കെ ആർ ജോസഫ്

(KVARTHA) പലരും ഇന്ന് പ്രത്യേകിച്ച് കേരളത്തിൽ വലിയ വലിയ വീടുകൾ പണിയുന്ന തിരക്കിലാണ്. തീരെ ഗൃഹപാഠം ചെയ്യാതെയാണ് ഏറിയ പങ്കും വീടുപണി ആരംഭിക്കുന്നത്. അതുകൊണ്ട് തന്നെ വീട് പണിയ്ക്ക് ചിലവും വർദ്ധിക്കുന്നു. അധ്വാനിച്ചുണ്ടാക്കിയ സമ്പാദ്യമെല്ലാം ചിലവാക്കിയാണ് പലരും വീടു വെക്കുന്നത്, അല്ലെങ്കിൽ കടമെടുത്ത്. ചില കാര്യങ്ങൾ ശ്രദ്ധിച്ചാൽ നമുക്ക് കുറഞ്ഞ ചെലവിൽ വീട് നിർമ്മിക്കാൻ ആകും. അത്തരത്തിലുള്ള ഒമ്പത് കാര്യങ്ങളാണ് ഇവിടെ സൂചിപ്പിക്കുന്നത്. 

1. ബജറ്റ് ഹോം: തെറ്റിദ്ധാരണകൾ ഒഴിവാക്കുക

ബജറ്റ് ഹോം എന്ന ആശയത്തെക്കുറിച്ച് പലർക്കും തെറ്റായ ധാരണകളുണ്ട്. ഒരേ പ്ലാൻ പല ആർക്കിടെക്ടുമാർക്കും എഞ്ചിനീയർമാർക്കും നൽകി ഏറ്റവും കുറഞ്ഞ എസ്റ്റിമേറ്റ് തിരഞ്ഞെടുക്കുന്ന രീതി ശരിയായ സമീപനമല്ല. ബജറ്റ് ഹോമിന്റെ സാധ്യതകളെക്കുറിച്ച് ശരിയായ ധാരണ നൽകാൻ കഴിവുള്ള ഒരു ആർക്കിടെക്ടിനെയോ എഞ്ചിനീയറെയോ സമീപിക്കുകയാണ് ഇതിനുള്ള ശരിയായ മാർഗ്ഗം. നിങ്ങളുടെ സാമ്പത്തിക പരിമിതികൾക്കനുസരിച്ച് ഏറ്റവും മികച്ച ഡിസൈനും പ്ലാനും അവർക്ക് നിർദ്ദേശിക്കാൻ കഴിയും.

 2. കാർ പോർച്ച്: അത്യാവശ്യമെങ്കിൽ മാത്രം

ഇന്നത്തെ കാലത്ത് പലരും വീടിന്റെ മുൻപിൽ ഒരു കാർ പോർച്ച് നിർമ്മിക്കാൻ ആഗ്രഹിക്കുന്നു. എന്നാൽ ഒരു കാർ പോർച്ചിന് വേണ്ടി വരുന്ന സ്ഥലവും പണവും ഒരു ചെറിയ റൂമിന്റെ നിർമ്മാണത്തിന് തുല്യമാണ് എന്ന് ഓർക്കുക. സാമ്പത്തികമായി ബുദ്ധിമുട്ടുള്ളവർക്ക് കാർ പോർച്ച് അത്യാവശ്യമെങ്കിൽ കുറഞ്ഞ ചിലവിൽ നിർമ്മിക്കാവുന്ന കനോപ്പികൾ ഇന്ന് ലഭ്യമാണ്. ഇത് നിങ്ങളുടെ വാഹനത്തിന് സംരക്ഷണം നൽകുകയും ചെയ്യും, അധിക ചിലവ് ഒഴിവാക്കുകയും ചെയ്യും.

3. പെർഗോള: അമിത ആഡംബരം ഒഴിവാക്കുക

മലയാളികൾക്കിടയിൽ പെർഗോള ഒരു ട്രെൻഡ് ആയി മാറിയിരിക്കുന്നു. വീടിന്റെ റൂഫിൽ, ബാൽക്കണിയിൽ, ജനലിന് മുകളിൽ, ചുമരിൽ എന്നിങ്ങനെ എവിടെ നോക്കിയാലും പെർഗോള കാണാം. ഭംഗിക്ക് വേണ്ടി റൂഫിൽ ഗ്ലാസ് ഇട്ട പെർഗോളകൾ മഴക്കാലത്ത് വൃത്തിയാക്കാൻ ബുദ്ധിമുട്ടുള്ള ഒരവസ്ഥയിലേക്ക് എത്തും. അതുപോലെ ചുമരിൽ വെറും പാർട്ടീഷന് വേണ്ടി പെർഗോള നിർമ്മിക്കുമ്പോൾ അതിന്റെ പോസ്റ്റുകൾ ഫില്ലർ പോലെ വാർക്കേണ്ടതില്ല. വെട്ടുകല്ലോ ഇഷ്ടികയോ ഉപയോഗിച്ച് കുറഞ്ഞ ചിലവിൽ ഇത് നിർമ്മിക്കാവുന്നതാണ്. അനാവശ്യമായ ആഡംബരങ്ങൾ ഒഴിവാക്കുന്നതിലൂടെ നിർമ്മാണ ചിലവ് കുറയ്ക്കാൻ സാധിക്കും.

