ദുബൈയിൽ മികച്ച കരിയറും ശമ്പളവും! എമിറേറ്റ്സ് എൻജിനീയറിംഗ് വിഭാഗത്തിലേക്ക് അടിയന്തിര നിയമനം; ഇന്ത്യയിലും നേരിട്ടുള്ള അഭിമുഖങ്ങൾ; അറിയാം 

ദുബൈ: (KVARTHA) ലോകത്തിലെ ഏറ്റവും പ്രമുഖ വിമാനക്കമ്പനികളിലൊന്നായ എമിറേറ്റ്സ് തങ്ങളുടെ എഞ്ചിനീയറിംഗ് വിഭാഗത്തിലേക്ക് വൻതോതിൽ ഉദ്യോഗാർത്ഥികളെ തേടുന്നു. ഏഷ്യ, യൂറോപ്പ് എന്നീ മേഖലകൾക്ക് പുറമേ യുഎഇയിലും നേരിട്ടുള്ള റിക്രൂട്ട്‌മെന്റ് ഡ്രൈവുകൾ നടത്താനാണ് കമ്പനിയുടെ തീരുമാനം. ജൂലൈ, ഓഗസ്റ്റ് മാസങ്ങളിലായി വിവിധ രാജ്യങ്ങളിൽ നേരിട്ടുള്ള അഭിമുഖങ്ങൾ ക്രമീകരിച്ചിട്ടുണ്ട്. 

മികച്ച യോഗ്യതയുള്ള വിമാന സാങ്കേതിക വിദഗ്ധരെയും എഞ്ചിനീയർമാരെയും ദുബൈയിലേക്കും അന്താരാഷ്ട്ര തലത്തിലുള്ള മറ്റ് കേന്ദ്രങ്ങളിലേക്കും ആകർഷിക്കുക എന്നതാണ് ഈ ബൃഹത്തായ പദ്ധതിയിലൂടെ എമിറേറ്റ്സ് ലക്ഷ്യമിടുന്നത്. ശ്രീലങ്ക, മലേഷ്യ, തായ്‌ലൻഡ്, ഇന്ത്യ തുടങ്ങിയ പ്രധാന വിപണികളിൽ പ്രത്യേക റിക്രൂട്ട്‌മെന്റ് സെഷനുകൾ നടക്കുമെന്ന് കമ്പനി ഔദ്യോഗികമായി സ്ഥിരീകരിച്ചു കഴിഞ്ഞു.

വൻ നേട്ടം

കഴിഞ്ഞ സാമ്പത്തിക വർഷത്തിൽ എമിറേറ്റ്സ് ഗ്രൂപ്പ് ചരിത്രത്തിലെ ഏറ്റവും മികച്ച സാമ്പത്തിക പ്രകടനമാണ് കാഴ്ചവെച്ചത്. യുദ്ധ വെല്ലുവിളികൾ നിലനിന്നിരുന്നിട്ടും നികുതിക്ക് മുൻപുള്ള ലാഭമായി 24.4 ബില്യൺ ദിർഹവും വരുമാനമായി 150.5 ബില്യൺ ദിർഹവും കൈവരിക്കാൻ കമ്പനിക്ക് സാധിച്ചു. 

ഈ അസാധാരണ നേട്ടത്തിന്റെ പശ്ചാത്തലത്തിൽ തങ്ങളുടെ ജീവനക്കാർക്ക് 20 ആഴ്ചത്തെ ശമ്പളം ബോണസായി നൽകി കമ്പനി വിസ്മയിപ്പിച്ചിരുന്നു. നിലവിൽ എമിറേറ്റ്സിലും ഡനാറ്റയിലുമായി  ജീവനക്കാരുടെ എണ്ണം എട്ട് ശതമാനം വർദ്ധിച്ച് 1,30,919 ൽ എത്തിയിരിക്കുകയാണ്. ഈ വളർച്ചാ കുതിപ്പ് നിലനിർത്താനാണ് പുതിയ തൊഴിലവസരങ്ങൾ സൃഷ്ടിക്കുന്നത്.

അഭിമുഖ തീയതികൾ

ഇന്ത്യയിലെയും മറ്റ് അയൽരാജ്യങ്ങളിലെയും ഉദ്യോഗാർത്ഥികൾക്കായി വിപുലമായ രീതിയിലാണ് വരും മാസങ്ങളിൽ അഭിമുഖങ്ങൾ നിശ്ചയിച്ചിരിക്കുന്നത്. ജൂലൈ ഏഴിന് ശ്രീലങ്കയിലെ കൊളംബോയിലും, ജൂലൈ 7

ഏഴ്, എട്ട് തീയതികളിൽ മലേഷ്യയിലെ കോലാലംപൂരിലും തായ്‌ലൻഡിലെ ബാങ്കോക്കിലും റിക്രൂട്ട്‌മെന്റ് ഡ്രൈവുകൾ നടക്കും. 

