വ്യോമപാത അടച്ചു; ഷാർജ, ദുബൈ യാത്ര മുടങ്ങി

കണ്ണൂർ: (KVARTHA) പശ്ചിമേഷ്യയിലെ സംഘർഷത്തെത്തുടർന്നുണ്ടായ വ്യോമപാത അടച്ചിടൽ കാരണം കണ്ണൂർ അന്താരാഷ്ട്ര വിമാനത്താവളത്തിൽ നിന്ന് ദുബായിലേക്കും ഷാർജയിലേക്കുമുള്ള ചില വിമാന സർവീസുകൾ റദ്ദാക്കിയതായി എയർപോർട്ട് അധികൃതർ അറിയിച്ചു. ഇസ്രയേൽ-ഇറാൻ യുദ്ധത്തിന്റെ പശ്ചാത്തലത്തിൽ വിവിധ രാജ്യങ്ങൾ താൽക്കാലികമായി വ്യോമപാത അടച്ചതാണ് ഈ പ്രതിസന്ധിക്ക് കാരണം.

ചൊവാഴ്ച കണ്ണൂരിൽ നിന്ന് ദുബായിലേക്കും ഷാർജയിലേക്കുമുള്ള രണ്ട് വിമാന സർവീസുകളാണ് റദ്ദാക്കിയിരിക്കുന്നത്. യാത്രക്കാർ വിമാനത്താവളത്തിലേക്ക് പുറപ്പെടുന്നതിന് മുമ്പ് അതത് വിമാന കമ്പനികളുമായി ബന്ധപ്പെട്ട് തങ്ങളുടെ സർവീസുകളുടെ നിലവിലെ സ്ഥിതി അന്വേഷിക്കണമെന്ന് വിമാനത്താവള അധികൃതർ സാമൂഹിക മാധ്യമങ്ങളിലൂടെ അറിയിച്ചിട്ടുണ്ട്.

നിലവിൽ ഇന്ത്യൻ വിമാനങ്ങൾക്ക് പാകിസ്ഥാൻ വ്യോമപാതയിൽ വിലക്കുള്ളതിനാൽ പല വിമാനങ്ങളും ഒമാൻ വ്യോമപാതയാണ് ഉപയോഗിക്കുന്നത്. ഈ വ്യോമപാതയിൽ തിരക്ക് വർധിച്ചതാണ് വിമാന സർവീസുകൾ വെട്ടിക്കുറയ്ക്കാൻ വിമാനക്കമ്പനികളെ നിർബന്ധിതരാക്കിയത്.

ഗൾഫിലെ വേനൽ അവധിക്കാലം കൂടിയായതിനാൽ നാട്ടിലേക്ക് വരാൻ കാത്തിരുന്ന നിരവധി പ്രവാസികളെ ഈ സാഹചര്യം പ്രതികൂലമായി ബാധിച്ചിട്ടുണ്ട്.

വിമാനയാത്രാ മുടങ്ങിയതിനെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക,

Summary (English): Airspace closures halt Kannur-Dubai/Sharjah flights due to Mideast conflict.

#KannurAirport, #FlightCancellations, #MiddleEastConflict, #TravelDisruption, #AirspaceClosure, #KeralaNews