തിരുവനന്തപുരത്ത് പോലീസ് അതിക്രമം നടന്നിട്ടില്ല; യൂണിവേഴ്സിറ്റി കോളജിൽ നടക്കുന്നത് ഗുണ്ടായിസമെന്ന് മന്ത്രി ഒജെ ജനീഷ്

കണ്ണൂർ: (KVARTHA) തിരുവനന്തപുരത്ത് കോൺഗ്രസ് നടത്തിയ പ്രതിഷേധ മാർച്ചിനിടെ പോലീസ് അതിക്രമം നടന്നിട്ടില്ലെന്ന് മന്ത്രി ഒജെ ജനീഷ് വ്യക്തമാക്കി. കണ്ണൂർ പയ്യാമ്പലം ഗസ്റ്റ് ഹൗസിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. കോൺഗ്രസ് ജനപ്രതിനിധികൾ കഴിഞ്ഞ ദിവസം പ്രതിഷേധ മാർച്ച് നടത്തിയത് കേന്ദ്ര സർക്കാരിനും ഇലക്ഷൻ കമ്മീഷനും എതിരെയാണെന്നും, ആ സമരത്തെ ബിജെപി എതിർക്കുന്നത് മനസ്സിലാക്കാമെന്നും മന്ത്രി പറഞ്ഞു. എന്നാൽ ഇതിൽ എസ്എഫ്ഐക്ക് എന്താണ് പ്രശ്നമെന്ന് അദ്ദേഹം ചോദിച്ചു. കേന്ദ്ര സർക്കാരിനും ഇലക്ഷൻ കമ്മീഷനുമെതിരെ നടത്തിയ സമരത്തിനെതിരെ ഡിവൈഎഫ്ഐയും എസ്എഫ്ഐയും ചേർന്ന് നടത്തിയത് വൻ ചതിപ്രയോഗമാണെന്ന് മന്ത്രി ആരോപിച്ചു.

യൂണിവേഴ്സിറ്റി കോളജിൽ നടക്കുന്നത് ഗുണ്ടായിസം

കോൺഗ്രസ് ജനപ്രതിനിധികൾ യാതൊരു പ്രകോപനവും ഉണ്ടാക്കിയിട്ടില്ലെന്നും, അവർ നിന്ന സ്ഥലത്തേക്കാണ് ബിയർ കുപ്പിയേറുണ്ടായതെന്നും മന്ത്രി ഒജെ ജനീഷ് വ്യക്തമാക്കി. പ്രതിഷേധ മാർച്ചിനെ ആക്രമിച്ചത് എസ്എഫ്ഐ പ്രവർത്തകരാണ്. തിരുവനന്തപുരം യൂണിവേഴ്സിറ്റി കോളജ് എസ്എഫ്ഐയുടെ കോട്ടയാണെന്നും, അവിടെ നടക്കുന്നത് ജനാധിപത്യ പ്രവർത്തനമല്ല, മറിച്ച് തികഞ്ഞ ഗുണ്ടായിസമാണെന്നും മന്ത്രി തുറന്നടിച്ചു. ഇത്തരം പ്രവർത്തനങ്ങൾ കർശനമായി നിയന്ത്രിക്കപ്പെടണം. വാസ്തവത്തിൽ പിടികിട്ടാപ്പുള്ളികളെ പിടികൂടാനുള്ള 'ഓപ്പറേഷൻ തൂഫാൻ' റെയ്ഡാണ് ഇപ്പോൾ യൂണിവേഴ്സിറ്റി കോളജ് ക്യാമ്പസിന് മുൻപിൽ നടക്കുന്നതെന്നും അദ്ദേഹം കൂട്ടിച്ചേർത്തു.

കൃഷ്ണദാസിൻ്റെ വാഹനം ആക്രമിച്ചിട്ടില്ല

കോൺഗ്രസ് നടത്തുന്ന സമരം മുൻ മുഖ്യമന്ത്രി പിണറായി വിജയനെതിരെയെന്ന് തോന്നണമെങ്കിൽ ചില്ലറ മാനസിക പ്രശ്നം പോരെന്നും മന്ത്രി പരിഹസിച്ചു. ഇതിനിടെ ബിജെപി നേതാവ് പികെ കൃഷ്ണദാസിൻ്റെ വാഹനം കോൺഗ്രസ് പ്രവർത്തകർ ആക്രമിച്ചിട്ടില്ലെന്നും അദ്ദേഹം വ്യക്തമാക്കി. സംസ്ഥാന കമ്മിറ്റി ഓഫീസിന് നേരെയുണ്ടായ ബിയർ കുപ്പിയേറ് നടന്നതിനെക്കുറിച്ച് പോലീസ് വിശദമായ അന്വേഷണം നടത്തിവരികയാണ്.

പരിഹസിച്ച് 'രക്ഷാപ്രവർത്തനം'

മുൻ ഇടത് സർക്കാരിൻ്റെ കാലത്തെ വിവാദ നടപടികളെ ഓർമിപ്പിച്ചുകൊണ്ടായിരുന്നു മന്ത്രിയുടെ മറുപടി. മുൻ പിണറായി സർക്കാരിൻ്റെ കാലത്ത് നടന്നതുപോലെയുള്ള 'രക്ഷാപ്രവർത്തനമാണ്' ഇപ്പോൾ പോലീസ് നടത്തുന്നതെങ്കിൽ കാര്യങ്ങൾ ഇങ്ങനെയാകുമോയെന്നും മന്ത്രി ഒജെ ജനീഷ് ചോദിച്ചു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Minister OJ Janeesh clarified that there was no police brutality in Thiruvananthapuram and accused SFI of initiating violence during the Congress march against the Central Government and Election Commission, condemning their actions at University College as 'gondaism'.

#Kvartha #OJJaneesh #KeralaPolitics #TrivandrumNews #CongressKerala #SFI #MalayalamNews #AmmuNews