മാടായിപ്പാറയിലെ ഇക്കോ പാർക്കും കമ്യൂണിറ്റി സെൻ്ററും നിയമങ്ങൾ പാലിച്ചുള്ളത്; വ്യാജ പ്രചാരണങ്ങൾക്കെതിരെ സൊസൈറ്റി ഭാരവാഹികൾ

കണ്ണൂർ: (KVARTHA) മാടായിപ്പാറയിൽ നിർമിക്കുന്ന ഇക്കോ പാർക്കും കമ്മ്യൂണിറ്റി സെൻ്ററും സംബന്ധിച്ച് നടക്കുന്ന പ്രചാരണങ്ങൾ തികച്ചും അടിസ്ഥാനരഹിതമാണെന്ന് ശ്രീ നാരായണ എഡ്യൂക്കേഷണൽ ആൻഡ് ചാരിറ്റബിൾ സൊസൈറ്റി ഭാരവാഹികൾ വ്യക്തമാക്കി. കണ്ണൂരിൽ വിളിച്ചുചേർത്ത വാർത്താസമ്മേളനത്തിലാണ് സൊസൈറ്റി ഭാരവാഹികൾ ഇക്കാര്യം അറിയിച്ചത്. പദ്ധതിയുമായി ബന്ധപ്പെട്ട് പരിസ്ഥിതിവാദികളായ ഒരു സംഘവും ദേവസ്വം പ്രതിനിധികളുമാണ് കമ്മ്യൂണിറ്റി പാർക്കിനെതിരെ വ്യാജ പ്രചാരണം നടത്തുന്നത്. ഇതിൽ യാതൊരു വാസ്തവവുമില്ലെന്ന് ഭാരവാഹികൾ കൂട്ടിച്ചേർത്തു.

സ്കൂൾ അടച്ചുപൂട്ടലും കമ്മ്യൂണിറ്റി ഹാളും

ശ്രീനാരായണ ഗുരുദേവൻ്റെ ദർശനങ്ങൾ പ്രചരിപ്പിക്കുന്നതിനായാണ് സൊസൈറ്റിയുടെ കീഴിൽ മാടായിപ്പാറയിൽ സ്കൂൾ നിർമിച്ച് പ്രവർത്തനം ആരംഭിച്ചത്. എന്നാൽ ഇവിടേക്കുള്ള വഴി നൽകാത്തതിനെ തുടർന്ന് 2022 ജൂണിൽ ഇംഗ്ലീഷ് മീഡിയം സ്കൂൾ പൂട്ടേണ്ടിവന്നു. 

200-ഓളം കുട്ടികൾ പഠിച്ചിരുന്ന സ്കൂളാണ് അടച്ചുപൂട്ടിയത്. പിന്നീടത് പൊതുപരിപാടികൾ നടത്തുന്നതിനായി ക്ലാസുകൾ ഏകീകരിച്ച് കമ്മ്യൂണിറ്റി ഹാളാക്കി മാറ്റുകയായിരുന്നു. ആകെ മൂന്ന് ഏക്കർ സ്ഥലമാണ് സൊസൈറ്റിക്ക് ഇവിടെയുള്ളതെന്ന് ഭാരവാഹികൾ വിശദീകരിച്ചു.

വഴി തുറന്നുനൽകണം

മണ്ണിട്ട് അടച്ച വഴി തുറന്നുതരാൻ പഞ്ചായത്ത് അധികൃതർ ഉടൻ തയാറാകണമെന്ന് ഭാരവാഹികൾ ആവശ്യപ്പെട്ടു. മാടായിപ്പാറയിലെ നിർമാണ പ്രവർത്തനങ്ങൾ പൂർണമായും സർക്കാർ നിർദേശങ്ങളും നിയമങ്ങളും പാലിച്ചാണ് മുന്നോട്ട് പോകുന്നത്. അനധികൃത നിർമാണമാണെന്ന തരത്തിലുള്ള ആരോപണങ്ങൾ അടിസ്ഥാനരഹിതമാണ്. 

യാഥാർഥ്യങ്ങൾ മനസ്സിലാക്കാതെയാണ് ചിലർ വ്യാജ പ്രചാരണങ്ങൾ അഴിച്ചുവിടുന്നതെന്നും, ഇത്തരം തെറ്റിദ്ധാരണജനകമായ നീക്കങ്ങളിൽ നിന്ന് അവർ പിന്മാറണമെന്നും സൊസൈറ്റി ഭാരവാഹികൾ വാർത്താസമ്മേളനത്തിൽ അഭ്യർഥിച്ചു. വാർത്താസമ്മേളനത്തിൽ സി ഭാസ്കരൻ, സിവി ജിതിൻ, രാമചന്ദ്രൻ പട്ടേരി, പി രാമചന്ദ്രൻ എന്നിവർ പങ്കെടുത്തു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Office bearers of the Sree Narayana Educational and Charitable Society clarified in a press conference in Kannur that the ongoing campaigns against their Eco Park and Community Center at Madayippara are completely baseless and the construction follows all environmental laws.

#Kvartha #KannurNews #Madayippara #EcoPark #KeralaNews #MalayalamNews #LocalNews #KannurUpdates #AmmuNews