'എന്റെ ഡിപി ഇപ്പോഴും ചേട്ടനാണ്, അവർ രണ്ടാളും എന്നിലൂടെ ജീവിക്കുന്നു'; സഹോദരന്മാരെ ഓർത്ത് വിങ്ങിപ്പൊട്ടി ആശ ശരത്ത്, വാക്കുകൾ വൈറൽ

കൊച്ചി: (KVARTHA) മരിച്ചുപോയ സഹോദരങ്ങളുടെ ഓർമ്മകൾക്ക് മുന്നിൽ വികാരാധീനയായി പ്രശസ്ത സിനിമാ താരം ആശ ശരത്ത്. തന്റെ രണ്ട് സഹോദരന്മാരും തന്നിലൂടെ ജീവിക്കുന്നുവെന്ന് വിശ്വസിക്കാനാണ് തനിക്കിഷ്ടമെന്നും, അവരുടെ ഓർമ്മകൾ നിത്യവും കൂടെയുണ്ടെന്നും താരം തുറന്നുപറഞ്ഞു. 'യെസ് 27' എന്ന മാധ്യമത്തിന് നൽകിയ അഭിമുഖത്തിലാണ് ആശ ശരത്ത് വ്യക്തിജീവിതത്തിലെ വലിയ നഷ്ടത്തെക്കുറിച്ച് മനസുതുറന്നത്.

സഹോദരങ്ങളുടെ വിയോഗം

വേണു, ബാലു എന്നിങ്ങനെ രണ്ട് ജ്യേഷ്ഠസഹോദരന്മാരായിരുന്നു ആശ ശരത്തിന് ഉണ്ടായിരുന്നത്. രണ്ടുപേരും നേരത്തെ തന്നെ വിടപറഞ്ഞു. ‘രണ്ടു പേരും ദൈവത്തില്‍ ചേര്‍ന്നുവെന്നാണ് ഞാന്‍ വിശ്വസിക്കുന്നത്. ഒരാള്‍ പോയപ്പോൾ അയാളെക്കൂടി രണ്ടാമത്തെ ആളില്‍ കണ്ടിരുന്നു. 

വേണു ചേട്ടന്‍ പോയപ്പോള്‍ ആ രൂപത്തെക്കൂടിയാണ് ബാലേട്ടനില്‍ കണ്ടിരുന്നത്. രണ്ടാമത്തെ ആളും പോയപ്പോള്‍ ഞാന്‍ അമ്മയെ ആശ്വസിപ്പിക്കാനായി നമ്മളെല്ലാം ക്യൂവിലാണ് എന്ന് തമാശയായി പറയും. അവർ നേരത്തെ പോയി സീറ്റ് പിടിച്ചത് മാത്രമാണ്. നമ്മളെല്ലാവരും പോകുമെന്ന് പറഞ്ഞ് സമാധാനിപ്പിക്കും,’ ആശ ശരത്ത് പറഞ്ഞു.

ഡിപി ഇപ്പോഴും ചേട്ടൻ

സഹോദരങ്ങൾ മരിച്ചുവെന്ന് കരുതുന്നില്ലെന്നും അവർ തന്നിലൂടെ ജീവിക്കുകയാണെന്നും താരം പറയുന്നു. ‘ഞാന്‍ എന്നെ സമാധാനിപ്പിക്കുന്നത് എന്നിലൂടെ എന്റെ ചേട്ടന്മാര്‍ ജീവിക്കുന്നുവെന്നാണ്. വേണു ചേട്ടനും ബാലേട്ടനും ഒന്നാണ്. അതിനാല്‍ എന്റെ വാട്സ്ആപ് ഡിപി ഇപ്പോഴും ചേട്ടനാണ്. 

ചേട്ടന്‍ പോയ അന്ന് ഇട്ടതാണ് അത്. ഞാന്‍ വിശ്വസിക്കുന്നത് എന്റെ ഫോണില്‍ നിന്നും വാട്‌സ്ആപ്പ് മെസേജ് പോയാല്‍ അവര്‍ അയക്കുന്ന ഫീലായിരിക്കണം എന്നാണ്. അങ്ങനെയാണ് എല്ലാം ചെയ്യുന്നത്. അതിലാണ് എന്റെ സംതൃപ്തി,’ ആശ ശരത്ത് വ്യക്തമാക്കി.

ഓർമ്മകൾ തളംകെട്ടുന്ന വീട്

ചേട്ടൻ ഉപയോഗിച്ചിരുന്ന ഫോൺ ഇപ്പോൾ ഉപയോഗിക്കുന്നത് അമ്മയാണ്. ഇപ്പോഴും അമ്മ വിളിക്കുമ്പോള്‍ ഫോണിൽ 'ബാലേട്ടന്‍' എന്നാണ് വരുന്നത്. ചേട്ടൻ പോയതിന് ശേഷമാണ് പുതിയ വീടിന്റെ ഹൗസ് വാമിങ് നടന്നത്. അതിനാൽ ആ വീടിന് ചേട്ടന്റെ പേരായ 'ബാലഗോകുലം' എന്നാണ് നൽകിയിരിക്കുന്നതെന്നും അവർ എവിടേയും പോയിട്ടില്ലെന്നും താരം കൂട്ടിച്ചേർത്തു.

ആശകൾ ആയിരം

ആശ ശരത്ത് പ്രധാന വേഷത്തിലെത്തുന്ന ഏറ്റവും പുതിയ ചിത്രമാണ് 'ആശകൾ ആയിരം'. ജയറാമും മകൻ കാളിദാസ് ജയറാമും 'കൊച്ചു കൊച്ചു സന്തോഷങ്ങൾ' എന്ന സിനിമയ്ക്ക് ശേഷം 23 വർഷങ്ങൾക്കിപ്പുറം ഒന്നിക്കുന്ന ചിത്രം കൂടിയാണിത്. 'ഒരു വടക്കൻ സെൽഫി'ക്ക് ശേഷം ജി. പ്രജിത്ത് സംവിധാനം ചെയ്യുന്ന ചിത്രത്തിന് മികച്ച പ്രേക്ഷക പ്രതികരണമാണ് ലഭിക്കുന്നത്. 

അരവിന്ദ് രാജേന്ദ്രനും ജൂഡ് ആന്റണി ജോസഫും ചേർന്നാണ് തിരക്കഥ. ഷറഫുദ്ദീന്‍, ഇഷാനി കൃഷ്ണ, രമേശ് പിഷാരടി തുടങ്ങിയവരും ചിത്രത്തിലുണ്ട്. ശ്രീഗോകുലം മൂവീസിന്റെ ബാനറിൽ ഗോകുലം ഗോപാലനും കൃഷ്ണമൂർത്തിയും ചേർന്നാണ് ചിത്രം നിർമ്മിക്കുന്നത്.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Actress Asha Sharath shares an emotional memory of her late brothers and explains why she still keeps her brother's photo as her WhatsApp DP.

#AshaSharath #MalayalamCinema #FamilySentiments #EmotionalInterview #AashakalAayiram #Jayaram #KVARTHA