ഡെന്മാർക്കിൽ കെയർഗിവർമാരാകാൻ കുടുംബശ്രീ പ്രവർത്തകർ; പരിശീലനവും ഭാഷാപഠനവും വരുന്നു

തിരുവനന്തപുരം: (KVARTHA) വയോജന ശുശ്രൂഷാ രംഗത്ത് കുടുംബശ്രീയുമായി കൈകോർക്കാനുള്ള സാധ്യതകൾ ചർച്ച ചെയ്ത് ഡെന്മാർക്ക്. വ്യാഴാഴ്ച, 2026 ജനുവരി 08-ന് തിരുവനന്തപുരത്ത് നടന്ന കൂടിക്കാഴ്ചയിൽ ഡെന്മാർക്കിലെ വയോജനക്ഷേമ വകുപ്പ് മന്ത്രി മെറ്റേ കിർക്ക്ഗാർഡ്, ഇന്ത്യയിലെ ഡെന്മാർക്ക് അംബാസിഡർ റസ്മസ് അബിൽഡ്ഗാർഡ് ക്രിസ്റ്റെൻസൻ എന്നിവരുടെ നേതൃത്വത്തിലുള്ള ഉന്നതസംഘം തദ്ദേശ സ്വയം ഭരണ എക്സൈസ് പാർലമെന്ററി കാര്യ വകുപ്പ് മന്ത്രി എം ബി രാജേഷുമായി ചർച്ച നടത്തി. 

കുടുംബശ്രീ പ്രവർത്തകരെ ആവശ്യമായ പരിശീലനം നൽകി ഡെന്മാർക്കിൽ കെയർഗിവിംഗ് രംഗത്ത് സോഷ്യൽ ഹെൽത്ത് കെയർ ഹെൽപ്പർമാരായി നിയോഗിക്കാനുള്ള സാധ്യതകളാണ് പ്രധാനമായും ചർച്ചാ വിഷയമായത്. കേരളത്തിൽ കുടുംബശ്രീയുടെ നേതൃത്വത്തിൽ നടന്നുവരുന്ന 'കെ ഫോർ കെയർ' പദ്ധതിയുടെ വിശദാംശങ്ങൾ ഡാനിഷ് സംഘം നേരിട്ട് ചോദിച്ചറിഞ്ഞു. 

ജെറിയാട്രിക്, പാലിയേറ്റീവ് കെയർ രംഗങ്ങളിൽ കുടുംബശ്രീ നടത്തുന്ന ഇടപെടലുകൾ അന്താരാഷ്ട്ര തലത്തിൽ തന്നെ മാതൃകാപരമാണെന്ന് സംഘം അഭിപ്രായപ്പെട്ടു. ഈ മേഖലയിൽ കേരളവുമായി സഹകരിക്കുന്നതിൽ ഡെന്മാർക്ക് സർക്കാരിനുള്ള താൽപ്പര്യം മന്ത്രി മെറ്റേ കിർക്ക്ഗാർഡ് പ്രകടിപ്പിച്ചു. വിഷയത്തിൽ അനുഭാവപൂർവ്വമായ തുടർനടപടികൾ ഉണ്ടാകുമെന്ന് സംഘം ഉറപ്പുനൽകിയിട്ടുണ്ട്.

ആതുരശുശ്രൂഷാ രംഗത്തെന്ന പോലെ കെയർഗിവിംഗ് രംഗത്തും ലോകത്തിന് ശ്രദ്ധേയമായ സംഭാവന നൽകാൻ കേരളത്തിന് കഴിയുമെന്ന് മന്ത്രി എം ബി രാജേഷ് പറഞ്ഞു. സംസ്ഥാനത്തെ തദ്ദേശ സ്വയം ഭരണ സ്ഥാപനങ്ങൾ പാലിയേറ്റീവ് കെയർ രംഗത്ത് ഇതിനകം തന്നെ മാതൃകാപരമായ പ്രവർത്തനങ്ങളാണ് കാഴ്ചവെക്കുന്നത്. 

