കേരള സയൻസ് പാർക്ക് - ഐടി പാർക്ക് ശിലാസ്ഥാപനം മുഖ്യമന്ത്രി നിർവ്വഹിച്ചു; വിജ്ഞാന വ്യവസായത്തിന് ഏറ്റവും അനുയോജ്യമായ ഇടം കേരളമെന്ന് പിണറായി വിജയൻ

അഞ്ചരക്കണ്ടി: (KVARTHA) രാജ്യത്ത് വിജ്ഞാന വ്യവസായങ്ങൾ സൃഷ്ടിക്കാൻ ഏറ്റവും അനുയോജ്യമായ ഇടം കേരളമാണെന്ന് മുഖ്യമന്ത്രി പിണറായി വിജയൻ പറഞ്ഞു. കേരള സയൻസ് പാർക്ക് - ഐടി പാർക്കിന് അഞ്ചരക്കണ്ടി ചെറിയവളപ്പിൽ തറക്കല്ലിട്ട് സംസാരിക്കുകയായിരുന്നു മുഖ്യമന്ത്രി. 

നമ്മുടെ നാട്ടിലെ ഉയർന്ന യോഗ്യതയുള്ള മാനവ വിഭവശേഷിയും വിജ്ഞാന സമ്പദ്‌വ്യവസ്ഥയ്ക്ക് നാട് നൽകുന്ന പിന്തുണയും ഉയർന്ന നിലവാരമുള്ള ഗവേഷണ-വികസന സ്ഥാപനങ്ങൾ യാഥാർത്ഥ്യമാക്കാൻ സംസ്ഥാന സർക്കാർ നടത്തുന്ന ശ്രമങ്ങളും കണക്കിലെടുക്കുമ്പോൾ രാജ്യത്ത് വിജ്ഞാന വ്യവസായങ്ങൾ സൃഷ്ടിക്കാൻ ഏറ്റവും അനുയോജ്യമായ ഇടമായി സംസ്ഥാനം മാറി. 

ഇത് മനസ്സിലാക്കിയാണ് രാജ്യത്തെ ശാസ്ത്ര-സാങ്കേതിക മേഖലയിലെ മുന്നേറ്റം തുറന്നുതരുന്ന അവസരങ്ങൾ ഫലപ്രദമായി വിനിയോഗിക്കാൻ കഴിയുന്ന സയൻസ് പാർക്കുകളും ഡിജിറ്റൽ സയൻസ് പാർക്കും ഇവിടെ സ്ഥാപിക്കുന്നതെന്ന് മുഖ്യമന്ത്രി പറഞ്ഞു.

ലക്ഷക്കണക്കിന് തൊഴിലവസരങ്ങൾ

600 കോടി രൂപ ചെലവിൽ 50 ഏക്കറിലാണ് ജില്ലയിൽ ഈ അത്യാധുനിക സജ്ജീകരണങ്ങളും ഗവേഷണ കേന്ദ്രങ്ങളും ഒരുങ്ങുന്നത്. കേരള ശാസ്ത്ര സാങ്കേതിക പരിസ്ഥിതി കൗൺസിലിന്റെ മേൽനോട്ടത്തിൽ കണ്ണൂർ സർവകലാശാലയും കോഴിക്കോട്, കാസർകോട് മേഖലകളിലെ ഉന്നത വിദ്യാഭ്യാസ ഗവേഷണ സ്ഥാപനങ്ങളും ചേർന്നാണ് ഇവിടുത്തെ ഗവേഷണ പ്രവർത്തനങ്ങൾക്ക് ആവശ്യമായ മാർഗ്ഗനിർദ്ദേശങ്ങൾ നൽകുന്നത്. 

ഇവിടെ ജീവശാസ്ത്ര ഗവേഷണ മേഖലയിൽ ഇന്റേൺഷിപ്പിനും പ്രോജക്റ്റുകൾക്കും നൈപുണ്യവികസനത്തിനും നമ്മുടെ വിദ്യാർത്ഥികൾക്ക് അവസരം ലഭിക്കും. ഈ അക്കാദമിക്-ഇൻഡസ്ട്രിയൽ സഹകരണത്തിലൂടെ നമ്മുടെ ഉന്നത വിദ്യാഭ്യാസ മേഖലയിൽ വലിയ മാറ്റമുണ്ടാക്കാൻ കഴിയുമെന്നാണ് പ്രതീക്ഷിക്കുന്നത്. അതിലൂടെ വരുംകാലത്ത് ലക്ഷക്കണക്കിന് തൊഴിലവസരങ്ങളാണ് നേരിട്ടും പരോക്ഷമായും സൃഷ്ടിക്കപ്പെടാൻ പോകുന്നതെന്നും മുഖ്യമന്ത്രി പറഞ്ഞു.