ഇന്ത്യയിലെ ഉദ്യോഗാർത്ഥികൾക്കായി ജൂലൈ 21, 22 തീയതികളിൽ മുംബൈയിലും, ജൂലൈ 24, 25 തീയതികളിൽ ന്യൂഡൽഹിയിലും പ്രത്യേക അഭിമുഖങ്ങൾ ഉണ്ടായിരിക്കുന്നതാണ്. നിശ്ചിത യോഗ്യതയുള്ള അപേക്ഷകരെ നേരിട്ടുള്ള അഭിമുഖത്തിനായി എമിറേറ്റ്സിന്റെ പ്രൊഫഷണൽ മാനേജർമാരും എഞ്ചിനീയറിംഗ് വിദഗ്ധരും അടങ്ങുന്ന പാനൽ ക്ഷണിക്കും.

വിവിധ തസ്തികകൾ

വിമാനങ്ങളുടെ സുരക്ഷയും കാര്യക്ഷമതയും ഉറപ്പുവരുത്തുന്നതിനായി വൈവിധ്യമാർന്ന സാങ്കേതിക തസ്തികകളിലേക്കാണ് അപേക്ഷ ക്ഷണിച്ചിട്ടുള്ളത്. എയർക്രാഫ്റ്റ് ടെക്നീഷ്യന്മാർ, ലൈസൻസ്ഡ് എയർക്രാഫ്റ്റ് എഞ്ചിനീയർമാർ, സീനിയർ മെക്കാനിക്കുകൾ, വർക്ക്‌ഷോപ്പ് കാബിൻ ടെക്നീഷ്യന്മാർ, വെയർഹൗസ് ആൻഡ് ലോജിസ്റ്റിക്സ് അസിസ്റ്റന്റുമാർ, മെയിന്റനൻസ് സപ്പോർട്ട് സ്പെഷ്യലിസ്റ്റുകൾ എന്നിവ ഇതിൽ ഉൾപ്പെടുന്നു. 

ദുബൈ ഹബ്ബിന് പുറമെ ലണ്ടൻ, ഇസ്താംബുൾ, ഹോങ്കോംഗ്, ചെന്നൈ, അഹമ്മദാബാദ്, ഹൈദരാബാദ്, മെൽബൺ തുടങ്ങിയ നഗരങ്ങളിലെ എമിറേറ്റ്സ് സ്റ്റേഷനുകളിലും ഈ ഒഴിവുകൾ ലഭ്യമാണ്.

ദുബൈ അവസരങ്ങൾ

അന്താരാഷ്ട്ര തലത്തിലുള്ള നിയമനങ്ങൾക്ക് പുറമെ ദുബൈയിൽ മാത്രമായി 16 പ്രധാന എഞ്ചിനീയറിംഗ് തസ്തികകൾ കമ്പനി പ്രസിദ്ധീകരിച്ചിട്ടുണ്ട്. മെയിന്റനൻസ്, പ്രൊക്യൂർമെന്റ്, ടെക്നിക്കൽ ട്രെയിനിംഗ് എന്നീ മേഖലകളിലാണ് ദുബായിൽ ഒഴിവുകളുള്ളത്. 

ലീഡ് എയർക്രാഫ്റ്റ് മെക്കാനിക്, വാറന്റി ഓഫീസർ, വർക്ക്‌ഷോപ്പ് മെയിന്റനൻസ് എഞ്ചിനീയർ, പ്രൊക്യൂർമെന്റ് മാനേജർ, എഞ്ചിനീയറിംഗ് ടൈപ്പ് ഇൻസ്ട്രക്ടർ തുടങ്ങിയ തസ്തികകൾ ഇതിൽപ്പെടുന്നു. ജൂൺ, ജൂലൈ മാസങ്ങളിലായി ഇവയുടെ അപേക്ഷാ തീയതികൾ അവസാനിക്കും വിധമാണ് ക്രമീകരിച്ചിരിക്കുന്നത്.

