കുപ്പത്തെ മണ്ണിടിച്ചിൽ; കുടുംബങ്ങൾക്ക് കുടിവെള്ളം വിതരണം ചെയ്യാനും വീടുകളിൽ ചെളി അടിയുന്നത് തടയാനും തീരുമാനം

തളിപ്പറമ്പ്: (KVARTHA) ദേശീയപാത വികസന സ്ഥലത്തു നിന്ന് മണ്ണും ചളിയും ഒഴുകി തളിപ്പറമ്പ് കുപ്പം കപ്പണത്തട്ടിലെ കുടുംബങ്ങൾ നേരിടുന്ന ദുരിതത്തിന് പരിഹാരമായി കിണർ മലിനപ്പെട്ട വീടുകളിൽ കുടിവെള്ള വിതരണം നടത്താനും ചെളി അടിയുന്നത് തടയാനും ഉന്നതതല യോഗം തീരുമാനിച്ചു. ഞായറാഴ്ച തളിപ്പറമ്പ് താലൂക്ക് ഓഫീസിൽ ചേർന്ന യോഗത്തിലാണ് ഈ സുപ്രധാന തീരുമാനങ്ങൾ കൈക്കൊണ്ടത്.

ചെളിയടിയുന്നത് തടയാൻ നടപടി

പ്രശ്നം നേരിടുന്ന സി എച്ച് നഗറിലെ വീടുകളിലോ തെരുവിലോ വീട്ടുമുറ്റത്തോ ഒരു കാരണവശാലും ചെളി എത്താതിരിക്കാനുള്ള നടപടി സ്വീകരിക്കണമെന്ന് ദേശീയപാത അധികൃതരോട് യോഗം ആവശ്യപ്പെട്ടു. ഇതിന് ചെയ്യേണ്ടതായ സാങ്കേതിക നടപടികൾ പൊതുമരാമത്ത് വകുപ്പ് നിർദേശിക്കും. 

കിണറുകളിൽ ചെളി അടിയുന്ന പ്രശ്നത്തിനു പരിഹാരമായി അത്തരം കുടുംബങ്ങൾക്ക് കുടിവെള്ള വിതരണം നടത്താൻ പരിയാരം ഗ്രാമപഞ്ചായത്തിന് നിർദേശം നൽകി. ഇതിനുള്ള ഫണ്ട് ദേശീയപാത വികസന നിർമാണം ഏറ്റെടുത്ത കരാർ കമ്പനി തന്നെ വഹിക്കണം.

ദ്രുതകർമസേന രൂപീകരിച്ചു

പ്രശ്നത്തിൽ അപ്പപ്പോൾ ഇടപെടാനും പരിഹാരം കൈക്കൊള്ളാനും പയ്യന്നൂർ, തളിപ്പറമ്പ് തഹസിൽദാർമാർ, പരിയാരം ഗ്രാമപഞ്ചായത്ത് പ്രസിഡൻ്റ്, വില്ലേജ് ഉദ്യോഗസ്ഥർ, പിഡബ്ല്യുഡി (ദേശീയപാത), പിഡബ്ല്യുഡി (റോഡ്) വിഭാഗങ്ങൾ എന്നിവരുൾപ്പെട്ട ദ്രുതകർമസേന (ആർആർടി) രൂപീകരിച്ചു. ആർആർടി എല്ലാ ദിവസവും സംഭവസ്ഥലം സന്ദർശിച്ച് ജില്ലാ കളക്ടർക്ക് റിപ്പോർട്ട് നൽകും.

ജനപ്രതിനിധികളുടെ സന്ദർശനം

യോഗത്തിന് മുമ്പ് തളിപ്പറമ്പ് എംഎൽഎ ടി കെ ഗോവിന്ദൻ, ജില്ലാ കളക്ടർ പി വിഷ്ണു രാജ് എന്നിവരടങ്ങിയ സംഘം സംഭവസ്ഥലം സന്ദർശിച്ചു. പ്രശ്നം സർക്കാരിൻ്റെ ശ്രദ്ധയിൽപ്പെടുത്തിയിട്ടുണ്ടെന്നും നിയമസഭയിലെ ശ്രദ്ധക്ഷണിക്കലിൽ ഉന്നയിക്കുമെന്നും എംഎൽഎ അറിയിച്ചു. 

പ്രശ്നം അടിയന്തരമായി പരിഹരിക്കപ്പെടേണ്ടതാണെന്നും പരിഹാരമാർഗങ്ങൾക്ക് നിർമാണ കമ്പനിക്കും കുടിവെള്ളമെത്തിക്കാൻ തദ്ദേശസ്വയംഭരണ സ്ഥാപനത്തിനും നിർദേശം നൽകിയതായും ജില്ലാ കളക്ടർ വ്യക്തമാക്കി.

ഡെപ്യൂട്ടി കളക്ടർ കെ കെ സുബൈർ, തളിപ്പറമ്പ് മുൻസിപ്പൽ ചെയർമാൻ പി കെ സുബൈർ, പരിയാരം ഗ്രാമപഞ്ചായത്ത് പ്രസിഡൻ്റ് സി ബാലകൃഷ്ണൻ, വിവിധ വകുപ്പുകളിലെ ഉദ്യോഗസ്ഥർ എന്നിവരും യോഗത്തിൽ ഉണ്ടായിരുന്നു.

ഈ വാർത്ത സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പ്രാദേശിക വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: A high-level meeting at Thaliparamba Taluk Office resolved to supply drinking water and prevent mudflow into homes in C H Nagar, Kappanathattu, caused by National Highway construction. A Rapid Response Team (RRT) was formed, and MLA T K Govindan, along with Collector P Vishnuraj, visited the site and assured swift action and legislative attention.

#Thaliparamba #Kuppam #NationalHighway #KeralaNews #MalayalamNews #DisasterManagement #RRT #AmmuNews