ആഗോള ഗവേഷണ കേന്ദ്രം

ബയോ-പ്രോസസിംഗ്, ബയോ-പ്രോസ്പെക്റ്റിംഗ് മേഖലകളിൽ ലോകത്തിലെ ഏറ്റവും മികച്ച ശാസ്ത്രജ്ഞരും കമ്പനികളും എത്തിച്ചേരുന്ന ഇടമായി ഈ പാർക്ക് മാറും. നമ്മുടെ പശ്ചിമഘട്ടം ജൈവവൈവിധ്യത്താൽ സമ്പന്നമാണ്. ഈ ജൈവസമ്പത്തിനെ ശാസ്ത്രീയമായും സന്തുലിതമായും ഉപയോഗപ്പെടുത്തിക്കൊണ്ട് പുതിയ ഔഷധക്കൂട്ടുകളും ജീവശാസ്ത്ര ഉൽപ്പന്നങ്ങളും ഇവിടെ നിർമ്മിക്കപ്പെടും. 

ഇതിലൂടെ ആഗോള ജീവശാസ്ത്ര ഗവേഷണ മേഖലയിലെ മുൻനിര കമ്പനികളെ കേരളത്തിലേക്ക് കൊണ്ടുവരാനാണ് നാം ലക്ഷ്യമിടുന്നത്. മുൻനിര ഗവേഷണ ലബോറട്ടറികൾ നമ്മുടെ സംസ്ഥാനത്ത് സ്ഥാപിക്കപ്പെടുന്നതോടെ, അവരുടെ മേൽനോട്ടത്തിലും നേതൃത്വത്തിലും നിരവധി അനുബന്ധ കമ്പനികൾ സംസ്ഥാനത്തെമ്പാടും വളർന്നുവരും. നമ്മുടെ ജൈവ ഉൽപ്പന്നങ്ങളുടെ ഗുണമേന്മ വർദ്ധിപ്പിക്കുന്നതിനും അതിലൂടെ നമ്മുടെ സമ്പദ്‌വ്യവസ്ഥയെ പരിപോഷിപ്പിക്കുന്നതിനും ഉതകുന്നതാകും ആ മുന്നേറ്റം.

വിജ്ഞാന സമ്പദ്‌വ്യവസ്ഥയുടെ നെടുംതൂൺ

ലോകമെമ്പാടും വിജ്ഞാനാധിഷ്ഠിത വ്യവസായങ്ങളുടെ വികസനത്തിൽ വലിയ കുതിച്ചുചാട്ടം ഉണ്ടായിക്കൊണ്ടിരിക്കുന്ന കാലമാണിത്. ശാസ്ത്ര-സാങ്കേതിക രംഗത്തെ പുരോഗതിയാണ് പുതിയ സമ്പദ്‌വ്യവസ്ഥയെ നയിക്കുന്നത്. ശാസ്ത്രത്തെയും സാങ്കേതികവിദ്യയെയും മനുഷ്യ പുരോഗതിക്കും സാമൂഹ്യ പരിവർത്തനത്തിനുമായി പ്രയോജനപ്പെടുത്തുന്നതിന് പ്രതിജ്ഞാബദ്ധമാണ്. 

അതുകൊണ്ടുതന്നെ ശാസ്ത്ര-സാങ്കേതിക രംഗത്തെ പുരോഗതികളെ പ്രയോജനപ്പെടുത്തുന്ന വിധത്തിൽ വിജ്ഞാന വ്യവസായങ്ങളുടെ വികസനം സുഗമമാക്കുന്നതിന് വേണ്ട മുൻകൈ എടുക്കാനുള്ള ഉത്തരവാദിത്തമാണ് സംസ്ഥാനം ഏറ്റെടുത്തിരിക്കുന്നത്. ആ ഉത്തരവാദിത്തത്തെ ഗൗരവമായി കണ്ടുകൊണ്ടാണ് നാല് സയൻസ് പാർക്കുകളും ഡിജിറ്റൽ സയൻസ് പാർക്കും സ്ഥാപിക്കുമെന്ന് ഈ സർക്കാർ നേരത്തെ പ്രഖ്യാപിച്ചത്. 

