ഓർമ്മകളിലേക്ക് ഒരു മടക്കയാത്ര: കാലം മായ്ക്കാത്ത കത്തെഴുത്തിന്റെ മാന്ത്രിക സൗന്ദര്യം

ഭാമനാവത്ത്

(KVARTHA) എല്ലാ വർഷവും സെപ്റ്റംബർ ഒന്നിന് ലോക കത്തെഴുത്ത് ദിനമായി ആചരിക്കുന്നു. പുതിയ തലമുറയ്ക്ക് കത്തെഴുത്ത് എന്നത് കേട്ടുകേൾവി മാത്രമാണെങ്കിൽ പഴയ തലമുറയ്ക്ക് അത് ജീവിതത്തിന്റെ ഭാഗമായിരുന്നു. വികാരങ്ങളും വിചാരങ്ങളും, ശ്വാസോച്ഛ്വാസത്തിന്റെ താളവും, വിയർപ്പിന്റെ മണവും, വാത്സല്യത്തിന്റെ സ്പർശവും എല്ലാം ഒരു കത്തിൽ ഒളിഞ്ഞിരുന്നു.

ഒരു കാലഘട്ടത്തിൽ നമ്മുടെ ജീവിതചര്യയുടെ ഭാഗമായിരുന്ന, ഇപ്പോൾ പൂർണ്ണമായും അന്യംനിന്നുപോയ കത്തെഴുത്ത് എന്ന കലയുടെ സൗന്ദര്യം ഓർമ്മിപ്പിക്കാനും ആ ഓർമ്മകൾ പുതുക്കാനുമാണ് ഈ ദിനം. മനസ്സും ശരീരവും ഒത്തുവരികയാണെങ്കിൽ ഒരു കടലാസ് എടുത്ത് കത്തെഴുതി പ്രോത്സാഹിപ്പിക്കാനും കത്തെഴുത്ത് എന്ന കലയെക്കുറിച്ച് പഠിക്കാനും കൂടിയുള്ള ഒരു ദിനമാണിത്.

പ്രിയതമനായ ദുഷ്യന്തന് താമരയിതളിൽ പ്രണയലേഖനങ്ങളെഴുതിയ ശകുന്തളയും, ജയിൽവാസത്തിനിടെ മകൾ ഇന്ദിരാ പ്രിയദർശിനിക്ക് കത്തെഴുതിയ ജവഹർലാൽ നെഹ്റുവും, ബിർമിങ്ഹാം കത്തുകളിലൂടെ ശ്രദ്ധേയനായ മാർട്ടിൻ ലൂഥർ കിംഗുമൊക്കെ കത്തെഴുത്തുകളിലൂടെ ഒരു തലമുറയെ പ്രചോദിപ്പിച്ചവരാണ്. 

പഴയകാല സിനിമകളിലും നോവലുകളിലും പ്രണയലേഖനങ്ങൾ വഹിച്ച പങ്ക് വളരെ വലുതാണ്. സാഹിത്യ മേഖലയ്ക്ക് വലിയ സംഭാവനകൾ നൽകാനും മനോഹരമായ കത്തുകൾക്ക് കഴിഞ്ഞിട്ടുണ്ട്.

ഒരു കാലഘട്ടത്തിൽ നമ്മുടെ കുടുംബത്തിലെ വി.ഐ.പി. ആയിരുന്നു പോസ്റ്റ്മാൻ. ഭർത്താവിന്റെ ഗൾഫ് കത്തിന് കാത്തിരിക്കുന്ന ഭാര്യമാരും, പട്ടാളക്കത്തിന് കാത്തിരിക്കുന്ന കാമിനിമാരും, സ്നേഹം നിറഞ്ഞ കത്തിന് കാത്തിരിക്കുന്ന മാതാപിതാക്കളും പോസ്റ്റ്മാന്റെ വരവിനായി കാത്തിരുന്നത് ഇന്നും ഓർമ്മയിലുണ്ട്. 

സാധാരണ വരുന്ന സമയത്തിന് ഒരു മണിക്കൂർ മുമ്പ് പൂമുഖവാതിൽ കാത്തുനിൽക്കുന്നവരുടെ മനോവ്യഥ വാക്കുകൾക്ക് അതീതമാണ്. പോസ്റ്റ്മാൻ വന്നില്ലെങ്കിലോ, പ്രതീക്ഷിച്ച കത്ത് ലഭിച്ചില്ലെങ്കിലോ അവർ അനുഭവിച്ച നിരാശയും വിഷമവും ഇന്നും ഓർമ്മയിൽ തങ്ങിനിൽക്കുന്നു.

സ്നേഹത്തോടെയുള്ള ഒരു അഭിസംബോധനയിൽ തുടങ്ങി, പറയാനുള്ള കാര്യങ്ങളും നന്ദിയും കടപ്പാടും കത്തിന്റെ ഉള്ളടക്കത്തിലൂടെ കടന്ന്, സ്നേഹാശംസകളോടെ സ്വന്തം പേരും ഒപ്പും വെച്ച് തയ്യാറാക്കുന്ന കത്തുകൾക്ക് വികാരതീവ്രത കൂടുതലായിരുന്നു. 

