തെരുവുനായ ശല്യത്തിനെതിരായ നാടകം: കലാകാരനെ കടിച്ചു പരുക്കേൽപ്പിച്ച് തെരുവുനായ

കണ്ണൂർ: (KVARTHA) മയ്യിൽ കണ്ടക്കൈയിൽ തെരുവുനായ ശല്യത്തിനെതിരായ തെരുവ് നാടകത്തിനിടെ നാടക കലാകാരന് നേരെ നായയുടെ ആക്രമണം. മയ്യിൽ കണ്ടക്കൈപ്പറമ്പ് കൃഷ്ണപിള്ള വായനശാല ഞായറാഴ്ച രാത്രി എട്ട് മണിക്ക് സംഘടിപ്പിച്ച 'പേക്കോലം' എന്ന ഏകാംഗനാടകത്തിൻ്റെ അവതരണത്തിനിടെയാണ് കലാകാരനെ നായ കടിച്ചത്. നാടക പ്രവർത്തകനും കണ്ടക്കൈ നിവാസിയുമായ പി രാധാകൃഷ്ണനാണ് നായയുടെ കടിയേറ്റത്.

മൈക്കിലൂടെ നായ കുരയ്ക്കുന്നതുപോലെയുള്ള ശബ്ദം രാധാകൃഷ്ണൻ പുറപ്പെടുവിച്ചതോടെ തെരുവിലുണ്ടായിരുന്ന നായ്ക്കൾ വേദിയിലേക്ക് ഓടിക്കയറി ആക്രമിക്കുകയായിരുന്നു. കൂട്ടത്തിലെ ഒരു നായയാണ് അരങ്ങിലുണ്ടായിരുന്ന രാധാകൃഷ്ണനെ കടിച്ചത്.

നാടകത്തിനിടെ നായയുടെ ആക്രമണമുണ്ടായപ്പോൾ അതും അഭിനയത്തിൻ്റെ ഭാഗമാണെന്നായിരുന്നു കാണികൾ ആദ്യം കരുതിയത്. എന്നാൽ, പിന്നീട് അത് നാടകത്തിൻ്റെ ഭാഗമല്ലെന്നും തെരുവുനായയുടെ ആക്രമണമാണെന്നും മനസ്സിലാക്കിയ വായനശാല പ്രവർത്തകർ അദ്ദേഹത്തെ ആശുപത്രിയിൽ എത്തിക്കുകയായിരുന്നു. 

രാധാകൃഷ്ണൻ നാടകം പൂർത്തിയാക്കിയ ശേഷമാണ് കണ്ണൂർ ഗവ. മെഡിക്കൽ കോളേജിൽ ചികിത്സ തേടിയത്. ഇദ്ദേഹത്തിൻ്റെ കൈകൾക്കും കാലിനുമാണ് കടിയേറ്റത്. അദ്ദേഹം സുഖം പ്രാപിച്ച് വരുന്നതായി ആശുപത്രി അധികൃതർ അറിയിച്ചു.

തെരുവുനായ ശല്യത്തിൻ്റെ ഗൗരവം വെളിവാക്കുന്ന ഈ വാർത്തയെക്കുറിച്ച് നിങ്ങൾക്കെന്താണ് പറയാനുള്ളത്? നിങ്ങളുടെ അഭിപ്രായങ്ങൾ കമൻ്റ് ചെയ്യുക. 

Article Summary: Street play actor attacked by a stray dog while performing a drama against the stray dog menace in Kannur.

#StrayDogAttack #KannurNews #KeralaNews #StreetPlay #DogMenace #Kandakkai