ഇവയിലൂടെ കമ്പനികൾക്കും സർവ്വകലാശാലകൾക്കും അറിവുകളെയും സാങ്കേതിക വിദ്യകളെയും പരസ്പരം പങ്കുവെക്കാൻ കഴിയും. ഗവേഷണത്തിലൂടെ അവയെ നവീകരിക്കാനും സമൂഹത്തിനാകെ പ്രയോജനപ്പെടുന്ന ഉൽപ്പന്നങ്ങളും സേവനങ്ങളുമാക്കി മാറ്റാനും കഴിയും. 

ആ നിലയ്ക്ക് ശാസ്ത്രത്തിനും സാങ്കേതിക വിദ്യയ്ക്കുമുള്ള സാമൂഹിക ഉത്തരവാദിത്തം നിറവേറ്റാൻ അവയെ പ്രാപ്തമാക്കുന്ന ഇടങ്ങളാണ് ഈ പാർക്കുകൾ. വ്യവസായങ്ങൾ, സ്റ്റാർട്ടപ്പുകൾ, ഗവേഷണ സ്ഥാപനങ്ങൾ, സർവ്വകലാശാലകൾ എന്നിവ തമ്മിൽ അതിവിപുലമായ സഹകരണത്തിനുള്ള അവസരം ഒരുക്കിക്കൊണ്ട് വരും വർഷങ്ങളിൽ ഈ പാർക്കുകൾ കേരളമെന്ന വിജ്ഞാന സമ്പദ്‌വ്യവസ്ഥയുടെ നെടുംതൂണായി സംസ്ഥാനത്തെ മാറ്റുമെന്നാണ് നമ്മൾ പ്രതീക്ഷിക്കുന്നതെന്നും മുഖ്യമന്ത്രി പറഞ്ഞു.

രാജ്യത്തിന് മാതൃകയായ ഐടി മേഖല

രാജ്യത്തെ ഐടി മേഖല അതിന്റെ വളർച്ചയുടെ പ്രാരംഭത്തിലായിരുന്ന ഘട്ടത്തിൽ തന്നെ ഇന്ത്യയിലെ ആദ്യത്തെ ടെക്നോപാർക്ക് സ്ഥാപിച്ച സംസ്ഥാനമാണ് കേരളം. അന്നും നമ്മൾ രാജ്യത്തിനാകെ മാതൃകയായിരുന്നു. തുടർന്നുള്ള മൂന്ന് ദശാബ്ദക്കാലം ടെക്നോപാർക്കും സംസ്ഥാനത്തെ മറ്റ് ഐടി പാർക്കുകളും രാജ്യത്തെ ഇൻഫർമേഷൻ ടെക്നോളജി വ്യവസായങ്ങളുടെ വളർച്ചയിൽ വലിയ പങ്കു വഹിച്ചിട്ടുണ്ട്. 

രാജ്യത്തെ ആദ്യത്തെ ഡിജിറ്റൽ യൂണിവേഴ്സിറ്റിക്ക് തുടക്കം കുറിച്ചും ഐടി മേഖലയുമായി ബന്ധപ്പെട്ട പ്രവർത്തനങ്ങളിൽ കേരളം രാജ്യത്തിനാകെ മാതൃകയായിരുന്നു. അതിന്റെയെല്ലാം തുടർച്ചയായാണ് ഇവിടെയും ഒരു ഐടി പാർക്ക് ഒരുങ്ങുന്നത്. കേരളത്തിന് പൊതുവിലും കണ്ണൂർ ജില്ലയ്ക്ക് വിശേഷിച്ചും നൂതന സാങ്കേതിക രംഗത്ത് കൂടുതൽ ഉയരങ്ങളിലേക്ക് കുതിക്കാൻ ഉതകുന്നതാവും ഇവിടെ ഒരുങ്ങുന്ന ഐടി പാർക്ക്.

