കാലാങ്കിയിൽ ഇനി യാത്രാക്ഷീണം അകറ്റാം! അത്യാധുനിക വിശ്രമകേന്ദ്രം നാടിന് സമർപ്പിച്ചു

കണ്ണൂർ: (KVARTHA) ഉളിക്കൽ ഗ്രാമപഞ്ചായത്തിലെ പ്രകൃതിരമണീയമായ കാലാങ്കി ടൂറിസം മേഖലയിൽ സഞ്ചാരികൾക്കായി അത്യാധുനിക സൗകര്യങ്ങളോടുകൂടിയ വഴിയോര വിശ്രമകേന്ദ്രം നാടിന് സമർപ്പിച്ചു. അഡ്വ. സജീവ് ജോസഫ് എം.എൽ.എ വിശ്രമകേന്ദ്രം ഉദ്ഘാടനം ചെയ്തു.

ഗ്രാമപഞ്ചായത്തിന്റെ വാർഷിക പദ്ധതിയിൽ ഉൾപ്പെടുത്തി 29 ലക്ഷം രൂപ ചെലവഴിച്ചാണ് ഈ പ്രീമിയം നിലവാരത്തിലുള്ള വിശ്രമകേന്ദ്രം ഒരുക്കിയത്. കർണാടക വനത്തോട് ചേർന്നുകിടക്കുന്ന കാലാങ്കിയിലെത്തുന്ന വിനോദസഞ്ചാരികളുടെ അടിസ്ഥാന ആവശ്യങ്ങൾ നിറവേറ്റുക എന്ന ലക്ഷ്യത്തോടെയാണ് ഈ പദ്ധതി നടപ്പിലാക്കിയത്.

സ്ത്രീകൾക്കും പുരുഷന്മാർക്കും ഭിന്നശേഷിക്കാർക്കും പ്രത്യേക ടോയ്‌ലറ്റ് സൗകര്യങ്ങൾ, വിശ്രമമുറി, ഫീഡിങ് ഏരിയ, കഫറ്റീരിയ, ചാരുബെഞ്ചുകൾ, ഊഞ്ഞാൽ തുടങ്ങിയ നിരവധി സൗകര്യങ്ങൾ ഇവിടെ ലഭ്യമാണ്.

ഉളിക്കൽ ഗ്രാമപഞ്ചായത്ത് പ്രസിഡന്റ് പി.സി. ഷാജി അധ്യക്ഷനായ ചടങ്ങിൽ നവകേരളം കർമപദ്ധതി ജില്ലാ കോ-ഓർഡിനേറ്റർ ഇ.കെ. സോമശേഖരൻ മുഖ്യാതിഥിയായിരുന്നു. അസിസ്റ്റന്റ് എഞ്ചിനീയർ നീതു ഗംഗാധരൻ റിപ്പോർട്ട് അവതരിപ്പിച്ചു. 

ഗ്രാമപഞ്ചായത്ത് വൈസ് പ്രസിഡന്റ് സമീറ പള്ളിപാത്ത്, സ്റ്റാൻഡിംഗ് കമ്മിറ്റി ചെയർപേഴ്സൺമാരായ ഒ.വി. ഷാജു, അഷ്റഫ് പാലശ്ശേരി, ഇന്ദിര പുരുഷോത്തമൻ, വാർഡ് അംഗം ജോളി ഫിലിപ്പോസ്, സെക്രട്ടറി ഇൻചാർജ് എസ്.പി. മനോജൻ എന്നിവർ ആശംസകൾ അർപ്പിച്ചു സംസാരിച്ചു.

കണ്ണൂർ കാലാങ്കിയിൽ തുറന്ന പുതിയ വിശ്രമകേന്ദ്രത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക!

Article Summary: A modern roadside rest stop with advanced facilities has been inaugurated at Kalanki tourism area in Ulikkal Grama Panchayat, Kannur, built at a cost of 29 lakhs.

#Kalanki, #KannurTourism, #RestStop, #KeralaTourism, #Ulikkal, #TravelKerala