ജന്മനാട്ടിലെ സ്കൂൾകാലം ഓർത്തെടുത്ത് മന്ത്രി റോജി എം ജോൺ; ഉദയഗിരിയിൽ ആവേശകരമായ സ്വീകരണം

കണ്ണൂർ: (KVARTHA) മന്ത്രിയായ ശേഷം ആദ്യമായി ജന്മനാടായ കണ്ണൂർ ജില്ലയിലെ ഉദയഗിരിയിൽ എത്തിയ സംസ്ഥാന ഉന്നത വിദ്യാഭ്യാസ മന്ത്രി റോജി എം ജോണിന് ആവേശകരമായ വരവേൽപ്പ്. ഉദയഗിരി ഗ്രാമപഞ്ചായത്തും പ്രത്യാശ യു പി സ്കൂളും സംയുക്തമായാണ് മന്ത്രിക്ക് പൗരസ്വീകരണം നൽകിയത്. ഉദയഗിരി സെൻ്റ് മേരിസ് ചർച്ച് പാരിഷ് ഹാളിൽ നടന്ന യോഗത്തിൽ പത്താം ക്ലാസ് വരെ താൻ ജീവിച്ച താബോർ എന്ന മലയോരനാട്ടിലെ പഴയകാല ഓർമകൾ മന്ത്രി പങ്കുവെച്ചു. ചടങ്ങിൽ വെച്ച് തന്നെ പഠിപ്പിച്ച അധ്യാപകരെ മന്ത്രി പൊന്നാട അണിയിച്ച് ആദരിക്കുകയും ചെയ്തു.

സ്കൂൾ ഓർമകൾ പങ്കുവെച്ച് മന്ത്രി

അഞ്ച്, ആറ്, ഏഴ് ക്ലാസുകളിൽ പഠിച്ച പ്രത്യാശ സ്കൂളിലേക്കും തിരിച്ചും വീട്ടിൽ നിന്നും നടന്നായിരുന്നു പോയിക്കൊണ്ടിരുന്നതെന്ന് മന്ത്രി ഓർമിച്ചു. ‘അന്ന് റോഡില്ല. നടവഴി പിന്നിട്ടാൽ കല്ലിലും മണ്ണിലും ചവിട്ടിയുള്ള യാത്രയാണ്. അന്നത്തെ മലയോര കർഷക കുടുംബത്തിലെ ഒരു വിദ്യാർഥിക്ക് നേരിടേണ്ട എല്ലാ ബുദ്ധിമുട്ടുകളും അനുഭവിച്ചിട്ടുണ്ട്,’ അദ്ദേഹം പറഞ്ഞു. എല്ലാ പ്രയാസങ്ങളിൽ നിന്നും രക്ഷപ്പെടാനുള്ള മാർഗം വിദ്യാഭ്യാസമാണ് എന്ന ചിന്ത തനിക്ക് പകർന്നുനൽകിയത് മാതാപിതാക്കളും അന്നത്തെ അധ്യാപകരുമാണെന്നും മന്ത്രി കൂട്ടിച്ചേർത്തു.

ഒന്ന് മുതൽ നാല് വരെ താബോർ സ്കൂളിലായിരുന്നു മന്ത്രി റോജിയുടെ പഠനം. ഹൈസ്കൂൾ പഠനകാലം തിരുമേനി സ്കൂളിലായിരുന്നു. പിന്നീട് പ്രീഡിഗ്രി മുതലാണ് പഠനാവശ്യത്തിനായി എറണാകുളത്തേക്ക് മാറിയത്.

ഉദ്ഘാടനവും പ്രഭാഷണങ്ങളും

പൗരസ്വീകരണ പരിപാടി അഡ്വ. സജീവ് ജോസഫ് എംഎൽഎ ഉദ്ഘാടനം ചെയ്തു. ഉദയഗിരി ഗ്രാമപഞ്ചായത്ത് പ്രസിഡൻ്റ് ടെസി ആലുംമൂട്ടിൽ അധ്യക്ഷത വഹിച്ചു. തലശ്ശേരി എജുക്കേഷനൽ സൊസൈറ്റി കോർപറേറ്റ് മാനേജർ ഡോ. സോണി വടശ്ശേരിയിൽ മുഖ്യപ്രഭാഷണവും സ്കൂൾ മാനേജർ ഫാദർ സേവ്യർ പുത്തൻപുരക്കൽ അനുഗ്രഹപ്രഭാഷണവും നടത്തി. ഗ്രാമപഞ്ചായത്ത് ഭരണ സമിതി ചടങ്ങിൽ വെച്ച് മന്ത്രിക്ക് ഉപഹാരം സമ്മാനിച്ചു.

തളിപ്പറമ്പ് ബ്ലോക്ക് പഞ്ചായത്ത് വൈസ് പ്രസിഡൻ്റ് അജേഷ് പൂവനാട്ട്, ഉദയഗിരി ഗ്രാമപഞ്ചായത്ത് വൈസ് പ്രസിഡൻ്റ് എൻ എൻ പ്രസന്നകുമാർ, ജില്ലാ പഞ്ചായത്ത് അംഗം ജോജി വർഗീസ് വട്ടോളി, ഗ്രാമപഞ്ചായത്ത് ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്സൺ ഷീൻ തെക്കേൽ, ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ സരിത ജോസ്, ഗ്രാമപഞ്ചായത്ത് അംഗം ബാബു പറപ്പള്ളിൽ, പൗരസമിതി കൺവീനർ തോമസ് വെക്കത്താനം, സ്കൂൾ പ്രധാനാധ്യാപിക കെ സാലി, താബോർ സെൻ്റ് ജോസഫ് ചർച്ച് വികാരി ഫാദർ ജോർജ് ചിലമ്പികുന്നേൽ, ഇ എം നാസർ, ജോയിച്ചൻ പള്ളിയാലിൽ, ഗ്രാമപഞ്ചായത്ത് സെക്രട്ടറി കെ രാജീവൻ തുടങ്ങിയവരും പരിപാടിയിൽ പങ്കെടുത്തു.

പ്രാദേശിക വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Minister Roji M John received a civic reception in his hometown Udayagiri.

#RojiMJohn #Udayagiri #KannurNews #KeralaMinisters #MalayalamNews #CivicReception #AnjanaNews