കണ്ണൂരിലെ വ്ളോഗർമാരുടെ അപകടമരണം; ഡ്രൈവറെ മാറ്റിയെന്ന ആരോപണത്തിൽ സമഗ്ര അന്വേഷണം വേണമെന്ന് ആവശ്യം

കണ്ണൂർ: (KVARTHA) വ്ളോഗർമാരുടെ അപകടമരണത്തിലെ ദുരൂഹത നീക്കാൻ പോലീസിൻ്റെ ഭാഗത്ത് നിന്നും സമഗ്രമായ അന്വേഷണം വേണമെന്ന് നാഷണൽ ഫോറം ഫോർ പീപ്പിൾസ് റൈറ്റ് ആവശ്യപ്പെട്ടു. കണ്ണൂർ പ്രസ് ക്ലബ്ബിൽ നടന്ന വാർത്താ സമ്മേളനത്തിലാണ് ഭാരവാഹികൾ ഇക്കാര്യം വ്യക്തമാക്കിയത്. അപകടമുണ്ടാക്കിയ കാറിൽ ആ സമയത്ത് നാലു പേരുണ്ടായിരുന്നു. എന്നാൽ വാഹനമോടിച്ച യഥാർഥ ഡ്രൈവറെ പിന്നീട് മാറ്റിയെന്ന വിവരവും പുറത്തുവരുന്നുണ്ട്. ഈ അപകടത്തിലെ ദുരൂഹത നീക്കാൻ ടി.ഒ. മോഹനൻ എം.എൽ.എ. ഉൾപ്പെടെ ഇടപെട്ടിട്ടുണ്ട്. നിഷ്പക്ഷമായ പോലീസ് അന്വേഷണത്തിലൂടെ സത്യം പുറത്തു വരണമെന്ന് ഭാരവാഹികൾ ആവശ്യപ്പെട്ടു.

അധികാരികളുടെ അനാസ്ഥ

റോഡ് നിയമങ്ങളുടെ വ്യാപകമായ ലംഘനം മൂലം കേരളത്തിൽ റോഡ് അപകടങ്ങളുടെ എണ്ണവും മരണസംഖ്യയും ദിനംപ്രതി കൂടി വരികയാണെന്നും, ഇതിന് പ്രധാന കാരണം പോലീസ്, മോട്ടോർ വാഹന വകുപ്പ് ഉദ്യോഗസ്ഥരുടെ അനാസ്ഥയാണെന്നും നാഷണൽ ഫോറം ഫോർ പീപ്പിൾസ് റൈറ്റ് ഭാരവാഹികൾ ആരോപിച്ചു. 

അമിതവേഗം, അശ്രദ്ധമായ ഡ്രൈവിങ്, ട്രാഫിക് നിയമങ്ങളുടെ ലംഘനം, മദ്യപിച്ചുള്ള വാഹനമോടിക്കൽ, റോഡുകളിൽ ആവശ്യമായ മുന്നറിയിപ്പ് ബോർഡുകൾ സ്ഥാപിക്കാതിരിക്കൽ എന്നിവയാണ് റോഡ് അപകടങ്ങൾ വലിയ രീതിയിൽ വർധിക്കാൻ കാരണമാകുന്നത് കഴിഞ്ഞ അഞ്ചു വർഷത്തിനുള്ളിൽ മാത്രം കേരളത്തിൽ റിപ്പോർട്ട് ചെയ്യപ്പെട്ട അപകടങ്ങളുടെയും മരണങ്ങളുടെയും എണ്ണം ആശങ്കാജനകമാണ്. റോഡ് അപകടങ്ങൾ പരമാവധി കുറയ്ക്കാൻ സർക്കാർ അടിയന്തര നടപടികൾ സ്വീകരിക്കണം.

കർശന നിയമഭേദഗതികൾ അനിവാര്യം

മദ്യപിച്ച് വാഹനം ഓടിക്കുന്നവരുടെ ഡ്രൈവിങ് ലൈസൻസ് എന്നെന്നേക്കുമായി റദ്ദ് ചെയ്യുന്നതിന് നിയമത്തിൽ ആവശ്യമായ ഭേദഗതി വരുത്താൻ സർക്കാർ തയ്യാറാവണം. കെ.എസ്.ടി.പി. റോഡിൽ അടിയന്തരമായി ഡ്രെയിനേജ് നിർമിക്കാൻ പി.ഡബ്ല്യു.ഡി. നടപടി സ്വീകരിക്കണം. എല്ലാ വാഹനങ്ങളിലും സ്പീഡ് ബ്രേക്കർ സംവിധാനങ്ങൾ ഉണ്ടെന്ന് മോട്ടോർ വാഹന വകുപ്പ് കർശന പരിശോധനയിലൂടെ ഉറപ്പുവരുത്തണമെന്നും ഭാരവാഹികൾ ആവശ്യപ്പെട്ടു.

വാർത്താ സമ്മേളനത്തിൽ നാഷണൽ ഫോറം ഫോർ പീപ്പിൾസ് റൈറ്റ് ഭാരവാഹികളായ ബുഷ്‌റ ചിറക്കൽ, പി.കെ. ലളിത, കെ.കെ. ഗംഗാധരൻ, ഇ.കെ. സിറാജ്, ഖാദർ കാഞ്ഞിരോളി എന്നിവർ പങ്കെടുത്തു.

സിവിക് പ്രശ്നങ്ങളും റോഡ് സുരക്ഷയും പ്രതിപാദിക്കുന്ന ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Forum demands comprehensive probe into mysterious death of Kannur vloggers.

#Kvartha #KannurNews #RoadSafetyKerala #VloggersDeath #KeralaPolice #MalayalamNews #AparnaNews