കണ്ണൂരിനെ കേരളത്തിന്റെ കായിക ഹബ്ബാക്കി മാറ്റും; തളിപ്പറമ്പിൽ വടക്കേ മലബാറിലെ ഏറ്റവും വലിയ സ്റ്റേഡിയം വരുമെന്ന് മന്ത്രി വി അബ്ദുറഹ്‌മാൻ

കണ്ണൂർ: (KVARTHA) കായിക മേഖലയിലെ പശ്ചാത്തല സൗകര്യ വികസനത്തിന് ഏറ്റവും അനുയോജ്യമായ ജില്ലയാണ് കണ്ണൂരെന്നും ജില്ലയെ കേരളത്തിന്റെ കായിക ഹബ്ബാക്കി മാറ്റാനുതകുന്ന പദ്ധതികളാണ് സർക്കാർ നടപ്പാക്കുന്നതെന്നും കായിക വകുപ്പ് മന്ത്രി വി. അബ്ദുറഹ്‌മാൻ. 

അഡോട്ട് ടീമുകളുടെ സഹകരണത്തോടെ കണ്ണൂർ കിംസ് ശ്രീചന്ദ് ആശുപത്രിയിൽ ആരംഭിച്ച 'ഫിറ്റ് സ്റ്റാർട്ട് സ്പോർട്സ് ഇൻജ്വറി ക്ലിനിക്ക്' ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

വൻകിട സ്റ്റേഡിയങ്ങൾ വരുന്നു

വടക്കേ മലബാറിലെ ഏറ്റവും വലിയ സ്റ്റേഡിയം തളിപ്പറമ്പിൽ ആരംഭിക്കാൻ പോവുകയാണ്. ഇതുകൂടാതെ 50,000 പേർക്ക് ഇരിക്കാൻ ഉതകുന്നതും ത്രീ സ്റ്റാർ ഹോട്ടൽ സൗകര്യമുടക്കമുള്ളതുമായ പുതിയൊരു സ്റ്റേഡിയം കൂടി കണ്ണൂരിൽ നിർമ്മിക്കും. കായിക മേഖലയുടെ വളർച്ചക്ക് ആവശ്യമായ സ്ഥലം കണ്ണൂരിലുണ്ടെന്നും ഇവ പരമാവധി പ്രയോജനപ്പെടുത്തുമെന്നും മന്ത്രി പറഞ്ഞു.

10 വർഷം, 5000 കോടി

കഴിഞ്ഞ പത്തുവർഷം കൊണ്ട് 5000 കോടി രൂപയുടെ വിവിധ പദ്ധതികളാണ് സർക്കാർ സംസ്ഥാനത്ത് കായിക മേഖലയിൽ നടപ്പാക്കിയത്. കായിക മേഖലയിൽ രാജ്യത്ത് ഏറ്റവും അധികം പണം ചെലവഴിച്ചത് കേരളമാണ്. പത്ത് വർഷം മുമ്പ് രണ്ട് സിന്തറ്റിക് ട്രാക്കുകൾ മാത്രമുണ്ടായിരുന്ന സംസ്ഥാനത്ത് ഇപ്പോൾ അത് 25 ആയി വർധിച്ചു.

പഞ്ചായത്ത് തലത്തിൽ പരിശീലകർ

തദ്ദേശസ്ഥാപനതല സ്പോർട്സ് കൗൺസിലുകൾ വഴി പഞ്ചായത്ത് കളിക്കളങ്ങൾ പ്രാവർത്തികമാക്കാനാണ് സർക്കാർ ഉദ്ദേശിക്കുന്നത്. സ്കൂൾതല പരിശീലനത്തിനൊപ്പം പഞ്ചായത്ത് തലത്തിലും പരിശീലനം നൽകും. 

ഇതിനായി ഓരോ തദ്ദേശ സ്വയംഭരണ സ്ഥാപനങ്ങളിലേക്കും അഞ്ച് പരിശീലകരെ വീതം നിയമിക്കും. ഇത് കൂടുതൽ കായിക പരിശീലകർക്ക് തൊഴിലവസരം സൃഷ്ടിക്കും.

രാജ്യത്ത് ആദ്യം: സ്പോർട്സ് ആസൂത്രണ വിഭാഗം

രാജ്യത്ത് ആദ്യമായി സ്പോർട്സ് ആസൂത്രണ വിഭാഗം കേരളത്തിൽ ആരംഭിക്കാൻ പോകുകയാണ്. തദ്ദേശ സ്ഥാപനങ്ങളിലേക്കടക്കം ഏകോപനം ലഭിക്കുകയെന്ന ലക്ഷ്യത്തോടെയാണ് ഇത് തുടങ്ങുന്നത്. ഇതിലൂടെ കായികതാരങ്ങളുടെ ഡാറ്റ ബാങ്കുകൾ തയ്യാറാക്കും. 

ഇതുവരെ 916 കായികതാരങ്ങൾക്ക് ജോലി നൽകാനായെന്നും ഓരോ വർഷവും ചുരുങ്ങിയത് 50 പേർക്കെങ്കിലും ജോലി നൽകാനാണ് ലക്ഷ്യമിടുന്നതെന്നും മന്ത്രി വ്യക്തമാക്കി.

ചടങ്ങ്

കിംസ് ഡയരക്ടറും കേരള ക്ലസ്റ്റർ സി.ഇ.ഒയുമായ ഫർഹാൻ യാസീൻ അധ്യക്ഷത വഹിച്ചു. ഡോ. മുനിസ് മുഹമ്മദ് പദ്ധതി വിശദീകരിച്ചു. കായിക വേദികളിലെ നിറസാന്നിധ്യമായ അബ്ദുറഹ്‌മാൻ ചങ്ങനാശ്ശേരിയെയും, കായിക താരങ്ങളായ ഹരിത മനോഹരൻ, ഫമാസ് ഷാനവാസ്, വി. മിഥുൻ, നിവേദ്യ, ഹൃത്വിക എന്നിവരെയും മന്ത്രി ആദരിച്ചു. യൂണിറ്റ് മേധാവി ഡോ. സുബിൻ ജോസഫ്, ഡോ. സാജൻ മോഹൻരാജ്, ഡോ. ഹിതേഷ് രാമകൃഷ്ണൻ തുടങ്ങിയവർ സംസാരിച്ചു.

ഈ വാർത്ത വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്

Article Summary: Sports Minister V. Abdurahiman announced plans to make Kannur a sports hub, including a massive stadium in Taliparamba and a 50,000-seater stadium in Kannur. He also inaugurated a sports injury clinic at KIMS Sreechand Hospital.

#Kannur #SportsHub #VAbdurahiman #Stadium #Taliparamba #KeralaSports #Development #Infrastructure