Landslide | വയനാട് ഉരുൾപൊട്ടൽ: വീടുകൾ നഷ്ടമായവർക്ക് ആദ്യഘട്ടത്തിൽ 25 വീടുകൾ നിർമ്മിച്ചു നൽകുമെന്ന് ഡി വൈ എഫ് ഐ
തിരുവനന്തപുരം: (KVARTHA) വയനാട് ചൂരൽമലയിൽ ഉണ്ടായ ഉരുൾപൊട്ടൽ മൂലം വീടുകൾ നഷ്ടമായവർക്ക് ആദ്യഘട്ടത്തിൽ 25 വീടുകൾ നിർമ്മിച്ചു നൽകുമെന്ന് ഡി വൈ എഫ് ഐ സംസ്ഥാന സെക്രട്ടറി വി കെ സനോജ്, പ്രസിഡണ്ട് വി വസീഫ് എന്നിവർ വാർത്താ സമ്മേളനത്തിൽ അറിയിച്ചു.
സർക്കാർ വിഭാവനം ചെയ്യുന്ന പുനരധിവാസ പദ്ധതിയുമായി സഹകരിച്ചായിരിക്കും ഈ പ്രവർത്തനം നടത്തുക. ദുരിതാശ്വാസ പ്രവർത്തനത്തിന്റെ ഭാഗമായി ഡിവൈഎഫ്ഐ യൂത്ത് ബ്രിഗേഡ് പ്രവർത്തകർ ദുരിതബാധിത മേഖലയിൽ തുടർച്ചയായി സേവനം ചെയ്യും. മനുഷ്യസാധ്യമായ എല്ലാ സഹായങ്ങളും ദുരിതബാധിതർക്ക് നൽകുന്നതിനും പുനരധിവാസ പ്രവർത്തനങ്ങൾക്ക് പൂർണ പിന്തുണ നൽകുന്നതിനും ഡിവൈഎഫ്ഐ സജ്ജമാണ്.
ദുരിതാശ്വാസ ക്യാമ്പുകൾ സംഘടിപ്പിക്കൽ, ഭക്ഷണ വിതരണം, വസ്ത്ര വിതരണം, മെഡിക്കൽ ക്യാമ്പുകൾ, പുനർനിർമ്മാണ പ്രവർത്തനങ്ങൾ എന്നിവ ഉൾപ്പെടെയുള്ള പ്രവർത്തനങ്ങൾ നടത്തും. സാധാരണക്കാർക്ക് ദുരിതാശ്വാസ പ്രവർത്തനങ്ങളിൽ പങ്കെടുക്കാനും സഹായങ്ങൾ നൽകാനും അവസരം ഒരുക്കും. സർക്കാർ ഏജൻസികളുമായി സഹകരിച്ച് ദുരിതാശ്വാസ പ്രവർത്തനങ്ങൾ കൂടുതൽ ഫലപ്രദമാക്കും.
വയനാട് ചൂരൽമലയിൽ ഉണ്ടായ ദുരന്തത്തിൽ നിന്ന് ദുരിതബാധിതരെ പുനരുദ്ധരിക്കുന്നതിനായി ഡിവൈഎഫ്ഐ സജീവമായി ഇടപെടുന്നുണ്ട്. സമൂഹത്തിലെ വിവിധ വിഭാഗങ്ങളുടെ സഹായത്തോടെ ദുരിതബാധിതർക്ക് പുനരധിവാസം നൽകുന്നതിനുള്ള പ്രവർത്തനങ്ങൾ ഊർജ്ജിതമാക്കുമെന്നും നേതാക്കൾ വിശദീകരിച്ചു.
കേന്ദ്ര കമ്മിറ്റി അംഗം എം. ഷാജർ, സംസ്ഥാന ജോയിൻ്റ് സെക്രട്ടറി കെ റഫീഖ് എന്നിവരും പത്രസമ്മേളനത്തിൽ പങ്കെടുത്തു.