ഗവേഷണങ്ങളിലെ ഇടപെടലുകൾ

ഇത്തരത്തിലുള്ള പാർക്കുകൾ സ്ഥാപിച്ചുകൊണ്ട് മാത്രമല്ല നമ്മൾ കേരളത്തെ വിജ്ഞാന സമ്പദ്ഘടനയായും നൂതനത്വ സമൂഹമായും പരിവർത്തിപ്പിക്കുന്നത്. ഗവേഷണങ്ങളുടെ വിവർത്തനത്തിലൂടെയും വിവിധ മേഖലകളിൽ മികവിന്റെ കേന്ദ്രങ്ങൾ സ്ഥാപിക്കുന്നതിലൂടെയും ഉന്നത വിദ്യാഭ്യാസ മേഖലയുടെ സമൂലമായ നവീകരണത്തിലൂടെയും കൂടിയാണ്. 

2016-ൽ സർക്കാർ അധികാരത്തിൽ വരുമ്പോൾ 30 മികവിന്റെ കേന്ദ്രങ്ങൾ സ്ഥാപിക്കും എന്നാണ് പറഞ്ഞത്. ഇതിൽ പലതും യാഥാർത്ഥ്യമായി. ശാസ്ത്ര രംഗത്തെ വികാസത്തിന് ഏറ്റവും അനിവാര്യമായ ഒന്നാണ് ഗവേഷണങ്ങൾ പ്രോത്സാഹിപ്പിക്കപ്പെടുക എന്നത്. ഗവേഷണം പ്രോത്സാഹിപ്പിക്കുക മാത്രമല്ല, അവയെ നമ്മുടെ സമ്പദ്ഘടനയുമായി വിളക്കിച്ചേർക്കുന്നതിനുള്ള ഇടപെടലുകൾ നടത്തുക കൂടിയാണ്. 

കൈരളി റിസർച്ച് പുരസ്കാരങ്ങളും ചീഫ് മിനിസ്റ്റേഴ്സ് പോസ്റ്റ് ഡോക്ടറൽ ഫെലോഷിപ്പുകളും എല്ലാം അതിന്റെ ഭാഗമാണ്. അതിനൊക്കെയായി പതിനാലര കോടിയിലധികം രൂപയാണ് ഇതുവരെ ചെലവഴിച്ചിട്ടുള്ളത്. ഗവേഷണ ഫലങ്ങൾ സമൂഹത്തിന്റെ താഴേത്തട്ടിലേക്ക് എത്തിക്കുക എന്ന ലക്ഷ്യത്തോടെ സർവ്വകലാശാലകൾ കേന്ദ്രീകരിച്ച് 200 കോടി രൂപ മുതൽമുടക്കിൽ ട്രാൻസ്‌ലേഷണൽ റിസർച്ച് ലാബുകൾ സ്ഥാപിക്കുകയാണ്. 

യങ് ഇന്നവേറ്റേഴ്സ് പ്രോഗ്രാം, അക്സിലറേറ്റിങ് അഡോപ്ഷൻ ഓഫ് എമേർജിംഗ് ടെക്നോളജി സൊല്യൂഷൻസ് ഇൻ ഗവൺമെന്റ്, ഇന്നോവേഷൻ ബൈ യൂത്ത് വിത്ത് ഡിസ്സബിലിറ്റി എന്നീ പദ്ധതികൾ വഴി നൂതനാശയ പ്രവർത്തനങ്ങളെ പ്രോത്സാഹിപ്പിക്കുകയും പരിപോഷിപ്പിക്കുകയും ചെയ്തുവരുന്നതായും മുഖ്യമന്ത്രി പറഞ്ഞു.

പുതിയ ഹബ്ബുകൾ

തിരുവനന്തപുരത്തിനെ എഐ ഹബ്ബായി മാറ്റുന്നതിന് ഉന്നത വിദ്യാഭ്യാസ സ്ഥാപനങ്ങളുടെയും ടെക്നോപാർക്കിന്റെയും സ്റ്റാർട്ടപ്പ് മിഷന്റെയും ഐസിടി അക്കാദമിയുടെയും നേതൃത്വത്തിൽ വിപുലമായ പരിപാടികളാണ് വിഭാവനം ചെയ്തുവരുന്നത്. നൂതന സാമഗ്രികളുടെ വികസനത്തിന്റെ കേന്ദ്രമായി കേരളത്തെ മാറ്റുക എന്ന കാഴ്ചപ്പാടോടെ ഡിജിറ്റൽ സർവ്വകലാശാല, സെന്റർ ഫോർ മെറ്റീരിയൽസ് ഇൻ ഇലക്ട്രോണിക് ടെക്നോളജീസുമായി സഹകരിച്ച് ഗ്രാഫീനിനായുള്ള ഇന്ത്യ ഇന്നൊവേഷൻ സെന്റർ കൊച്ചിയിൽ സ്ഥാപിച്ചിട്ടുണ്ട്. 

