സ്കൂൾ കെട്ടിടത്തിൽ നിന്ന് വീണ് ചികിത്സയിലായിരുന്ന വിദ്യർത്ഥിനി മരിച്ചു; നാല് പേർക്ക് പുതുജീവനേകി അയോണ

കണ്ണൂർ: (KVARTHA) സ്കൂൾ കെട്ടിടത്തിൽ നിന്ന് വീണ് ഗുരുതരമായി പരിക്കേറ്റ് ചികിത്സയിലായിരുന്ന പ്ലസ് ടു വിദ്യാർത്ഥിനി മരിച്ചു. പയ്യാവൂർ സേക്രട്ട് ഹാർട്ട് ഹയർ സെക്കൻഡറി സ്കൂളിലെ വിദ്യാർത്ഥിനി അയോണ മോൺസൺ (17) ആണ് മരിച്ചത്. മരണശേഷം അവയവദാനത്തിലൂടെ നാല് പേർക്ക് പുതുജീവനേകിയാണ് അയോണ യാത്രയായത്.

കഴിഞ്ഞ തിങ്കളാഴ്ച രാവിലെ എട്ട് മണിയോടെ സ്കൂളിൽ ലാബ് പരീക്ഷ നടക്കുന്ന ദിവസമായിരുന്നു അപകടം. സ്കൂൾ കെട്ടിടത്തിന് മുകളിൽ നിന്ന് വീണ് ഗുരുതരമായി പരിക്കേറ്റ അയോണയെ ഉടൻ തന്നെ കണ്ണൂർ ആസ്റ്റർ മിംസ് ആശുപത്രിയിൽ പ്രവേശിപ്പിച്ചു. അത്യാധുനിക ക്രിട്ടിക്കൽ കെയർ സംവിധാനത്തിന്റെ എല്ലാ സാധ്യതകളും ഉപയോഗപ്പെടുത്തി ചികിത്സ നൽകിയെങ്കിലും, ബുധനാഴ്ച രാത്രിയോടെ കുട്ടിക്ക് മസ്തിഷ്‌ക മരണം  സംഭവിക്കുകയായിരുന്നു.

തുടർന്ന് ആശുപത്രി അധികൃതർ അവയവദാനത്തിന്റെ സാധ്യതകളെക്കുറിച്ച് സംസാരിച്ചപ്പോൾ, തങ്ങളുടെ തീവ്രവേദനയിലും മകളുടെ അവയവങ്ങൾ ദാനം ചെയ്യാൻ കുടുംബം മുന്നോട്ട് വരികയായിരുന്നു. സർക്കാർ നിർദ്ദേശിച്ച മാനദണ്ഡങ്ങൾ പാലിച്ചുകൊണ്ടാണ് അവയവ വിതരണം നടത്തിയത്.

അയോണയുടെ ഒരു വൃക്ക കോഴിക്കോട് ആസ്റ്റർ മിംസ് ഹോസ്പിറ്റലിലെ രോഗിക്കും, മറ്റൊരു വൃക്ക തിരുവനന്തപുരം മെഡിക്കൽ കോളേജിലെ രോഗിക്കും നൽകി. കരൾ കോഴിക്കോട് മെയ്ത്ര ഹോസ്പിറ്റലിലെ രോഗിക്കാണ് നൽകിയത്. കോർണിയകൾ കോഴിക്കോട് മെഡിക്കൽ കോളേജിലെ ഐ ബാങ്കിലേക്കും ദാനം ചെയ്തു.

മനുഷ്യ സമൂഹത്തിന് നൽകാൻ സാധിക്കുന്ന ഏറ്റവും വലിയ ദാനവും സന്ദേശവുമാണ് അയോണയുടെ കുടുംബം നിർവഹിച്ചതെന്ന് ആസ്റ്റർ മിംസ് അധികൃതർ പറഞ്ഞു. കുടുംബത്തിന്റെ ദുഃഖത്തിൽ പങ്കുചേരുന്നതോടൊപ്പം ഈ മാതൃകാപരമായ പ്രവർത്തിയെ പ്രകീർത്തിക്കുന്നതായും ആശുപത്രി അധികൃതർ അറിയിച്ചു.

ഈ വാർത്ത പങ്കുവെക്കൂ.

Article Summary: Plus Two student Ayona Monson passes away; saves four lives through organ donation at Aster Mims Kannur.

#AyonaMonson #OrganDonation #Kannur #Payyavoor #KeralaNews #Inspiration #AsterMims