4. ഗസ്റ്റ് ബെഡ്റൂം: ആവശ്യമുണ്ടോ എന്ന് ചിന്തിക്കുക

കേരളത്തിലെ പല വീടുകളിലും എപ്പോഴും ഉപയോഗിക്കാത്ത ഒരു ഗസ്റ്റ് ബെഡ്റൂം കാണാം. വിരുന്നുകൾക്ക് പോലും സമയം കിട്ടാത്ത ഈ കാലഘട്ടത്തിൽ എന്തിനാണ് സ്ഥലവും പണവും ചിലവഴിച്ച് ഒരു അധിക ബെഡ്റൂം ഉണ്ടാക്കുന്നത് എന്ന് ചിന്തിക്കുക. അപൂർവ്വമായി വരുന്ന അതിഥികൾ അടുത്ത ബന്ധുക്കളായിരിക്കും. അങ്ങനെയുള്ള സാഹചര്യങ്ങളിൽ ഉള്ള സൗകര്യങ്ങൾ പരസ്പരം പങ്കുവെക്കുന്നതല്ലേ കൂടുതൽ നല്ലത്?

5. ഫ്ലോറിംഗ്: വില കുറഞ്ഞതും മികച്ചതുമായവ തിരഞ്ഞെടുക്കുക

അയൽവീട്ടിലെ ഫ്ലോറിംഗ് കണ്ട് അതേപോലെ ചെയ്യണം എന്ന് നിർബന്ധം പിടിക്കുന്നത് ചിലവ് കൂട്ടാൻ കാരണമാകും. ഗ്രാനൈറ്റിനെക്കാൾ വില കുറഞ്ഞതും എന്നാൽ കൂടുതൽ ഡിസൈനുകളും ഈടുനിൽക്കുന്നതുമായ വിട്രിഫൈഡ് ടൈലുകൾ ഇന്ന് ലഭ്യമാണ്. ചിലർ ഒന്നാം നിലയിൽ വിലകൂടിയ ഗ്രാനൈറ്റും രണ്ടാം നിലയിൽ കുറഞ്ഞ ഗ്രേഡിലുള്ള ടൈലുകളും ഉപയോഗിക്കാറുണ്ട്. നിങ്ങളുടെ ബജറ്റിന് അനുയോജ്യമായതും എന്നാൽ ഗുണമേന്മയുള്ളതുമായ ഫ്ലോറിംഗ് മെറ്റീരിയൽ തിരഞ്ഞെടുക്കുക.

6. ലൈറ്റിംഗ്: അമിത വെളിച്ചം ഒഴിവാക്കുക

ചില വീടുകളിൽ എവിടെ നോക്കിയാലും ലൈറ്റ് പോയിന്റുകൾ കാണാം. ബീമിലും, തൂണിലും, പെർഗോളയുടെ ഉള്ളിലും, സീലിംഗിൽ നക്ഷത്രങ്ങളെ പോലെയും ലൈറ്റുകൾ നിറഞ്ഞിരിക്കും. ഇത് പലപ്പോഴും അരോചകമായി തോന്നാം. കൂടാതെ ഇത്രയധികം ലൈറ്റുകൾ ഇടുമ്പോൾ അതിന്റെ ഫീസ് ആയ ബൾബുകൾ മാറ്റാൻ മടിയും സമയക്കുറവും ഉണ്ടാകാം. കറന്റ് ബിൽ കൂടുമ്പോൾ കെ എസ് ഇ ബിയെ കുറ്റം പറയുന്നതിൽ അർത്ഥമില്ല. ആവശ്യത്തിന് മാത്രം ലൈറ്റുകൾ നൽകി ചെലവ് കുറയ്ക്കുക.