ഇമെയിലിന്റെയും, ഫേസ്ബുക്കിന്റെയും, വാട്സാപ്പിന്റെയും, ഇൻസ്റ്റഗ്രാമിന്റെയും ലോകത്ത് ജീവിക്കുന്ന ഇന്നത്തെ തലമുറയ്ക്ക് പഴയ തലമുറ അനുഭവിച്ച ഈ വികാരം മനസ്സിലാക്കാൻ കഴിഞ്ഞെന്നു വരില്ല. ലോകത്തിന്റെ ഏത് കോണിലുമുള്ളവരുമായി സെക്കൻഡുകൾക്കുള്ളിൽ മുഖാമുഖം സംസാരിക്കാൻ കഴിയുന്ന ഈ കാലഘട്ടത്തിൽ, രണ്ടും മൂന്നും ആഴ്ച കൂടുമ്പോൾ വരുന്ന കത്തുകൾ മാത്രം ആശ്രയിച്ചിരുന്ന ഒരു തലമുറ ഇവിടെ ജീവിച്ചിരുന്നു എന്ന് ഓർക്കുന്നത് പോലും അതിശയകരമാണ്.

കത്തെഴുത്ത് ഒരു കലയായി മാറിയ കഥയും ഈ അവസരത്തിൽ ഓർമ്മവരുന്നു. ദുബായ് കത്ത് എന്ന പേരിൽ പീർ മുഹമ്മദ് എഴുതി സംഗീതം നൽകി പാടിയ മനോഹരമായ മാപ്പിളപ്പാട്ടുകൾ ഇന്നും ആസ്വാദകരുടെ മനസ്സിൽ മായാതെ നിൽക്കുന്നു.

കത്തെഴുത്ത് കൂടുതൽ വായിക്കാനും അറിയാനും അക്ഷരങ്ങളുമായി അടുക്കാനും ഏറെ സഹായിക്കുന്നു. പ്രിയപ്പെട്ടവരുമായി ആശയവിനിമയം നടത്താനുള്ള ഈ വഴിയിലൂടെ ലഭിക്കുന്ന കത്തുകൾ എത്ര വർഷം കഴിഞ്ഞാലും സൂക്ഷിച്ചുവെയ്ക്കുകയും, വിഷമം വരുമ്പോൾ എടുത്ത് വായിച്ച് ആശ്വാസം കണ്ടെത്തുകയും ചെയ്തിരുന്ന പഴയ തലമുറ എന്നത് വെറും ഭംഗിവാക്കല്ല, ഒരു വികാരമാണ്. സൗഹൃദം, പ്രണയം, ദാമ്പത്യം, പ്രിയപ്പെട്ടവരോടുള്ള സ്നേഹം എന്നിവ അന്ന് കെടാതെ സൂക്ഷിച്ചിരുന്നത് ഇത്തരം കത്തുകളായിരുന്നു.

ഇന്നത്തെ സോഷ്യൽ മീഡിയ സന്ദേശങ്ങളും പഴയ കത്തുകളും തമ്മിലുള്ള പ്രധാന വ്യത്യാസം വികാരതീവ്രതയാണ്. പഴയ കത്തുകൾ പറയാനുള്ള കാര്യങ്ങൾ മുഴുവൻ നന്നായി ആലോചിച്ച് തയ്യാറാക്കുമ്പോൾ അത് പൂർണ്ണമായും വികാരപരമായിരിക്കും. 

ഇന്ന് മെസ്സേജ് ഇഷ്ടപ്പെട്ടില്ലെങ്കിൽ 'ഡിലീറ്റ് ഫോർ എവരി വൺ' എന്ന ഓപ്ഷനുണ്ട്. എന്നാൽ അന്ന് അങ്ങനെയൊരു സൗകര്യമില്ലാത്തതുകൊണ്ട് മറ്റുള്ളവരെ വേദനിപ്പിക്കാതെ മാത്രമേ കത്തുകൾ എഴുതിയിരുന്നുള്ളൂ.

അതുകൊണ്ട്, പുതിയ തലമുറ ഈ ദിനം ഒരു വെല്ലുവിളിയായി ഏറ്റെടുത്ത് പ്രിയപ്പെട്ടവർക്ക് ഹൃദയത്തിൽ ചാലിച്ച ഭാഷയിൽ ഒരു കത്തെഴുതി നോക്കൂ. അത് വായിക്കുന്നവർക്കും കേൾക്കുന്നവർക്കും ഉണ്ടാകുന്ന അനുഭൂതി വാക്കുകൾക്ക് അതീതമായിരിക്കും. 

നിങ്ങളുടെ പങ്കാളിയോ, മാതാപിതാക്കളോ, സുഹൃത്തോ ആവട്ടെ, അവർക്ക് നൽകാൻ കഴിയുന്ന ഏറ്റവും നല്ല സമ്മാനങ്ങളിൽ ഒന്നായിരിക്കും ഈ കത്ത്. മറന്നുപോയ ഒരു നല്ല ഓർമ്മയെ തിരികെ കൊണ്ടുവരാനുള്ള ഈ അവസരം എല്ലാവർക്കും ഉപയോഗിക്കാം.

കത്തെഴുത്തിനെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 
 

Article Summary: Celebrating World Letter Writing Day and remembering the emotional value of handwritten letters.

#WorldLetterWritingDay #LetterWriting #Letter #Memories #Nostalgia #MalayalamNews