ലോകോത്തര സൗകര്യം

ദുബൈയിൽ 55 ഹെക്ടറിലായി പരന്നുകിടക്കുന്ന എമിറേറ്റ്സിന്റെ എഞ്ചിനീയറിംഗ് സെന്റർ ലോകത്തിലെ തന്നെ ഏറ്റവും അത്യാധുനികമായ വിമാന അറ്റകുറ്റപ്പണി കേന്ദ്രങ്ങളിലൊന്നാണ്. ഇതിൽ ഒരേസമയം ഒന്നിലധികം എയർബസ് A380 വിമാനങ്ങളെ ഉൾക്കൊള്ളാൻ ശേഷിയുള്ള 12 കൂറ്റൻ ഹാങ്ങറുകൾ സജ്ജീകരിച്ചിരിക്കുന്നു. 

പൂർണമായും ഓട്ടോമേറ്റഡ് ആയ മെയിന്റനൻസ് സംവിധാനങ്ങളും 1,15,000 പൗണ്ട് വരെ ത്രസ്റ്റ് കൈകാര്യം ചെയ്യാൻ ശേഷിയുള്ള എഞ്ചിൻ ടെസ്റ്റിംഗ് ഫെസിലിറ്റികളും ഈ കേന്ദ്രത്തിന്റെ പ്രത്യേകതയാണ്. എമിറേറ്റ്സിന്റെ അഭിമാനമായ ബോയിംഗ് 777, എയർബസ് എ380 വിമാനങ്ങളുടെ സുഗമമായ യാത്രകൾക്ക് പിന്നിൽ പ്രവർത്തിക്കുന്നത് ഈ ഹബ്ബാണ്.

എമിറേറ്റ്സ് എയർലൈൻസിൽ ജോലി ചെയ്യുന്ന ജീവനക്കാർക്ക് അന്താരാഷ്ട്ര നിലവാരത്തിലുള്ള ആനുകൂല്യങ്ങളാണ് കമ്പനി വാഗ്ദാനം ചെയ്യുന്നത്. യുഎഇയിലെ നികുതിരഹിത ശമ്പളത്തിന് പുറമേ യോഗ്യരായ ജീവനക്കാർക്ക് മികച്ച താമസസൗകര്യവും യാത്രാ അലവൻസുകളും ലഭിക്കും. കൂടാതെ എമിറേറ്റ്സ് ശൃംഖലയിലുടനീളം കുറഞ്ഞ നിരക്കിൽ യാത്ര ചെയ്യാനുള്ള കോൺസെഷണൽ ടിക്കറ്റുകളും കുടുംബാംഗങ്ങൾക്ക് മെഡിക്കൽ ഇൻഷുറൻസും ലഭ്യമാക്കുന്നുണ്ട്. എമിറേറ്റ്സ് പ്ലാറ്റിനം കാർഡ് വഴി യുഎഇയിലെ വിവിധ റീട്ടെയിൽ ഔട്ട്‌ലെറ്റുകളിലും ഹോട്ടലുകളിലും പ്രത്യേക ഡിസ്‌കൗണ്ടുകളും ജീവനക്കാർക്ക് ആസ്വദിക്കാനാകും.

എങ്ങനെ അപേക്ഷിക്കാം?

ഈ സുവർണ്ണാവസരം പ്രയോജനപ്പെടുത്താൻ താല്പര്യമുള്ള ഉദ്യോഗാർത്ഥികൾ എമിറേറ്റ്സിന്റെ ഔദ്യോഗിക കരിയർ പോർട്ടൽ സന്ദർശിച്ച് ഓൺലൈനായി രജിസ്റ്റർ ചെയ്യേണ്ടതാണ്. ഓരോ തസ്തികയ്ക്കും ആവശ്യമായ കൃത്യമായ വിദ്യാഭ്യാസ യോഗ്യതകളും പ്രവൃത്തിപരിചയവും വെബ്സൈറ്റിൽ വിശദമായി നൽകിയിട്ടുണ്ട്. ഓൺലൈൻ വഴി അപേക്ഷ സമർപ്പിക്കുന്നവരിൽ നിന്നും തിരഞ്ഞെടുക്കപ്പെടുന്ന പ്രൊഫൈലുകളെ മാത്രമേ നേരിട്ടുള്ള ഇന്റർവ്യൂ സെഷനുകളിലേക്ക് ഇമെയിൽ വഴി ക്ഷണിക്കുകയുള്ളൂ.

തൊഴിൽ സംബന്ധമായ ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമന്റായി രേഖപ്പെടുത്തുക.

Article Summary: Emirates is recruiting extensively for its engineering division, with direct interview sessions scheduled across Asia, Europe, and UAE, including Mumbai and New Delhi in July.

#EmiratesRecruitment #JobOpportunity #AviationJobs #EngineeringJobs #EmiratesCareers #MalayalamNews #AmmuNews