7. എഞ്ചിനീയർ/ആർക്കിടെക്ട് ഫീസ് ലാഭിക്കൽ: അപകടം ക്ഷണിച്ചു വരുത്തരുത്

ചില ആളുകൾ പ്ലാനും ത്രീഡി ചിത്രങ്ങളും കിട്ടിയാൽ എല്ലാം പൂർത്തിയായി എന്ന് കരുതുകയും പിന്നീട് സൈറ്റിൽ എന്തെങ്കിലും പ്രശ്നമുണ്ടാകുമ്പോൾ മാത്രം എഞ്ചിനീയറെ വിളിക്കുകയും ചെയ്യും. ഇത് പലപ്പോഴും ചെയ്ത വർക്ക് പൊളിച്ചുമാറ്റി വീണ്ടും പണി ചെയ്യേണ്ട അവസ്ഥയിലേക്ക് കൊണ്ടെത്തിക്കുകയും കൂടുതൽ പണം നഷ്ടപ്പെടുത്തുകയും ചെയ്യും. ഒരു നല്ല എഞ്ചിനീയറെയോ ആർക്കിടെക്ടിനെയോ ആദ്യം തന്നെ സമീപിക്കുന്നതിലൂടെ നിർമ്മാണത്തിലെ പല അപാകതകളും ഒഴിവാക്കാനും ചിലവ് കുറയ്ക്കാനും സാധിക്കും.

8. ബാൽക്കണി: താഴത്തെ നിലയുടെ തനിപ്പകർപ്പ് ഒഴിവാക്കുക

പല വീടുകളിലും താഴത്തെ സിറ്റ്ഔട്ടിന് നേരെ മുകളിലായിരിക്കും മുകളിലത്തെ ബാൽക്കണിയും വരുന്നത്. താഴെ പ്രധാന വാതിൽ മരം കൊണ്ട് വലിയ മോഡലിൽ ജനലുകളോട് കൂടി നിർമ്മിക്കുമ്പോൾ ഏകദേശം 40,000 മുതൽ 60,000 രൂപ വരെ ചിലവ് വരും. എന്നാൽ ചിലർ അതേ അളവിലും ഡിസൈനിലും മുകളിലത്തെ ബാൽക്കണിയിലും വാതിലും ജനലുകളും നിർമ്മിച്ച് അനാവശ്യമായി പണം കളയുന്നു. മുകളിലത്തെ ബാൽക്കണിക്ക് ഇത്രയും വലിയ വാതിലിന്റെയും ജനലുകളുടെയും ആവശ്യം ഉണ്ടോ എന്ന് ചിന്തിക്കുക.

9. ഭൂമിയുടെ സ്വഭാവത്തിന് വിപരീതമായി വീട് നിർമ്മിക്കാതിരിക്കുക

ചെറിയ ചരിവുകളോ ഉയരമുള്ള സ്ഥലങ്ങളോ നിരപ്പാക്കിയോ മണ്ണിട്ട് നികത്തിയോ സീറോ ലെവൽ ആക്കി വീട് വെക്കുന്ന പ്രവണത പലരിലും കാണാം. ഇങ്ങനെ ചെയ്യുമ്പോൾ മണ്ണിടിച്ചിൽ ഒഴിവാക്കാൻ വലിയ കോൺക്രീറ്റ് മതിലുകളോ കരിങ്കൽ ഭിത്തികളോ കെട്ടേണ്ടി വരും. അതുപോലെ മണ്ണിട്ട് നികത്തിയ സ്ഥലങ്ങളിൽ മണ്ണ് ഒലിച്ചുപോകാതിരിക്കാൻ പ്ലോട്ടിന് ചുറ്റും മതിലുകൾ കെട്ടേണ്ടി വരും. ഇത് ചിലപ്പോൾ വീടിന്റെ അടിത്തറയുടെ ചിലവിനേക്കാൾ കൂടുതലാകാം. സാമ്പത്തിക ശേഷിയുള്ളവർക്ക് ഇങ്ങനെ ചെയ്യാമെങ്കിലും അല്ലാത്തവർ ഭൂമിയുടെ സ്വാഭാവികമായ രൂപത്തിനനുസരിച്ച് വീട് ഡിസൈൻ ചെയ്യുന്നതാണ് നല്ലത്

ഇത്രയും കാര്യങ്ങൾ ശ്രദ്ധിച്ചാൽ ഒരു പരിധി വരെ കുറഞ്ഞ ചെലവിൽ നിങ്ങൾക്ക് ഒരു നല്ല വീട് നിർമ്മിക്കാൻ സാധിക്കും. നിങ്ങളുടെ ബജറ്റിൽ കാര്യങ്ങൾ ഒതുങ്ങി നിൽക്കുകയും ചെയ്യും. എല്ലാറ്റിനുമുപരിയായി, നിങ്ങൾ കയറി ചെല്ലുമ്പോൾ മനസ്സമാധാനം ലഭിക്കുന്ന ഒരു വീടായിരിക്കണം നിങ്ങളുടെ ലക്ഷ്യം.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

These 9 tips can help you build a house at a reduced cost while keeping quality intact by avoiding unnecessary luxury and wisely planning your budget.

#BudgetHome, #CostSaving, #HouseConstruction, #HomeDesign, #KeralaHomes, #SavingTips