അപകട വളവുകൾ ഇനി ഓർമ്മ; മാക്കൂട്ടം ചുരത്തിൽ വീതി കൂട്ടിയുള്ള നവീകരണം പുരോഗമിക്കുന്നു

കണ്ണൂർ: (KVARTHA) കേരള-കർണാടക അന്തർ സംസ്ഥാന പാതയായ ഇരിട്ടി - മാക്കൂട്ടം - പെരുമ്പാടി ചുരം പാതയിലെ നവീകരണ പ്രവർത്തനങ്ങൾ അവസാന ഘട്ടത്തിൽ എത്തിനിൽക്കുന്നു. മഴക്കാലം ആരംഭിക്കുന്നതിന് മുൻപായി നിർമ്മാണം പൂർത്തിയാക്കുക എന്നതാണ് ലക്ഷ്യം. 

കൂട്ടുപുഴ പാലം മുതൽ മാക്കൂട്ടം വരെ വരുന്ന 1.400 കിലോമീറ്റർ ദൂരം 7 മീറ്റർ വീതിയിൽ മെക്കാഡം ടാറിംഗ് നടത്തുന്ന പ്രവൃത്തി അതിവേഗം പുരോഗമിക്കുകയാണ്. 2.7 കോടി രൂപയാണ് ഈ പദ്ധതിയുടെ ചിലവ്. വീരാജ്പേട്ട എൻബിഎൻ കൺസ്ട്രക്ഷൻസാണ് കരാർ ഏറ്റെടുത്തിരിക്കുന്നത്. മഴയ്ക്ക് മുൻപ് തന്നെ പ്രവൃത്തി പൂർത്തീകരിക്കുമെന്ന് അധികൃതർ നേരത്തെ അറിയിച്ചിരുന്നു.

കണ്ണൂർ എയർപോർട്ട് ഉൾപ്പെടെ കണ്ണൂർ ജില്ലയെ കർണാടകയുമായി ബന്ധിപ്പിക്കുന്ന മാക്കൂട്ടം - പെരുമ്പാടി ചുരം പാതയുടെ നവീകരണം സമയബന്ധിതമായി പൂർത്തിയാക്കുമെന്ന് കർണാടക മരാമത്ത് മന്ത്രി സതീഷ് ജാർക്കിഹോളിയും വിരാജ്പേട്ട എംഎൽഎ എ.എസ്.പൊന്നണ്ണയും ഉറപ്പ് നൽകിയിരുന്നു. 

കൂട്ടുപുഴ പാലം അതിർത്തി വരെ റോഡിൽ സന്ദർശനം നടത്തിയ ശേഷമായിരുന്നു ഇവരുടെ പ്രതികരണം. ചുരം റോഡിൽ നാല് കിലോമീറ്റർ ദൂരത്തിൽ സെൻട്രൽ റോഡ് ആൻഡ് ഇൻഫ്രാസ്ട്രക്‌ചർ ഫണ്ടിൽ നിന്നുള്ള 6 കോടി രൂപ ഉപയോഗിച്ച് മേമനക്കൊല്ലി മുതൽ മുമ്മടക്ക് വളവ് വരെയുള്ള ഭാഗത്ത് (മാക്കൂട്ടം സംസ്ഥാന പാതയിൽ 85.300 കിലോമീറ്റർ മുതൽ 89.300 കിലോമീറ്റർ വരെ) ഡിബിഎം ആൻഡ് ബിസി റീടാറിംഗ് പ്രവൃത്തി പൂർത്തിയായി കഴിഞ്ഞു.

മൂന്ന് ഘട്ടങ്ങളിലായാണ് ചുരം നവീകരണം നടക്കുന്നത്. പെരുമ്പാടി മുതൽ കൂട്ടുപുഴ ഭാഗത്തേക്കുള്ള 2.3 കിലോമീറ്റർ ദൂരം 5 കോടി രൂപ ചെലവിൽ 7 മീറ്റർ മെക്കാഡം ടാറിങ്ങോടെ നവീകരിക്കുന്ന പ്രവൃത്തി ആരംഭിച്ചു കഴിഞ്ഞു. 

വീതി കുറഞ്ഞ അപകട സാധ്യതയുള്ള ഹനുമാൻ ക്ഷേത്രത്തിന് മുൻപിലെ വളവ് വീതി കൂട്ടുന്ന പ്രവൃത്തി ഉൾപ്പെടെ ആരംഭിച്ചിട്ടുണ്ട്. അവശേഷിച്ച 12 കിലോമീറ്റർ ചുരം പാത അറ്റകുറ്റപ്പണി നടത്തി ഗതാഗതയോഗ്യമാക്കിയിട്ടുണ്ട്. വിവിധ ഘട്ടങ്ങളിലായി 12 കിലോമീറ്റർ ദൂരവും വീതി കൂട്ടി നവീകരണം ഉറപ്പാക്കുമെന്നും അധികൃതർ വ്യക്തമാക്കി.

മാക്കൂട്ടം ചുരം പാതയുടെ നവീകരണ പ്രവർത്തനങ്ങളെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: Renovation of Iritty-Maakkootam-Perumpadi ghat road, connecting Kerala and Karnataka, is in final stages, focusing on widening dangerous curves before monsoon.

#MaakkootamGhat #KeralaKarnatakaRoad #RoadRenovation #KannurNews #Infrastructure #ChuramRoad