കണ്ണൂർ: (KVARTHA) ജില്ലയിൽ 20,000 പേർക്ക് തൊഴിൽ അവസരങ്ങൾ സൃഷ്ടിക്കുക എന്ന ലക്ഷ്യത്തോടെയുള്ള വിജ്ഞാൻ കണ്ണൂർ തൊഴിൽ ഡ്രൈവിന് ജൂൺ 14 ന് ധർമ്മശാല ഗവൺമെൻ്റ് എൻജിനീയറിംഗ് കോളേജിൽ വെച്ച് നടക്കുന്ന മെഗാ തൊഴിൽ മേളയോടെ തുടക്കമാകും എന്ന് വിജ്ഞാൻ കേരള സംസ്ഥാന അഡ്വൈസർ ഡോ: തോമസ് ഐസക് കണ്ണൂരിൽ നടത്തിയ വാർത്താസമ്മേളനത്തിൽ അറിയിച്ചു. ഏകദേശം നൂറോളം കമ്പനികളിൽ നിന്നായി 50,000 തൊഴിലവസരങ്ങൾ ഈ ഡ്രൈവിലൂടെ ലഭ്യമാക്കും.

തൊഴിൽ മേളയിൽ പങ്കെടുക്കാൻ ആഗ്രഹിക്കുന്ന ഉദ്യോഗാർത്ഥികൾ മെയ് 26 ന് മുൻപായി പേര് രജിസ്റ്റർ ചെയ്യേണ്ടതാണ്. ഇതിനായി മെയ് 23 മുതൽ 26 വരെ തദ്ദേശഭരണ സ്ഥാപനങ്ങളുടെ നേതൃത്വത്തിൽ സന്നദ്ധപ്രവർത്തകരുടെ ഗൃഹസന്ദർശന പരിപാടി സംഘടിപ്പിക്കും. ഇതുകൂടാതെ, എല്ലാ ലൈബ്രറികളിലും സർക്കാർ ഓഫീസുകളിലും ലഭ്യമായ ക്യു ആർ കോഡ് സ്കാൻ ചെയ്തും ആർക്കും രജിസ്റ്റർ ചെയ്യാവുന്നതാണ്.

മെയ് 31 മുതൽ സന്നദ്ധപ്രവർത്തകർ രജിസ്റ്റർ ചെയ്ത ഉദ്യോഗാർത്ഥികളെ ബന്ധപ്പെടുകയും, ഓരോരുത്തരുടെയും യോഗ്യതകൾക്കനുസരിച്ചുള്ള തൊഴിലവസരങ്ങൾ പരിചയപ്പെടുത്തുകയും ചെയ്യും. താല്പര്യമുള്ള ഉദ്യോഗാർത്ഥികൾ ഡിജിറ്റൽ വർക്ക് മാനേജ്മെൻറ് സിസ്റ്റം പ്ലാറ്റ്ഫോമിൽ അപേക്ഷ സമർപ്പിക്കണം. 

അപേക്ഷ സമർപ്പിക്കാൻ സഹായം ആവശ്യമുള്ളവർക്ക് അതത് ബ്ലോക്കുകളിലെയും നഗരസഭകളിലെയും ജോബ് സ്റ്റേഷനുകളെ സമീപിക്കാവുന്നതാണ്. അപേക്ഷിക്കേണ്ട അവസാന ദിവസമായ മെയ് 26 ന് ഉച്ചയ്ക്ക് ശേഷം ജോബ് സ്റ്റേഷനുകളിൽ വെച്ച് അസാപ്പിൻ്റെ സഹായത്തോടെ രജിസ്റ്റർ ചെയ്തവർക്ക് അഭിമുഖത്തിൽ പങ്കെടുക്കുന്നതിനുള്ള പരിശീലനവും നൽകും.

ജൂൺ 7 മുതൽ 12 വരെ കണ്ണൂർ കൃഷ്ണമേനോൻ മെമ്മോറിയൽ ഗവൺമെൻറ് വനിതാ കോളേജിൽ വെച്ച് ഉദ്യോഗാർത്ഥികൾക്കായി വിഷയാധിഷ്ഠിതമായ ലഘു പരിശീലന ക്ലാസുകൾ നടത്തും. ഐടിഐ, പോളിടെക്നിക്, കൊമേഴ്സ് ബിരുദധാരികൾ, മറ്റു ബിരുദധാരികൾ, പ്രൊഫഷണലുകൾ തുടങ്ങിയവർക്കായി വിദഗ്ധർ വ്യത്യസ്ത പരിശീലനങ്ങളാണ് നൽകുക. രജിസ്റ്റർ ചെയ്തവർക്ക് മാത്രമേ തൊഴിൽ മേളയിൽ പങ്കെടുക്കാൻ അനുവാദമുണ്ടാവുകയുള്ളൂ. സ്പോട്ട് രജിസ്ട്രേഷൻ ഉണ്ടായിരിക്കുന്നതല്ല.

മെഗാ തൊഴിൽ മേളയ്ക്ക് ശേഷം പ്രാദേശിക തൊഴിലവസരങ്ങൾ ലക്ഷ്യമിട്ടുള്ള ചെറു തൊഴിൽ മേളകളും തദ്ദേശ സ്ഥാപനങ്ങളുടെ നേതൃത്വത്തിൽ സംഘടിപ്പിക്കും. കൂടാതെ, എല്ലാ ശനിയാഴ്ചകളിലും തലശ്ശേരി എൻജിനീയറിംഗ് കോളേജിൽ വെച്ച് ഓൺലൈൻ തൊഴിൽ അഭിമുഖങ്ങളും നടത്തുന്നുണ്ട്. 

വിജ്ഞാൻ കണ്ണൂർ തൊഴിൽ ഡ്രൈവ് ജൂലൈ മാസാവസാനം നടക്കുന്ന മെഗാ ഗൾഫ് റിക്രൂട്ട്മെൻ്റോടെ അവസാനിക്കും. ഈ മേളയിൽ ഏകദേശം 20,000 ഗൾഫ് തൊഴിലവസരങ്ങൾ ലഭ്യമാകും. ഇതിലേക്കുള്ള അപേക്ഷകൾ പിന്നീട് സ്വീകരിക്കുന്നതാണ്.

കെ വി സുമേഷ് എംഎൽഎ, ടി.കെ ഗോവിന്ദൻ എന്നിവരും വാർത്താസമ്മേളനത്തിൽ പങ്കെടുത്തു.

ഈ വാർത്ത നിങ്ങളുടെ സുഹൃത്തുക്കളിലേക്കും എത്തിക്കൂ! നിങ്ങളുടെ അഭിപ്രായങ്ങളും താഴെ കമൻ്റ് ബോക്സിൽ പങ്കുവെക്കുക.

 
Article Summary: A mega job fair with 20,000 vacancies will be held in Kannur on June 14th as part of the Vijnan Kannur Job Drive. Registration closes on May 26th. Gulf recruitment with 20,000 opportunities is planned for July end.

#KannurJobs, #JobFair, #Employment, #KeralaJobs, #VijnanKannur, #Career