കാർ പാർക്കിങ്ങിനെച്ചൊല്ലിയുള്ള തർക്കം: അഴീക്കലിൽ വയോധികനെ അതിക്രൂരമായി മർദിച്ച യുവാക്കൾക്കെതിരെ കേസ്

കണ്ണൂർ: (KVARTHA) കാർ പാർക്ക് ചെയ്തതിനെ ചൊല്ലിയുള്ള തർക്കത്തെ തുടർന്ന് അഴീക്കലിൽ വയോധികന് മർദനമേറ്റതായി പരാതി. അഴീക്കൽ മുണ്ടച്ചാലിൽ ബാലകൃഷ്ണനാണ് മർദനമേറ്റത്. ഇദ്ദേഹം നൽകിയ പരാതിയുടെ അടിസ്ഥാനത്തിൽ വളപട്ടണം പോലീസ് കണ്ടാലറിയാവുന്ന യുവാക്കൾക്കെതിരെ കേസെടുത്ത് അന്വേഷണം ആരംഭിച്ചു.

ഞായറാഴ്ച വൈകിട്ട് ആറ് മണിയോടെയാണ് സംഭവം നടന്നതെന്നാണ് പോലീസ് പറയുന്നത്. റോഡിൽ കാർ നിർത്തിയതുമായി ബന്ധപ്പെട്ടുണ്ടായ തർക്കമാണ് മർദനത്തിലേക്ക് നയിച്ചതെന്ന് പോലീസ് നൽകുന്ന വിവരം.

ബാലകൃഷ്ണൻ റോഡിൽ കാർ നിർത്തിയത് യുവാക്കൾ ചോദ്യം ചെയ്തതിനെ തുടർന്ന് തർക്കമുണ്ടായി. ഇതിനിടെ യുവാക്കളെ വയോധികൻ അസഭ്യം വിളിച്ചെന്ന് ആരോപിച്ചായിരുന്നു മർദനമെന്നും പരാതിയിൽ പറയുന്നു.

കാറിനകത്ത് ഇരിക്കുകയായിരുന്ന ബാലകൃഷ്ണനെ യുവാക്കൾ ആദ്യം മർദിച്ചു എന്നാണ് പരാതി. തുടർന്ന്, കാറിൽ നിന്നിറങ്ങി നടന്നു പോയപ്പോൾ യുവാക്കൾ പിന്നാലെ ചെന്ന് മർദനം തുടർന്നു. 'വീട്ടിൽ കയറി വെട്ടുമെന്നും' യുവാക്കൾ ഭീഷണിപ്പെടുത്തിയതായും പരാതിയിൽ ചൂണ്ടിക്കാട്ടുന്നു.

മർദനമേൽക്കാതിരിക്കാൻ ബാലകൃഷ്ണൻ റോഡരികിലെ ഒരു കടയിലേക്ക് ഓടിക്കയറിയെങ്കിലും യുവാക്കൾ കടയിലേക്ക് അതിക്രമിച്ച് കയറി മർദിച്ചു. തുടർന്ന്, നാട്ടുകാർ ഇടപെട്ടാണ് യുവാക്കളെ ഇവിടെ നിന്ന് മാറ്റിയത്.

ബാലകൃഷ്ണൻ തിങ്കളാഴ്ച രാത്രി നൽകിയ പരാതിയുടെ അടിസ്ഥാനത്തിലാണ് വളപട്ടണം പോലീസ് കേസെടുത്തത്. 'പ്രതികളെ ഉടൻ അറസ്റ്റ് ചെയ്യുമെന്ന്' വളപട്ടണം പോലീസ് അറിയിച്ചു.

ഈ വാർത്തയെക്കുറിച്ച് നിങ്ങൾക്കെന്ത് തോന്നുന്നു? നിങ്ങളുടെ അഭിപ്രായങ്ങൾ കമന്റ് ബോക്സിൽ രേഖപ്പെടുത്തുക. 

Article Summary: Elderly man, Balakrishnan, assaulted in Azheekkal, Kannur, following a car parking dispute. Police registered a case.

#Kannur #Assault #KeralaCrime #ParkingDispute #ValapattanamPolice #AttackOnElderly