാരികൾക്കും കൂടുതൽ സൗകര്യങ്ങൾ ഒരുക്കുന്ന ഇക്കോ ടൂറിസം പദ്ധതിയുടെ ആദ്യഘട്ടത്തിന് തുടക്കമായി. 

സൗന്ദര്യവൽക്കരണം, ടോയ്‌ലെറ്റ് ബ്ലോക്ക് നിർമാണം, മൊബൈൽ കൗണ്ടറുകൾ, ദിശാസൂചിക ബോർഡുകൾ, ബേർഡ് ഡെൻ (പക്ഷികളെ കാണാനുള്ള മുറികൾ), പ്ലാൻ്റുകൾ, വാച്ച് ടവറുകൾ എന്നിവ ഉൾപ്പെടെ വിപുലമായ സൗകര്യങ്ങളാണ് ആദ്യഘട്ടത്തിൽ ഒരുങ്ങുന്നത്.

വിനോദസഞ്ചാര വകുപ്പ് ആദ്യഘട്ടത്തിൽ 79 ലക്ഷം രൂപയുടെ പദ്ധതിയാണ് ആരംഭിച്ചത്. തെന്മല ഇക്കോ ടൂറിസം പ്രൊമോഷൻ സൊസൈറ്റിക്കാണ് നിർമാണ ചുമതല. മത്സരാധിഷ്ഠിത ടെൻഡർ വഴി ഏച്ചൂർ സർവീസ് സഹകരണ ബാങ്കിനെ തുടർപരിപാലന ഏജൻസിയായി സംസ്ഥാന സർക്കാർ നിശ്ചയിച്ചിട്ടുണ്ട്. മൂന്നു മാസത്തിനുള്ളിൽ പദ്ധതികൾ പൂർത്തിയാക്കാനാണ് ലക്ഷ്യമിടുന്നത്.

അഞ്ഞൂറിലധികം പക്ഷി വൈവിധ്യങ്ങളും നിരവധി മത്സ്യങ്ങളും ഞണ്ടുകളും തുമ്പികളും മറ്റ് സസ്യജന്തു വൈവിധ്യങ്ങളും ഇവിടെയുണ്ട്. ഇവ സംരക്ഷിക്കാൻ 11 വർഷം മുൻപ് ബജറ്റിൽ തുക നീക്കിവെച്ചെങ്കിലും പദ്ധതി നടന്നില്ല. തുടർന്ന്, എം.എൽ.എ.യായ മന്ത്രി രാമചന്ദ്രൻ കടന്നപ്പള്ളിക്ക് തദ്ദേശീയരും വിവിധ സംഘടനകളും നിവേദനം നൽകിയതിനെത്തുടർന്നാണ് നിരവധി കടമ്പകൾ കടന്ന് പദ്ധതിക്ക് തുടക്കമായത്.

പാർക്കിങ് സ്ഥലം, ശൗചാലയം, കോഫി ഷോപ്പ്, സുവനീർ ഷോപ്പുകൾ, ഇൻഫർമേഷൻ ബോർഡുകൾ, ഗൈഡ് സേവനം, വ്യൂയിങ് ഡെക്ക്, കയാക്കിങ്, ആംഗ്ലിങ്, സൈക്ലിങ്, ബോട്ട് ജെട്ടി, ഹൈക്കിങ് തുടങ്ങിയ സൗകര്യങ്ങൾ വരുന്നതോടെ നിരവധി ആഭ്യന്തര, വിദേശ സഞ്ചാരികളെ ആകർഷിക്കുമെന്നാണ് പ്രതീക്ഷ. ഇത് മേഖലയുടെ സമഗ്ര വികസനത്തിന് ആക്കം കൂട്ടുമെന്നും കരുതുന്നു.

മുണ്ടേരിക്കടവിലെ ഈ പുതിയ പദ്ധതിയെക്കുറിച്ച് നിങ്ങളുടെ അഭിപ്രായം എന്താണ്? ഈ വാർത്ത സുഹൃത്തുക്കളുമായി പങ്കുവെയ്ക്കൂ.

Article Summary: Munderykadavu Ecotourism project begins first phase in Kannur.

#Munderykadavu #Ecotourism #Kannur #KeralaTourism #BirdSanctuary #KeralaNews