Govt. Jobs | കേന്ദ്ര സർക്കാർ ജോലിക്ക് അവസരം: മൾട്ടി ടാസ്‌കിങ്, ഹവൽദാർ ആകാം, 8326 ഒഴിവുകൾ കാത്തിരിക്കുന്നു; അറിയേണ്ടതെല്ലാം 

ന്യൂഡെൽഹി: (KVARTHA) സർക്കാർ ജോലി സ്വപ്നം കാണുന്നവർക്ക് തങ്ങളുടെ സ്വപ്നങ്ങൾ സാക്ഷാത്കരിക്കാൻ സുവർണാവസരം. സ്റ്റാഫ് സെലക്ഷൻ കമ്മീഷൻ (SSC) മൾട്ടി ടാസ്‌കിംഗ് (നോൺ-ടെക്‌നിക്കൽ) സ്റ്റാഫ് (MTS), ഹവൽദാർ (CBIC & CBN) പരീക്ഷയ്ക്കുള്ള (SSC MTS 2024) റിക്രൂട്ട്‌മെൻ്റ് വിജ്ഞാപനം പുറത്തിറക്കി. 8,326 തസ്തികകൾ നികത്താനാണ് ലക്ഷ്യമിടുന്നത്. താൽപ്പര്യമുള്ളവർക്ക്  ജൂലൈ 31 നുള്ളിൽ ഓൺലൈനായി അപേക്ഷിക്കാം. 

അപേക്ഷാ ഫീസ്:

എല്ലാ വിഭാഗത്തിലുമുള്ള അപേക്ഷകർക്കും 100 രൂപ ആണ് അപേക്ഷാ ഫീസ്. ഓൺലൈനായി ഡെബിറ്റ് കാർഡ്, ക്രെഡിറ്റ് കാർഡ് അല്ലെങ്കിൽ നെറ്റ് ബാങ്കിംഗ് ഉപയോഗിച്ച് ഫീസ് അടയ്ക്കാം. 2024 ഓഗസ്റ്റ് ഒന്നിനകം ഫീസ് അടയ്ക്കേണ്ടതാണ്.

അപേക്ഷാ ഫോറം തിരുത്തൽ:

തിരഞ്ഞെടുക്കപ്പെട്ട ദിവസങ്ങളിൽ മാത്രം അപേക്ഷാ ഫോറത്തിൽ തിരുത്തലുകൾ വരുത്താൻ അനുവദിക്കും. അപേക്ഷകർക്ക് ഓഗസ്റ്റ് 16 മുതൽ 17 വരെ അവരുടെ അപേക്ഷാ ഫോമിൽ ഓൺലൈനായി തിരുത്തലുകൾ വരുത്താം. 

പരീക്ഷാ തീയതി:

ടയർ 1 പരീക്ഷയുടെ ഔദ്യോഗിക തീയതി ഉടൻ പ്രഖ്യാപിക്കും. 2024 ഒക്ടോബറിലോ നവംബറിലോ ആണ് താൽക്കാലികമായി ഷെഡ്യൂൾ ചെയ്തിരിക്കുന്നത്. തിരഞ്ഞെടുപ്പ് പ്രക്രിയയിൽ കമ്പ്യൂട്ടർ അധിഷ്ഠിത പരീക്ഷയും (CBE) ഫിസിക്കൽ എഫിഷ്യൻസി ടെസ്റ്റ് (PET)/ഫിസിക്കൽ സ്റ്റാൻഡേർഡ് ടെസ്റ്റ് (PST) (ഹവൽദാർ തസ്തികയ്ക്ക് മാത്രം) ഉൾപ്പെടുന്നു.

കേരളത്തിലെ പരീക്ഷാകേന്ദ്രങ്ങൾ: 

തിരുവനന്തപുരം, കൊല്ലം, കോട്ടയം, എറണാകുളം, തൃശൂർ, കോഴിക്കോട്. ഒരേ റീജനു കീഴിൽ മുൻഗണനാക്രമത്തിൽ മൂന്ന് കേന്ദ്രങ്ങൾ തിരഞ്ഞെടുക്കാം.

ഒഴിവുകൾ:

മൊത്തം 8,326 ഒഴിവുകളിൽ 4,887 എണ്ണം മൾട്ടി ടാസ്കിംഗ് സ്റ്റാഫ് (എംടിഎസ്) തസ്തികകൾക്കും 3,439 എണ്ണം ഹവിൽദാർ (സിബിഐസി & സിബിഎൻ) തസ്തികകൾക്കുമാണ്.

ആർക്കൊക്കെ അപേക്ഷിക്കാം?:

എംടിഎസ്, ഹവൽദാർ തസ്തികകൾക്ക് അപേക്ഷിക്കുന്നതിന്, അപേക്ഷകർക്ക് അംഗീകൃത ബോർഡിൽ നിന്ന് 10-ാം ക്ലാസ് പാസായിരിക്കണം. പ്രായപരിധി: ഹവൽദാർ (സിബിഐസി, സിബിഎൻ):18–27, എംടിഎസ്: 18–25. സംവരണ വിഭാഗത്തിന് പെട്ട  ഉദ്യോഗാർത്ഥികൾക്ക് ഉയർന്ന പ്രായപരിധിയിൽ ഇളവ് ലഭിക്കും.

അപേക്ഷിക്കാനുള്ള ഘട്ടങ്ങൾ

* ഔദ്യോഗിക വെബ്സൈറ്റ് https://ssc(dot)nic(dot)in/ സന്ദർശിക്കുക. 
* ഹോംപേജിൽ നിന്ന് 'Apply Online' ഓപ്ഷൻ തിരഞ്ഞെടുക്കുക.
* പുതിയ ഉപയോക്താക്കൾ 'New User Registration' ൽ ക്ലിക്ക് ചെയ്ത് അവരുടെ വിശദാംശങ്ങൾ നൽകി രജിസ്റ്റർ ചെയ്യണം. രജിസ്ട്രേഷൻ നമ്പറും പാസ്‌വേഡും അടങ്ങിയ ഇമെയിൽ ലഭിക്കും. ലഭിച്ച ലോഗിൻ വിവരങ്ങൾ ഉപയോഗിച്ച് ലോഗിൻ ചെയ്ത് അപേക്ഷാ ഫോം പൂരിപ്പിക്കുക.
* ആവശ്യമായ രേഖകൾ സ്കാൻ ചെയ്ത് അപ്‌ലോഡ് ചെയ്യുക.
* നിങ്ങളുടെ അപേക്ഷാ ഫീസ് ഓൺലൈനായി അടയ്ക്കുക.
* അപേക്ഷാ ഫോം സമർപ്പിക്കുക.
* ഭാവി ഉപയോഗത്തിനായി ഡൗൺലോഡ് ചെയ്ത് സൂക്ഷിക്കുക.