കാടുനീങ്ങി വികസനമെത്തുന്നു: അധ്യാപികയുടെ കത്ത് അഞ്ചരക്കണ്ടിക്ക് വഴിതുറന്നത് രാജ്യത്തെ ആദ്യ ഫയർ ആൻഡ് സേഫ്റ്റി റിസർച്ച് സെന്ററിലേക്ക്

കണ്ണൂർ: (KVARTHA) വർഷങ്ങളായി കാടുപിടിച്ചും ഉപേക്ഷിക്കപ്പെട്ട വാഹനങ്ങളുടെ താവളമായും കിടന്ന അഞ്ചരക്കണ്ടി പഞ്ചായത്തിലെ ബംഗ്ലാവ് മെട്ടയിലെ പോലീസ് ഭൂമി ഇനി വികസനത്തിന്റെ പുതിയ മുഖമാകുന്നു. സംസ്ഥാന സർക്കാരിന്റെ നേതൃത്വത്തിൽ രാജ്യത്തെ ആദ്യ ഫയർ ആൻഡ് സേഫ്റ്റി സയൻസ് പോസ്റ്റ് ഗ്രാജുവേറ്റ് ആൻഡ് റിസർച്ച് സെന്റർ നിലവിൽ വരുന്നതോടെയാണിത് സാധ്യമാകുന്നത്. 

കുറുവ യു പി സ്കൂൾ അധ്യാപികയായ പി സി സുജാത ടീച്ചറുടെ നിരന്തരമായ ഇടപെടലുകളും മുഖ്യമന്ത്രിയുമായുള്ള കത്ത് വഴിയുള്ള ആശയവിനിമയവുമാണ് ജനവാസ മേഖലയ്ക്ക് ഭീഷണിയായിരുന്ന ഈ അഞ്ചേക്കറോളം വരുന്ന സ്ഥലത്തിന്റെ മുഖച്ഛായ മാറ്റാൻ വഴിയൊരുക്കിയത്.

പച്ചക്കറി കൃഷിയും പശു വളർത്തലുമായി സജീവമായിരുന്ന ഈ സ്ഥലം പിന്നീട് പോലീസ് ഏറ്റെടുക്കുകയും കാലങ്ങളോളം സംരക്ഷണമില്ലാതെ ഉപേക്ഷിക്കപ്പെടുകയും ചെയ്തു. കേസുകളിൽ ഉൾപ്പെടെ പിടികൂടിയ നൂറുകണക്കിന് വാഹനങ്ങൾ കൊണ്ടിട്ടതോടെ ഇവിടം കാലക്രമേണ കാടുവളർന്ന് തെരുവ് നായ്ക്കളുടെയും കാട്ടുപന്നി ഉൾപ്പെടെയുള്ള മൃഗങ്ങളുടെയും ഇഴജന്തുക്കളുടെയും താവളമായി മാറി. ഈ ഭൂമിക്ക് തൊട്ടടുത്ത് താമസിക്കുന്ന സുജാത ടീച്ചർക്കും കുടുംബത്തിനും ഇത് ഏറെ ബുദ്ധിമുട്ടുകളുണ്ടാക്കിയിരുന്നു.

പഞ്ചായത്തിലും പ്രാദേശിക പോലീസ് സ്റ്റേഷനിലും പരാതി നൽകിയെങ്കിലും നടപടിയുണ്ടാകാത്തതിനെ തുടർന്ന് സിറ്റി പോലീസ് കമ്മീഷണറെ നേരിൽ കണ്ട് തങ്ങളുടെ സുരക്ഷിതത്വത്തെക്കുറിച്ച് ആശങ്ക പ്രകടിപ്പിച്ചതോടെയാണ് ആദ്യഘട്ട ശുചീകരണ പ്രവർത്തനങ്ങൾക്ക് തുടക്കമായത്. പ്രദേശത്തിന്റെ അവസ്ഥ വിവരിക്കുന്ന ചിത്രങ്ങളും ദൃശ്യങ്ങളും സഹിതം സുജാത ടീച്ചർ പ്രശ്നം മുഖ്യമന്ത്രിയുടെ ശ്രദ്ധയിൽപ്പെടുത്തി.

