പേരട്ടയിൽ ജനവാസകേന്ദ്രത്തിൽ കൂറ്റൻ രാജവെമ്പാല; സാഹസികമായി പിടികൂടി വനംവകുപ്പ്

ഇരിട്ടി: (KVARTHA) കൂട്ടുപുഴയ്ക്കടുത്തെ പേരട്ടയിൽ വീട്ടുവളപ്പിൽ പ്രത്യക്ഷപ്പെട്ട കൂറ്റൻ രാജവെമ്പാലയെ വനംവകുപ്പ് പിടികൂടി. ഇരിട്ടി സെക്ഷൻ ഫോറസ്റ്റർ സുനിലിന്റെ നിർദ്ദേശപ്രകാരം വനംവകുപ്പിലെ താത്കാലിക വാച്ചറും മാർക്ക് പ്രവർത്തകനുമായ ഫൈസൽ വിളക്കോട്, ശശിധരൻ വെളിയമ്പ്ര എന്നിവർ ചേർന്നാണ് പാമ്പിനെ പിടികൂടിയത്.

സാഹസികമായി പിടികൂടി

വീട്ടുപറമ്പിൽ തമ്പടിച്ച രാജവെമ്പാല ഫോറസ്റ്റ് റെസ്ക്യൂവർമാരെ കണ്ടതോടെ പിടികൊടുക്കാതെ ഇഴഞ്ഞുനീങ്ങി. ഒടുവിൽ പറമ്പിലെ തോട്ടിലെ മാളത്തിൽ കയറിക്കൂടി. 

ഇവിടെനിന്ന് കുത്തി പുറത്താക്കിയ ശേഷം ഫൈസൽ വിളക്കോട് വാൽ പിടിച്ചു വലിക്കുകയും ശശീന്ദ്രൻ ബാഗിനുള്ളിലേക്ക് കയറ്റുകയുമായിരുന്നു. പിടികൂടിയ രാജവെമ്പാലയെ പിന്നീട് കർണാടക ഉൾവനത്തിൽ തുറന്നുവിട്ടു.

നൂറ്റിമൂന്നാമത്തെ രാജവെമ്പാല

ഫൈസൽ വിളക്കോട് പിടികൂടുന്ന 103-ാമത്തെ രാജവെമ്പാലയാണിത്. കർണാടക വനമേഖലയോട് ചേർന്നുനിൽക്കുന്ന പ്രദേശമാണിത്. വനത്തിലെ അത്യുഷ്ണം കാരണമാണ് രാജവെമ്പാലകൾ ജനവാസകേന്ദ്രങ്ങളിലേക്ക് ഇറങ്ങുന്നതെന്ന് വനംവകുപ്പ് ഉദ്യോഗസ്ഥർ പറഞ്ഞു. വനമേഖലയോട് ചേർന്ന് താമസിക്കുന്നവർ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: A massive King Cobra was rescued from a residential area in Peratta, Iritty, marking the 103rd such rescue by Faisal Vilakkode.

#IrittyNews #KingCobra #SnakeRescue #ForestDepartment #FaisalVilakkode #Wildlife #Nature #KVARTHA