കെ ഫോർ കെയർ പദ്ധതി ആരംഭിച്ച് ചുരുങ്ങിയ കാലം കൊണ്ടുതന്നെ കുടുംബശ്രീ ഈ രംഗത്ത് വിസ്മയകരമായ മാറ്റങ്ങൾ കൊണ്ടുവന്നു. ഇത്തരം പ്രവർത്തനങ്ങൾക്കുള്ള വലിയ അംഗീകാരമാണ് ഡെന്മാർക്ക് ഉൾപ്പെടെയുള്ള വിദേശ രാജ്യങ്ങളിൽ നിന്ന് വരുന്ന അന്വേഷണങ്ങളെന്നും മന്ത്രി കൂട്ടിച്ചേർത്തു.

കുടുംബശ്രീയുടെ കെ ഫോർ കെയർ പദ്ധതിയിലൂടെ ഇതിനകം ആയിരത്തിലധികം പേർക്ക് വയോജന ശുശ്രൂഷാ രംഗത്ത് പരിശീലനം നൽകി വിന്യസിച്ചുകഴിഞ്ഞു. നിപ്മർ (നാഷണൽ ഇൻസ്റ്റിറ്റ്യൂട്ട് ഓഫ് ഫിസിക്കൽ മെഡിസിൻ ആൻഡ് റീഹാബിലിറ്റേഷൻ), എച്ച്എൽഎസ് പിപിടി (ഹിന്ദുസ്ഥാൻ ലാറ്റക്സ് ഫാമിലി പ്ലാനിംഗ് പ്രമോഷൻ ട്രസ്റ്റ്), ആസ്പിരന്റ് ലേണിംഗ് അക്കാദമി എന്നിവയുമായി സഹകരിച്ചാണ് ഒരു മാസം നീളുന്ന റസിഡൻഷ്യൽ പരിശീലനം നൽകുന്നത്. നിലവിൽ ഇവർ കേരളത്തിലെ വിവിധ ഇടങ്ങളിൽ സേവനം അനുഷ്ഠിക്കുന്നുണ്ട്.

കുടുംബശ്രീ പ്രവർത്തകരെ ഡെന്മാർക്കിലേക്ക് നിയോഗിക്കുന്നതിന് നോർക്ക റൂട്ട്സുമായി ചേർന്നാകും തുടർനടപടികൾ സ്വീകരിക്കുക. വിദേശ രാജ്യത്തെ സേവനത്തിനായി നിലവിലുള്ള പരിശീലനത്തിന് പുറമെ കൂടുതൽ വിപുലമായ പരിശീലനവും ഡാനിഷ് ഭാഷാ പഠനവും അനിവാര്യമാണെന്ന് ചർച്ചയിൽ വിലയിരുത്തി. 

ഇതുസംബന്ധിച്ച കൂടുതൽ കാര്യങ്ങൾ വരും ദിവസങ്ങളിൽ നടക്കുന്ന ചർച്ചകളിൽ തീരുമാനമാകും. തദ്ദേശ സ്വയം ഭരണ വകുപ്പ് സെക്രട്ടറി അനുപമ ടി വി, കുടുംബശ്രീ എക്സിക്യൂട്ടീവ് ഡയറക്ടർ എച്ച് ദിനേശൻ എന്നിവരും മന്ത്രിതല ചർച്ചയിൽ പങ്കെടുത്തു

കുടുംബശ്രീയുടെ ഈ വലിയ നേട്ടത്തെക്കുറിച്ച് സുഹൃത്തുക്കളും അറിയാൻ വാർത്ത പങ്കുവെക്കൂ. 

Article Summary: Denmark expresses interest in hiring Kudumbashree members for geriatric care roles following a meeting with Kerala Minister MB Rajesh.

#Kudumbashree #DenmarkKerala #GeriatricCare #MBRajesh #K4Care #JobOpportunities #KeralaNews