തുടർന്ന് ഈ ഭൂമിയിലെ വാഹനങ്ങൾ ലേലം ചെയ്യാനും സ്ഥലം വികസന പ്രവർത്തനങ്ങൾക്കായി വിട്ടുനൽകാനുമുള്ള നടപടികൾ വേഗത്തിലായി. ഇത്തരം ഒരു സ്ഥാപനം ബംഗ്ലാവ് മെട്ടയിൽ ആരംഭിക്കുന്നതിലേക്ക് നയിച്ച കത്തിനെക്കുറിച്ച് മുഖ്യമന്ത്രി പൊതുവേദിയിൽ പരാമർശിച്ചപ്പോൾ അത് തന്റെ സ്വപ്നസാക്ഷാത്കാരമായെന്ന് ഈ അധ്യാപിക സന്തോഷത്തോടെ പങ്കുവെക്കുന്നു. കാടുപിടിച്ചു കിടന്ന അഞ്ചേക്കർ ഭൂമി നാടിന് ഉപകാരപ്പെടുന്ന വലിയൊരു പദ്ധതിയായി മാറുന്നതിന്റെ ആവേശത്തിലാണ് ഇപ്പോൾ നാട്ടുകാരും.

ധർമ്മടം നിയോജക മണ്ഡലത്തിലെ അഞ്ചരക്കണ്ടി ബംഗ്ലാവ് മെട്ടയിൽ നാലര ഏക്കർ ഭൂമിയിലാണ് ഫയർ ആൻഡ് സേഫ്റ്റി സയൻസ് പോസ്റ്റ് ഗ്രാജുവേറ്റ് ആൻഡ് റിസർച്ച് സെന്റർ നിർമ്മിക്കുക. കെട്ടിടത്തിന്റെ ഒന്നാം ഘട്ടത്തിന് 20 കോടി രൂപയുടെ ഭരണാനുമതി ലഭിച്ചു. അക്കാദമിക് ബ്ലോക്ക്, അഡ്മിനിസ്ട്രേറ്റീവ് ബ്ലോക്ക്, വിദ്യാർത്ഥികൾക്കായുള്ള ഹോസ്റ്റലുകൾ, റെസിഡൻഷ്യൽ ക്വാർട്ടേഴ്സുകൾ എന്നിവ ഉൾപ്പെടുന്നതാണ് റിസർച്ച് സെന്റർ.

കെട്ടിടത്തിന്റെ താഴത്തെ നിലയിൽ ഫാക്കൽറ്റി റൂം, സന്ദർശകർക്കുള്ള മുറി, സ്വീകരണമുറി, ലോബി, ഉപകരണങ്ങളുടെ പ്രദർശന ഹാൾ, നടുമുറ്റം, പാൻട്രി, ഇലക്ട്രിക്കൽ റൂം, ലിഫ്റ്റുകൾ, ശുചിമുറികൾ, പാർക്കിംഗ് സൗകര്യം എന്നിവയുണ്ടാകും. 

1265 ചതുരശ്ര മീറ്റർ വിസ്തീർണ്ണമുള്ള ഒന്നാം നിലയിൽ ജനറൽ ലാബുകൾ, നൈപുണ്യ വികസന കേന്ദ്രം, തുടർ വിദ്യാഭ്യാസ സൗകര്യത്തിനുള്ള മുറി, സ്മാർട്ട് ക്ലാസ് റൂമുകൾ എന്നിവ ഉൾപ്പെടുന്നു. രണ്ടാം നിലയിൽ പരീക്ഷാ ഹാൾ, ലാബുകൾ, സ്മാർട്ട് ക്ലാസ് റൂമുകൾ എന്നിവയുമുണ്ടാകും.

പദ്ധതിയുടെ ഒന്നാം ഘട്ടത്തിൽ 6447 ചതുരശ്ര മീറ്ററിൽ അഞ്ച് നിലകളിലായാണ് അക്കാദമിക് ബ്ലോക്ക് നിർമ്മിക്കുന്നത്. ആദ്യ മൂന്ന് നിലകളുടെ ഫിനിഷിംഗ് പ്രവൃത്തികളും നാലാം നിലയുടെ സ്ട്രക്‌ചറൽ പ്രവൃത്തികളും ഒന്നാം ഘട്ടത്തിൽ പൂർത്തിയാക്കും. ഇതോടൊപ്പം മതിലുകൾ, മഴവെള്ള സംഭരണി എന്നിവയുടെ നിർമ്മാണവും പൂർത്തിയാക്കും.

അഞ്ചരക്കണ്ടിയിലെ ഈ വമ്പൻ വികസന വാർത്ത സുഹൃത്തുക്കളിലേക്ക് എത്തിക്കൂ. 

Article Summary: A teacher's initiative leads to the establishment of India's first Fire and Safety Research Centre in Kannur.

#KannurNews #Anjarakandy #FireAndSafety #KeralaDevelopment #EducationNews #SuccessStory