ബയോ 360 ലൈഫ് സയൻസ് പാർക്കിൽ 14 കമ്പനികൾ പ്രവർത്തിക്കുന്നു. 80,827 ചതുരശ്രയടി വിസ്തീർണ്ണമുള്ള അഡ്മിൻ ബ്ലോക്ക്, ബയോടെക് ലാബ്, ഓഫീസ്, ലബോറട്ടറി എന്നിവ പൂർത്തീകരിച്ച് പ്രവർത്തനസജ്ജമാക്കി. ശാസ്ത്ര സാങ്കേതികവിദ്യാ വികാസത്തെ പ്രോത്സാഹിപ്പിക്കുന്നതിൽ സംസ്ഥാന സർക്കാരിനുള്ള ആത്മാർത്ഥതയെയാണ് ഇതെല്ലാംതന്നെ കാണിക്കുന്നതെന്നും മുഖ്യമന്ത്രി പറഞ്ഞു.

ചടങ്ങിലെ സാന്നിധ്യം

നിയമസഭാ സ്പീക്കർ എ.എൻ. ഷംസീർ അധ്യക്ഷനായി. സയൻസ്-ഐടി പാർക്കുകൾ യാഥാർത്ഥ്യമാകുന്നതോടെ ഗവേഷണ രംഗത്തെ മലബാറിന്റെ മുഖച്ഛായ മാറുമെന്ന് സ്പീക്കർ പറഞ്ഞു. കണ്ണൂർ സർവ്വകലാശാല വൈസ് ചാൻസിലർ പ്രൊഫ. കെ.കെ. സാജു വിശിഷ്ടാതിഥിയായി. 

കേരള ശാസ്ത്ര സാങ്കേതിക പരിസ്ഥിതി കൗൺസിൽ എക്സിക്യൂട്ടീവ് വൈസ് പ്രസിഡന്റ് പ്രൊഫ. കെ.പി. സുധീർ സയൻസ് പാർക്ക് പദ്ധതിയുടെയും കെ.ഐ.ടി.എഫ്.ആർ.എ പ്രിൻസിപ്പൽ സെക്രട്ടറിയും മാനേജിംഗ് ഡയറക്ടറുമായ ഡോ. സന്തോഷ് ബാബു ഐടി പാർക്കിന്റെയും റിപ്പോർട്ട് അവതരിപ്പിച്ചു. 

കണ്ണൂർ ജില്ലാ പഞ്ചായത്ത് പ്രസിഡന്റ് അഡ്വ. ബിനോയ് കുര്യൻ, ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി ഡിപ്പാർട്ട്മെന്റ് സ്പെഷ്യൽ സെക്രട്ടറിയും കെ.എസ്.ഐ.ടി ചെയർമാനുമായ സീറാം സാംബശിവറാവു, തലശ്ശേരി ബ്ലോക്ക് പഞ്ചായത്ത് പ്രസിഡന്റ് പി.എം. പ്രഭാകരൻ, അഞ്ചരക്കണ്ടി ഗ്രാമപഞ്ചായത്ത് പ്രസിഡന്റ് പി.കെ. സീന, വേങ്ങാട് പഞ്ചായത്ത് പ്രസിഡന്റ് സി. ചന്ദ്രൻ, ജില്ലാ പഞ്ചായത്ത് അംഗം ഒ.സി. ബിന്ദു, ബ്ലോക്ക് പഞ്ചായത്ത് അംഗം ടി. ദീപു, ഗ്രാമപഞ്ചായത്ത് അംഗം എം.സി. ഷംസീറ, മുൻ എംപി കെ.കെ. രാഗേഷ് എന്നിവർ പങ്കെടുത്തു.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: CM Pinarayi Vijayan laid the foundation stone for the Kerala Science & IT Park at Anjarakandy, highlighting Kerala's potential as a global knowledge economy hub.

#PinarayiVijayan #KeralaSciencePark #ITPark #Anjarakandy #Kannur #KnowledgeEconomy #JobCreation #KeralaDevelopment #KVARTHA